Tepetepet Manlapud Saray Managbasa

Anto so taloran kaatapan ya impasakbay nen Jesus diad Mateo 5:22?

Diad Sermon to ed Palandey, pinasakbayan nen Jesu-Kristo iray patumbok to: “Ikuan ko ed sikayo a siopaman a mantultuloy ya onsanok ed agi to et walay eebatan to ed korte na hustisya; balet siopaman a mangibalikas ed agi to na agnayarin bitlaen a salitan panagmudmora et walay eebatan to ed Sankatageyan a Korte; bangta siopaman a mangibagay, ‘Sika, makapagulan makulangkulang!’ so makanepegan ed manliob a Gehenna.”​—Mateo 5:22, NW.

Inusar nen Jesus iray bengatlan kabisado na saray Judio​—say korte na hustisya, say Sankatageyan a Korte, tan say manliob a Gehenna​—pian nipurek to ed sikara so ombebelat iran dusa parad saray onloloor a kasalanan.

Unona, inkuan nen Jesus a siopaman a mantultuloy ya onsanok ed agi to et walay eebatan to ed “korte na hustisya,” say lokal a korte. Unong ed tradisyon, sarayan korte so ileletneg ed saray syudad a walaay 120 odino onsulok ni a lalakin wala la’d edad. (Mateo 10:17; Marcos 13:9) Saray huis ed satan a korte so walaan na autoridad a mangukom, anggan diad saray kason impamatey. (Deuteronomio 16:18; 19:12; 21:1, 2) Kanian, impabitar nen Jesus a say toon maneem-em na pirmin sanok ed agi to so graben mankakasalanan.

Insan inkuan nen Jesus a say toon “mangibalikas ed agi to na agnayarin bitlaen a salitan panagmudmora et walay eebatan to ed Sankatageyan a Korte.” Say Griegon salita a rha·kaʹ a nipatalos ya “agnayarin bitlaen a salitan panagmudmora” et mankabaliksan na “apa” odino “maapan-kanonotan.” Unong ed The New Thayer’s Greek-English Lexicon of the New Testament, satan a salita et “sakey a terminon panagpabanday ya inusar na saray Judio ed panaon nen Kristo.” Diad ontan et amasakbay si Jesus sumpad kagrabe na pangibalikas na panggula ed kaparan too panamegley na makapabanday a salitan panagmudmora. Singa la ibabaga nen Jesus a say toon mangibalikas na ontan so aglabat ukomen na lokal a korte noagta say Sankatageyan a Korte, say interon Sanhedrin​—say ulop na saray ukom ed Jerusalem a tugyopen na atagey a saserdote tan 70 a mamasiken tan eskriba.​—Marcos 15:1.

Diad kaunoran, impaliwawa nen Jesus a no ibaga na sakey a too ed sananey a, “Sika, makapagulan makulangkulang!” sikatoy makanepegan ed manliob a Gehenna. Say salitan “Gehenna” et nanlapu ed Hebreo iran salita a geh hin·nomʹ, a mankabaliksay “lawak na Hinnom,” a wala ed banda’d sagur tan abalaten na kadaanan a Jerusalem. Diad panaon nen Jesus, satan a lawak so pampopoolan ed basura, pati saray bangkay na mauge-uges iran kriminal ya impasen ya agmakanepegan na desentin ponpon. Kanian say salitan “Gehenna” et matukoy a simbolo na sigpot a kadederal.

Anto sirin so kabaliksan na balikas a “makapagulan makulangkulang”? Ompatnag a say salitan inusar dia et mipara ed Hebreon termino a mankabaliksay “rebelyoso,” odino “masumpa.” Satan so mangidedeskribe ed sakey a too bilang andian na moral, sakey ya apostata tan rebelde ed Dios. Kanian say too a manawag ed kapara ton too a “makapagulan makulangkulang” et singa to la ibabaga a makanepegan so agi to a nadusa bilang rebelde ed Dios, salanti andi-angga a kadederal. Diad panmoria na Dios, say sakey a mangibalikas na ontan a panangondena sumpad arum so makanepegan a mismo na ambelat a sentensia, salanti, andi-angga a kadederal.​—Deuteronomio 19:17-19.

Kanian si Jesus so angiter ed saray patumbok to na mas atagey ya estandarte nen saramay wala la ed saray prinsipyon naromog ed Mosaikon Ganggan. Bangta papanisiaan na saray totoo a say akapatey et “walay eebatan to ed korte na hustisya,” nagkalalo ni so indanet nen Jesus. Imbangat to a nepeg a paliisan na saray patumbok to so anggan say panem-em labat na panamusol ed agagi ra.​—Mateo 5:21, 22.