“Onkanan Pamintuaan ed Saray Amin a Nasyones”
“Onkanan Pamintuaan ed Saray Amin a Nasyones”
“Sikayo so tasik . . . angga ed kasampotan na dalin.”—GAWA 1:8.
1. Kapigan tan iner a primeron nadngel na saray babangatan so propesiya a nirekord ed Mateo 24:14?
PAMILYAR a maong iray salita nen Jesus a nirekord ed Mateo 24:14 kanian dakel ed sikatayo so akapangipatlep la ed satan. Tan talagan makatantandan propesiya itan! Nonoten pa so maseguron inisip na saray babangatan sanen primero dan nadngel itan! Say taon ed saman et 33 K.P. Mantaloy taon lan kaiba na saray babangatan si Jesus, tan diad saman et sikaray kaiba ton linma ed Jerusalem. Anengneng daray milagro to tan tinalineng daray bangat to. Anggaman aliketan ira ed mabli iran katuaan ya imbangat nen Jesus ed sikara, amta ra ya aliwan amin et aliketan. Walaan si Jesus na makapanyari tan maimpluensyan kakabusol.
2. Antoran kapeligroan tan kairapan so arapen na saray babangatan?
2 Diad Palandey na saray Olibo, apatiran babangatan so yinmurong a kaiba nen Jesus, a marengerengel legan ton itotongtong so isabi na saray kapeligroan tan kairapan ya arapen da. Akadkauna lan imbaga nen Jesus ed sikara a sikatoy napapatey. (Mateo 16:21) Diad saman et impalinew to a makasagmak met ira na maruksan isusumpa. “Yawat da kayo ed pakapasegsegang, tan pateyen da kayo naani,” so inkuan to. “Tan gulaen da kayo naani na saray amin a nasyon nisengeg ed ngaran ko.” Aliwa labat a satan. Saray palson propeta so mangibalang ed dakel. Arum so nigapol tan mangiburi tan manbubusolan ed sakey tan sakey. Wala ni ingen iray arum, diad tua et “amayamay,” a mamaulyan ya ombetel so aro ra ed Dios tan ed Salita to.—Mateo 24:9-12.
3. Akin a talagan makapakelaw iray salita nen Jesus a naromog ed Mateo 24:14?
3 Kayarin sinalambit nen Jesus iray makadismayan sirkumstansya, insan to imbalikas ed saray babangatan to so maseguron nankelawan da. Inkuan to: “Saya ya ebanghelyo na panarian nipulong naani ed sankamundoan ya onkanan pamintuaan ed saray amin a nasyones; et saman la onsabi so anggaan.” (Mateo 24:14) On, say kimey ya inggapo nen Jesus ed Israel, salanti, pian “tasian so katuaan,” et mantultuloy tan onlaknab ed interon mundo. (Juan 18:37) Talagan makapakelaw itan a propesiya! Mairap a mismo so pangilaknab ed satan a kimey anggad “amin a nasyones”; mamilagro so panggawa ed satan lapud ‘panggula na saray amin a nasyon.’ Say panggawa ed sayan balbaleg a kimey et aglambengat mangiyalangon ed inkasoberano tan pakapanyari nen Jehova noagta ontan met ed aro, panangasi, tan inkaanos to. Niarum ni, mangiter itan ed saray lingkor to na pankanawnawa pian nipatnag day pananisia tan debosyon da.
4. Sioparay angibagaan a manumpal ed kimey a panagtasi, tan anton ligliwa so inter nen Jesus?
4 Impalinew nen Jesus ed saray babangatan to a walay importantin maong a kimey a gawaen da. Antis na insegep to ed tawen, pinmayawar si Jesus ed sikara tan inkuan to: “Mangawat kayo na pakayari, no onsabi ed sikayo so espiritu santo: et sikayo so tasik ed Jerusalem, tan ed amin a Judea tan Samaria, tan angga ed kasampotan na dalin.” (Gawa 1:8) Siempre, agmanbayag et walaray arum met lan mibiang ed sikara. Siansia, pigpigara iray babangatan. Agaylan makaligliwan naamtaan a say makapanyari a masanton espiritu na Dios so mamabiskeg ed sikaran mangawat ed sayan madibinon asainmin!
5. Antoy ag-amta na saray babangatan nipaakar ed panagtasin kimey?
5 Amta na saray babangatan a nepeg dan ipulong so maong a balita tan ‘manggawa ra na saray babangatan ed amin a nasyones.’ (Mateo 28:19, 20) Balet agda amta no panon kalaknab so gawaen a panagtasi, tan agda amta no kapigan onsabi so anggaan, unong ya agtayo met amta. Pamaakaran iraya a si Jehova labat so manetermina. (Mateo 24:36) Sano apenek la si Jehova ed kalaknab na gagawaen a panagtasi, insan to itarok so anggaan na sayan marelmeng a sistema na bengabengatla. Diad satan lambengat natebek na saray Kristiano a say panagpulong a kimey so agawaan la ed kalaknab a gagala nen Jehova. Maseguron ag-atebek na saramay inmuunan babangatan so kalaknab na panagtasi a nagawa ed sayan panaon na anggaan.
Say Ginawan Panagtasi nen Inmunan Siglo
6. Antoy agawa nen Pentecostes 33 K.P. tan kayarin tuloy na satan?
6 Nen inmunan siglo, say panagpulong na Panarian tan panaggaway babangatan a kimey so amawala na makapakelaw iran resulta. Diad agew na Pentecostes 33 K.P., manga 120 a babangatan so walad tagey a kuarto diad Jerusalem. Say masanton espiritu na Dios so nikalbo ed sikara, angiter si apostol Pedro na makapakiwas a paliwawa a mangisasalaysay ed kabaliksan na sayan milagro, tan manga 3,000 so nagmaliw a mananisia tan abautismoan. Gapoan lambengat itan. Anggaman panggugunaetan na saray relihyoson lider a patundaen so panangipulong ed maong a balita, “say Katawan inyarum to ed sikara [saray babangatan] ya inagew-agew so saray nilaban.” Ag-abayag, “say bilang na lalaki sinmapot a limanlibo.” Kayari na satan, “saray mananisia ed Katawan lalo nin naaruman ira, a dinmakel so bilang na saray lalaki tan bibii.”—Gawa 2:1-4, 8, 14, 41, 47; 4:4; 5:14.
7. Akin a makatantandan agawa so inkakomberte nen Cornelio?
7 Naimatonan na taon 36 K.P. so sananey a makatantandan agawa—say inkakomberte tan bautismo nen Cornelio, sakey a Gentil. Diad impangiwanwan ed si apostol Pedro ed sayan walaay takot ed Dios a too, impatnag nen Jehova a say ganggan nen Jesus a “manggawa na babangatan ed amin a nasyones” et aliwan para labat ed saray Judio ed nanduruman daldalin. (Gawa 10:44, 45) Antoy reaksion na saramay angidaulo? Sanen atebek na saray apostol tan mamatatken ed Judea a say maong a balita so kaukolan met ya ipasabi ed saray nasyones, salanti, saray aliwan Judio—inggloria ra so Dios. (Gawa 11:1, 18) Diad kaleganan, say panagpulong a kimey so nantultuloy a nambunga ed limog na saray Judio. Pigaran taon ed saginonor, nayarin sanen manga 58 K.P., wala so niarum ed saray mananisian Gentil a ‘piganlibon Judios a mananisia.’—Gawa 21:20.
8. Panon a say maong a balita so mangaapekta ed saray indibidual?
8 Anggaman makapadinayew so karakel na niarum ed limog na inmunan-siglo iran Kristiano, nepeg ya agtayon balot lilingwanan a saratan a bilang et mangirerepresenta ed aktual a totoo. Mapuersa so mensahe na Biblia a nadngel da. (Hebreos 4:12) Inuman na satan so kabibilay na saramay angawat ed satan. Pinasimbalo na saray indibidual so kabibilay da tan insulong day balon personalidad, tan akipulangan ira ed Dios. (Efeso 4:22, 23) Tua met itan natan. Tan saramay angawat ed maong a balita so walaan na makapakelkelaw ya ilalon manbilay ya andi-anggaan.—Juan 3:16.
Kakimeyan na Dios
9. Anton pribilehyo tan responsabilidad so binidbir na saray inmunan Kristiano a niwalad sikara?
9 Ag-inala na saray inmunan Kristiano so kredito ed agawaan. Binidbir da a say kimey da bilang ministros et sinuportaan na “pakayari na espiritu santo.” (Roma 15:13, 19) Si Jehova so mamapabulaslas ed espiritual. Ontan met, amta na saraman a Kristiano a walaan ira na pribilehyo tan responsabilidad bilang “kakimeyan na Dios.” (1 Corinto 3:6-9) Kanian, mitunosan ed bilin nen Jesus, nanggunaetan dan kinimeyan ya impasya so nipabtang ed sikaran gawaen.—Lucas 13:24.
10. Antoran sagpot so ginawa na saray inmunan Kristiano pian mantasi ed amin a nasyones?
10 Bilang “apostol na saray gentil,” nambaroy si Pablo na nilibon kilometro ed ekat tan ed dayat, angiletneg na dakel iran kongregasyon ed Romanon probinsya na Asia tan ed Gresya. (Roma 11:13) Sikato met so nambaroy ed Roma tan nayarin anggan diad España. Bangta si apostol Pedro ya angimatalkan na ‘ebanghelyo parad saray agalsiman,’ so nambaroy ed arum a direksion pian manlingkor ed Babilonia, ya importantin sentro na Judaismo ed saman a panaon. (Galacia 2:7-9; 1 Pedro 5:13) Pigara ed saray dakel a nansagpot ed kimey na Katawan et saray bibii a singa si Trifena tan Trifosa. Sananey nin bii, a manngaran na Persis, so nibagan “nankimey na dakel ed Katawan.”—Roma 16:12.
11. Panon a benendisyonan nen Jehova iray sagpot na saray babangatan?
11 Benendisyonan nen Jehova na daakan so sagpot na saratan tan arum niran maseseg a komikimey. Ngalngali 30 taon kayarin impasakbay nen Jesus a niwala so pantasi ed amin a nasyon, insulat nen Pablo a say “ebanghelyo” so “nipulong ed amin a pinalsa ed leksab na tawen.” (Colosas 1:23) Kasin sinmabi so anggaan ed saman? Diad sakey a pantalos, on. Sinmabi itan ed Judion sistema na bengabengatla ed taon 70 K.P. sanen dineral na saray Romanon armada so Jerusalem a pati say templo. Ingen, inggetma la nen Jehova a babaleg a pantasi ni so gawaen sakbay ton panampoten so sankamundoan a sistema na bengabengatla nen Satanas.
Say Nagagawan Panagtasi Natan
12. Panon ya atalosan na saray inmunan Estudyante na Biblia so ganggan a manpulong?
12 Legan na unor a kabiangan na koma-19 siglo, kayari na andukey a peryodo ya inkasmak na relihyoson apostasya, niletneg lamet so puron panagdayew. Saray Estudyante na Biblia, unong a tawag ed saray Tasi nen Jehova nensaman, so malinew ya akatalos ed ganggan a manggawa na saray babangatan ed interon dalin. (Mateo 28:19, 20) Nen 1914, wala so manga 5,100 ya aktibon akibiang ed panagpulong a kimey, tan say maong a balita so akasabi ed manga 68 a daldalin. Balet, saraman ya inmuunan Estudyante na Biblia so ag-akatebek ed sigpot a kabaliksan na Mateo 24:14. Diad saginonor na koma-19 siglo, say Biblia, a lugan toy maong a balita, odino ebanghelyo, so impatalos tan inimprinta na saray sosyedad na Biblia (Bible societies) ed dakel a lenguahe tan nibunog ed interon mundo. Kanian, diad loob na pigaran dekada, inkatunongan na saray Estudyante na Biblia a nagagawaan la so panagtasi ed saray nasyones.
13, 14. Anton mas malinew a pakatalos ed linawa tan gagala na Dios so niparungtal ed 1928 ya isyu na The Watch Tower?
13 Kalkalnan pinagamoran nen Jehova iray totoo to na mas malinew a pakatalos nipaakar ed linawa tan gagala to. (Uliran 4:18) Inkuan na The Watch Tower na Disyembre 1, 1928: “Kasin nibaga tayo a [say] panangibunog ed Biblia et anumpal la ed nipasakbay a panangipulong ed ebanghelyo na panarian? Seguradon andi! Anggaman ed sayan panangibunog ed Biblia, siansian nakaukolan parad melag a grupo na saray tasi na Dios ed dalin so pangimprinta ed literatura a mangipapaliwawa ed [gagala] na Dios tan ombisita ed kaabungan na saray akapangipalimaan ed sarayan Biblia. No andi et mansiansian ignorante iray totoo nipaakar ed inkiletneg na Mesianikon gobierno ed panaon tayo.”
14 Inkuan ni na satan ya isyu na The Watch Tower: “Nen 1920, . . . nipetek a siansia so impakatalos na saray Estudyante na Biblia ed propesiya na Katawan tayo a walad Mateo 24:14. Insan da amoria a ‘sayan ebanghelyo’ a kaukolan ya ipulong ed interon mundo ya onkanan paneknek ed saray Gentil odino amin a nasyones, et aliwan ebanghelyo na panarian ya onsabi ni labat noagta ebanghelyo a nagkalautlan mangibabaga a say Mesianikon Ari so ginmapo lan manuuley ed interon dalin.”
15. Panon a linmaknab so panagpulong a kimey nanlapula nen dekada na 1920?
15 Satan a “melag a grupo na saray tasi” nen dekada na 1920 so agnansiansian melag. Diad saray tinmumbok a dekada, “sakey a baleg ya ulop” na ‘arum a karnero’ so abidbiran tan ginmapon atipon. (Apocalipsis 7:9; Juan 10:16) Natan, wala so 6,613,829 a manangiyabawag na maong a balita ed 235 a bansa ed interon dalin. Agaylan makapakelaw a kasumpalan na propesiya! Anggapo ni nensaman so ontan a kalaknab na impangipulong ed “sayan ebanghelyo na panarian.” Anggapo ni nensaman so ontan karakel a matoor a lingkor nen Jehova ed dalin.
16. Antoy agawaan ed apalabas a serbisyon taon? (Nengnengen so tsart ed pahina 27-30.)
16 Sayan baleg ya ulop na saray Tasi so saniiban okupado legan na 2005 a serbisyon taon. Masulok a sakey bilyon ya oras so inusar ed panangiyabawag ed maong a balita diad 235 a bansa. Minilyon a panagpawil so ginawa, tan minilyon so inkondukta a panangiyaral na Biblia. Sayan kimey so agawaan na saray Tasi nen Jehova, a bulos ya angigana na panaon tan kaykayarian da pian inabang ed arum so Salita na Dios. (Mateo 10:8) Diad pakapanyari na masanton espiritu, itutultuloy nen Jehova a papabiskegen iray lingkor to a manggawa ed linawa to.—Zacarias 4:6.
Mamapasya ed Panagtasi
17. Panon ya onkikiwas iray totoo nen Jehova ed saray salita nen Jesus nipaakar ed panangipulong na maong a balita?
17 Anggaman ngalngali 2,000 taon lay apalabas nanlapula’d imbaga nen Jesus a sayan maong a balita so nipulong, agkinmapuy so seseg na totoo na Dios parad kimey. Amta tayo a diad panagsungdo tayo ed panggawa na maabig, et ipapatnag tayoray kalidad nen Jehova, salanti say aro, panangasi, tan inkaanos. Singa sikato, agtayo labay a walay naderal noagta labay tayon magbabawi tan mipulangan iray totoo ed si Jehova. (2 Corinto 5:18-20; 2 Pedro 3:9) Lapud marlang ed espiritu na Dios, saray Tasi nen Jehova so maseseg a mantutultuloy a mangiyaabawag ed maong a balita anggad saray sampot na dalin. (Roma 12:11) Bilang resulta, saray totoo ed inerman a pasen so mangaawat ed katuaan tan ontutulok ed maaron panangiwanwan nen Jehova. Konsideraen so pigaran alimbawa.
18, 19. Antoran eksperiensya so nisalaysay yo nipaakar ed pigara a positibon kinmiwas ed maong a balita?
18 Si Charles so sakey a dumaralos ed mamasagur na Kenya. Nen 1998 et sikatoy nanlako na masulok ya 8,000 kilo na tabako tan akaawat na sertipiko ya anawag ed sikato bilang Sankamaongan a Tomatanem na Tabako. Diad satan a panaon, sikatoy ginmapon nanaral na Biblia. Ag-abayag et amoria to a say sakey a toon mibibiang ed panagtanem na tabako et manusumlang manaya ed ganggan nen Jesus ya aroen so kaparan too. (Mateo 22:39) Sanen atebek to a ‘say sankamaongan a tomatanem na tabako’ so diad tua manaya et ‘sankamaongan a managpatey,’ iniisprian nen Charles na samal so tanem toran tabako pian ompatey iratan. Sikatoy inmaligwas ed dedikasyon tan bautismo tan natan et sakey lan regular payunir tan ministeryal a lingkor.
19 Andi-duaruwan yeyegyegen nen Jehova iray nasyon panamegley na sankamundoan a panagtasi, tan ondadagsa iray pilpilaleken a bengatla, salanti, saray totoo. (Aggeo 2:7) Si Pedro, a taga-Portugal, so linmoob ed seminaryo sanen mantaon na 13. Labay toy magmaliw a misionaryo tan manbangat na Biblia. Balet, ag-abayag, tinaynan toy seminaryo lapud mataltalag a nibabangat so Biblia ed saray klase to. Kalabas na anem taon et sikatoy manaaral la na sikolohiya diad unibersidad na Lisbon. Sikatoy akiayam ed panginaen to, sakey ed saray Tasi nen Jehova, ya amaseseg ed sikaton manaral na Biblia. Diad saman a bekta, agsegurado si Pedro no kasin walay Dios, tan agmakapandesisyon no kasin manaral na Biblia odino andi. Intongtong to’d propesor to ed sikolohiya so nipaakar ed agto pakapandesisyon. Inkuan na propesor ya ibabangat na sikolohiya a saray totoon agmakapandesisyon et walay tendensia ran deraley inkasikaran dili. Diad satan, nandesisyon si Pedro a manaral na Biblia. Sikatoy abautismoan ed agano ni tan natan et mangikokondukta met la na saray panangiyaral na Biblia.
20. Akin a panggayagaan tayo a say panagtasi ed saray nasyones et malaknab lan nagagawaan?
20 Siansian agtayo amta no anggad anton laknab so gawaen a pantasi ed saray nasyones, tan agtayo amta so agew tan oras na isabi na anggaan. Say amta tayo lambengat et magano lan onsabi itan. Panggagayagaan tayo a say malaknab lan panangipulong ed maong a balita et sakey lambengat ed dakel a pakapatnagan ya asingger lay panaon a salatan na Panarian na Dios iray gobierno na too. (Daniel 2:44) Diad kada ilalabas na taon, minilyon so naiikdan na pankanawnawan onkiwas ed maong a balita, tan saya so mangiglogloria ed Dios tayo, si Jehova. Komon ta determinado itayon mansiansian matoor tan mantultuloy ya okupado ed kimey a panagtasi ed amin a nasyones a kaiba iray agagi tayo ed sankamundoan. Diad panggawa ed satan, nilaban tayoy inkasikatayo tan saramay ondengel ed sikatayo.—1 Timoteo 4:16.
Kasin Natandaan Yo?
• Akin a say Mateo 24:14 et makatantandan propesiya?
• Antoran sagpot so ginawa na saray inmunan Kristiano ed panagpulong, tan antoray resulta?
• Panon ya atalosan na saray Estudyante na Biblia so pankaukolan a pantasi ed amin a nasyones?
• Diad impangonsidera ed kimey na totoo nen Jehova ed apalabas a serbisyon taon, antoray akasagyatan yo?
[Tepetepet Parad Panagaral]
[Tsart ed pahina 27-30]
2005 SERBISYON TAON A REPORT NA SARAY TASI NEN JEHOVA ED SANKAMUNDOAN
(Nengnengen so tomo)
[Mapa/Saray litrato ed pahina 25]
Nambaroy si Pablo na nilibon kilometro ed ekat ontan met ed dayat pian ipulong so maong a balita
[Litrato ed pahina 24]
Inwanwan nen Jehova si Pedro a mantasi ed si Cornelio tan say pamilya to