“Ombabaleg so Panaaroan Yo”

NANTUTUMBOKAN a kalamidad so agawa ed Hapon nen 2004​—saray bagyo, delap, tan yegyeg. Saratan so angapektan maong ed bilay na dakel a totoo, pati saray Tasi nen Jehova. (Eclesiastes 9:11) Anggaman ontan, saratan a kairapan so amawala na saray pankanawnawa ed saray Tasi a mangipatnag na inaagin panangaro ra ed balang sakey.​—1 Pedro 1:22.

Alimbawa, lapud pirmin nepnep nen Hulyo, linmepwa so sakey ya ilog ed sentral a Hapon. Dineral na delap so masulok a 20 kaabungan na saray Tasi nen Jehova. Sakey a Kingdom Hall diman so alooban na danum a manga sakey metro ed kaatagey manlapud datal. Tampol a tinmulong iray Tasi manlapud kabangibang iran kongregasyon. Nilasus a boluntaryo so nanlinis ed saray kaabungan a napnoy pitek. Alinisan a maong so Kingdom Hall tan naapiger itan diad loob na duay simba lambengat.

Nen Oktubre 23, sakey a yegyeg a walaan na kakasil a 6.8 ed Richter scale so agawa lamet ed saman a lugar. Manga 40 a totoo so inatey, tan masulok a 100,000 a totoo so kinaukolan ya onalis manlapud kaabungan da. Anggapo so danum, gas, tan koryenti. Anggaman say pinagkasentro na yegyeg et 50 kilometro labat ed kaarawi, ag-aderal so kapkapangapiger a Kingdom Hall. Satan so nagmaliw a temporaryon relief center. Tampol ya inanap na saray Kristianon manangasikaso iray kapanisiaan da pian naseguro ra ya anggapo so arisgo, tan nainawaan ira lapud anggapo so asakitan odino inatey. Diad kaimbuasan, anemiran Tasi a naapektaan na delap nen Hulyo so magunaet a namboluntaryo pian mangitulor na kakanen tan danum ed apektadon lugar. Pigaran oras labat kayari na yegyeg, sinmabin tampol so tulong.

“Impasen na saramay abiktima na delap a say kimey ya itutulong ed saramay naapektaan na yegyeg et sakey a pankanawnawa pian nipatnag so apresasyon da ed tulong a naawat da nensaman,” so inkuan na sakey a manangasikaso. “Impasya so impankimey da manlapud kabkabuasan anggad lablabi la. Balet, maligliga so lupa ra ed liket!”

Agnaapektoan na delap odino yegyeg so aroan a mamebedber ed Kristianon impanaagi na saray Tasi nen Jehova. Diad pidumaan, sano onsabi iratan a kalamidad et naeeksperiensya na saray Kristiano so imbaga nen apostol Pablo ed saray kapanisiaan to ed Tesalonica: “Ombabaleg so panaaroan yo.”​—2 Tesalonica 1:3, Maung a Balita.