Pinaliket Da so Kapusoan na Atateng Da

“ANAK ko, no say pusom makabat, say pusok manggayaga, anggan siak.” (Uliran 23:15) On, manggayaga odino manliket iray Kristianon atateng sano onggamor na maridios a kakabatan so ananak da. Nen Sabado, Setyembre 10, 2005, inmatendi so grupo na 6,859 a totoon nanlalapud nanduruman bansa diad impangraduar na koma-119 a klase na Watchtower Bible School of Gilead. Manleppua ed liket so kapusoan na amin, nagkalalo la ed saray ateng na 56 a nangraduar.

Si David Walker, ya abayag lan membro na pamilyan Bethel ed Estados Unidos, so angilukas ed programa panamegley na masimoon a pikakasi. Insan say tsirman a si David Splane, a membro na Mananguley ya Ulop na saray Tasi nen Jehova, so angigapo ed programa na impangraduar diad impangibaga to ed saray kaamaan tan kainaan: “Sikayoy makanepegan na masimoon a komendasyon mi. Saray kalidad ya impurek yo ed ananak yo a lalaki tan bibii so amakiwas ed sikaran manlingkor bilang misionaryo.” Saratan ya atateng et nayarin manpapaga, lapud saray anak da et magano lan ibaki diad ararawin asainmin da. Balet, oniay impaseguro ed sikara nen Brother Splane: “Agkayo mapaga ed saray anak yo. Sikara so nayarian nen Jehova ya asikasoen a nagkalalo nen say nagawaan yo.” Insan inkuan to: “Nonot yo so kaabigan a nagawaan na ananak yo. Saray totoon maniirap tan nadidismaya so makagamor la na tuan ligliwa ed unonan pankanawnawa diad bilay da.”

No Panon a Nitultuloy so Pamaliket ed Arum

Imparungtal na tsirman so apatiran espiker, a saray makapaseseg a paliwawa ra so amabiskeg ed determinasyon na saray nangraduar a magmaliw a matalonan misionaryo. Si Ralph Walls, a membro na Komite na Sanga ed Estados Unidos so angipaliwawa ed teman “Pansiansiaen Yon Akalukas so Kamataan Yo.” Indanet to a mas lalon grabe so pakabulag ed espiritual nen say literal a pakabulag. Say kongregasyon ed Laodicea nen inmunan-siglo so abulag ed espiritual. Diad satan a kongregasyon et atulongan iray Kristianon abulag ed espiritual, balet ta nagkalalon maabig no napaliisan la so ontan a pakabulag, a pansiansiaen ya akalukas so espiritual a kamataan tayo. (Apocalipsis 3:14-18) Oniay inkuan na espiker: “Pansiansiaen yon akalukas so mata yo, tan nengnengen iray responsablin lalaki a singa ed pakanengneng nen Jehova ed sikara.” Nepeg ya ag-alabas a manpaga iray mangraduar no walaray problema diad kongregasyon. Unong ed Apocalipsis kapitulo 2 tan 3, amin na saratan a problema et amta na Katawan a Jesu-Kristo. Seguroen to a naresolbe iratan diad dugan panaon.

Kayari to, si Samuel Herd, a membro na Mananguley ya Ulop, so angebat ed tepet a “Kasin Akaparaan Kayo?” No panon a say sakey a managbaroy et mangawit na saray kawes a nakaukolan to, saray nangraduar so nepeg met a lawas mangisulong na saray kalidad na balon personalidad. Nepeg a nawalaan ira na panangabagey a singa ed si Jesus. Sanen imbaga ed sikato na akating a: “No labay mo, nayarian mo ak a linisan,” inkuan nen Jesus: “Labay ko. Nalinisan ka komon.” (Marcos 1:40-42) Insan oniay inkuan na espiker: “No talagan labay yo a tulongan so totoo, mananap kayo na paraan pian nagawaan yo itan.” Asalambit met diad sayan paliwawa a saray grado na estudyante so mamaneknek a mautek ira. Balet nepeg a magmaliw a mapaabeba so kapusoan da. Ibabaga na Filipos 2:3 ed saray Kristiano a nepeg dan ipasen a say ‘arum et magmaong.’ Oniay inkuan nen Brother Herd: “Say mapaabeban puso et mas importante nen say pakawalaan na kakabatan. Saramay nakakatongtong yo ed ministeryo tan saray  agagi yo diad kongregasyon so nagunggonaan labat ed kakabatan yo no mapaabeba kayo.” Sinampotan to itan diad impangibaga to a no saray nangraduar et lawas dan kakawesan so inkasikara na Makristianon aro, akaparaan la ra ya onla ed saray asainmin da tan seguradon ontalona ira.​—Colosas 3:14.

Si Mark Noumair, sakey ed saray instruktor ed Gilead, so amalesa na panilaloan diad paliwawa ton, “Kasin Pansiansiaen Yo Itan?” Say salitan “itan” et manutukoy ed pisasalamat tayo ed kamaongan nen Jehova. Oniay ibabaga na Salmo 103:2: “Galangen mo si Jehova, O kamarerwak, tan agmo lingwanan so amin na saray ipanabang to.” Diad kalawakan et ag-impatnag na saray Israelita so pisasalamat parad mana a nansustini ed sikara, a tinawag da ni ingen itan a makapagulgula odino “anlemew a tinapay.” (Numeros 21:5) Ag-anguman so kablian na mana diad inlabas na panaon, balet ta naandi so apresasyon da parad satan. Oniay inkuan na instruktor: “No lingwanan yo iray ginawgawa nen Jehova tan abuloyan yon magmaliw ya ordinaryo lambengat so panlilingkor yo diad arum a bansa, mangapekta itan ed panmoria yo ed kimey ya inter nen Jehova ed sikayo.” Ibabaga na Salmo 103:4 a si Jehova et “balangetan to [kayo] na maaro ya abig na linawa.” Saray nangraduar so makaeksperiensya ed abig na linawa na Dios diad saray balon kongregasyon da. Oniay inkuan nen Brother Noumair: “No abuloyan yo iray agagi yo, sikaray mangibangat ed sikayo na panangaro tan pananisia a mansiansia ed legay bilay. Dengelen yo ira tekep na maapresyan puso.”

Say sananey nin instruktor ed Gilead, a si Lawrence Bowen, so angipaliwawa ed teman “Kasin Nalimbos Kayo?” Sinaglawi to so sakey a lumalangoy ya, anggaman pukol iray sali to, sikato so akapawala na sankaabigan a rekord na panagsungdo diad andi-tundan impanlangoy to ed loob na pigaran agew. Sikatoy maseet a nampasal tan inteen toy imano to ed kalat to. Mipadpara, saray kabiangan ed koma-119 klase na Gilead so maseet a nampasal pian ontalona ira bilang misionaryo. Balet natan et kaukolan day mansiansian maapit ed si Jehova tan ed kimey ya impabtang to ed sikara. Tinukoy nen Brother Bowen so Apocalipsis 14:1-4, a ditan et adeskribe iray 144,000 bilang ‘manumtumbok ed Kordero ed anggan iner a laen to.’ Amin ed satan a grupo so mansiasiansian matoor ed si Jehova tan ed Anak to antokaman iray subok ed sikara, tan nadadampot da so kalat da. “Antokaman so nagawa, sikatayo met so mansiansian matoor ed si Jehova tan ed kimey ya impabtang to ed sikatayo,” so inkuan na espiker. Diad panggawa ra ed satan, saray nangraduar ed koma-119 a klase et ‘nalimbos’ na panamendisyon nen Jehova.​—Deuteronomio 28:2.

Sikaray Manbubunga Diad Panlilingkor Da

Diad kada sampot-simba legan iran manaaral, akibiang iray estudyante diad lawak na ministeryo. Si Wallace Liverance, say registrar na eskuelaan, so akitongtong ed sikara legan na programa tan apaneknekan a tinmalona ira. Impulong da so maong a balita diad ag-onkulang a samploran lenguahe tan akapangigapo ira na pigaran progresibon panangiyaral na Biblia. Walay sanasawa diad klase ya akapangigapo na panangiyaral na Biblia ed sakey a malangwer nin Tsino. Kayari na mikaduan imbisita ra, sikatoy tinepetan da no antoy liknaan to ed pakakagamor toy kakabatan nipaakar ed si Jehova. Binukay toy Biblia to tan impabasa to ed sikara so Juan 17:3. Moriaen to a sikatoy wala la ed dalan a mamaarap ed bilay.

Kayari na satan, si Anthony Morris, a membro na Mananguley ya Ulop, so anginterbio na taloran agagi a manlilingkor ed Komite na Sanga ed Côte d’Ivoire, Dominican Republic, tan Ecuador. Pinaseguroan na sarayan agagi iray nangraduar a tatalaranan la na saray Komite na Sanga so isabi ra tan tulongan da iran makaadapta ed saray asainmin da.

Sinmublay si Leonard Pearson, membro na pamilyan Bethel ed Estados Unidos, ya akitongtong ed taloran membro na Komite na Sanga, a nanlapud Democratic Republic of the Congo, Papua New Guinea, tan Uganda. Pinaseseg na sarayan agagi iray nangraduar a sigpot iran mibiang diad lawak na ministeryo. Walay sanasawan misionaryo a masulok da lan 21 a taon diad Congo tan 60 lan totoo so atulongan dan mangidedika tan nampabautismo. Satan a sanasawa et walaan natan na 30 ya iyaaralan ed Biblia, tan 22 ed saratan so onaatendi la ed saray pantitipon na kongregasyon. Lapud ontan a baleg a panagani ed espiritual, natan la so alay abig a panaon pian manlingkor bilang misionaryo.

Mantasi Tekep na Espiritu na Inkaganatan

Si Gerrit Lösch, a membro na Mananguley ya Ulop, so unor a nampaliwawa. Say tema to et “Itongtong so Nipaakar ed Dios tan Mantasi ed si Jesus Diad Agew na Katawan.” Saray salitan “tasi,” “saray tasi,” tan “panagtasi” so 19 a danay a nausar diad libro na Apocalipsis. Kanian, malinlinew ya impabitar nen Jehova so kimey a pagagawa to ed totoo to. Kapigan itayo mantasi unong a nipabitar ed Apocalipsis? Insulat nen Juan a legan na “agew na Katawan.” (Apocalipsis 1:9, 10) Satan ya agew a ginmapo nen 1914, so mantutultuloy ed panaon tayo, tan angga ni ed arapen. Unong ed Apocalipsis 14:6, 7, say kimey a pitotongtong nipaakar ed Dios tan say panangipakabat a “say oras na pangukom to sinmabi la” et susuportaan na saray anghel. Ipapabitar na Apocalipsis 22:17 a say panangidirehi  ed kimey a panagtasi ed si Jesus et nimatalek ed saray nakdaan na alanaan a Kristiano. Balet, amin tayo so nepeg a manganamot ed satan a pribilehyo natan. Unong a nikurit ed bersikulo 20, si Jesus so mansasalita: “Onla ak dian magano.” Insan oniay insimbawa nen Brother Lösch ed amin ya inmatendi: “Ibando yo ed totoo, ‘Dago kayo, alaen yo so danum na bilay ya andi-bayar.’ Magano lan onla dia si Jesus. Kasin akaparaan itayo?”

Bilang konklusyon, imbaga na tsirman ed saray nangraduar ya agmanbayag et sikara lay mangisulat ed saray salita na katuaan diad mabilay iran kapusoan: “Diad Gilead et naikdan kayo na saray kagawaan a panagsulat. Manatalaran la ed sikayo iray maawat a kapusoan. Mantultuloy kayo ed kimey yo, tan si Jehova so mapalabon mamendisyon ed sikayo.” Diad kaunoran, si Fred Rusk, ya akapanlingkor bilang instruktor ed Gilead School ed loob na 11 a taon, so angisara ed programa panamegley na pikakasi na pisasalamat ed si Jehova ya anenyeg ed kapusoan na amin ya inmatendi. Satan so matukotukoy a panampot ed agew, a nagmaliw a makapalikliket ya okasyon.

[Kahon ed pahina 13]

SARAY ESTADISTIKA NA KLASE

Bilang na bansan inrepresenta: 10

Bilang na bansan angiyasainan: 25

Bilang na estudyante: 56

Promedyon edad: 32.5

Promedyon taon ed katuaan: 16.4

Promedyon taon ed sigpot-panaon a ministeryo: 12.1

[Litrato ed pahina 15]

Koma-119 a Klase a Nangraduar ed Watchtower Bible School of Gilead

Diad listaan ed leksab, saray dasig so anumeroan manlapud arap a pasener, tan saray ngaran so akalista manlapud kawigi a manpakawanan ed kada dasig.

(1) Helgesen, S.; Daugaard, H.; Pierluissi, A.; Joseph, I.; Racanelli, C. (2) Byrge, T.; Butler, D.; Freedlun, J.; Nuñez, K.; Pavageau, C.; Doumen, T. (3) Camacho, O.; Lindqvist, L.; Broomer, A.; Wessels, E.; Burton, J.; Woodhouse, O.; Doumen, A. (4) Tirion, A.; Connally, L.; Fournier, C.; Gil, A.; Johnsson, K.; Hamilton, L. (5) Byrd, D.; Scribner, I.; Camacho, B.; Laschinski, H.; Hallahan, M.; Libuda, O. (6) Joseph, A.; Lindqvist, M.; Helgesen, C.; Nuñez, D.; Scribner, S.; Fournier, J. (7) Pierluissi, F.; Pavageau, T.; Broomer, C.; Racanelli, P.; Butler, T.; Woodhouse, M.; Libuda, J. (8) Laschinski, M.; Freedlun, S.; Burton, I.; Tirion, M.; Byrd, M.; Byrge, J. (9) Wessels, T.; Hallahan, D.; Connally, S.; Gil, D.; Daugaard, P.; Hamilton, S.; Johnsson, T.