Si Jehova so Pastol Tayo

“Si Jehova so managpastol ed siak; agak naani onkulang.”​—SALMO 23:1.

1-3. Akin ya agpankelawan ya inkompara nen David si Jehova diad sakey a managpastol?

 SANO paideskribe ed sikayo so paraan na panangasikaso nen Jehova ed totoo to, anto so nibaga yo? Anto so napangikomparaan yo a mangideskribe ed matamoy a panangasikaso to ed saray matoor a lingkor to? Masulok a 3,000 a taon lay apalabas, insulat na salmistan ari a si David so alay dakep a panangideskribe ed si Jehova, a niyaliling ed kimey nen David diad akadkaunan parte na bilay to.

² Sanen tobonbalo si David, sikato so sakey a managpastol, kanian amta to no panon ya asikasoen iray karnero. Kabisado to a saray karnero et mainomay a nabalang tan nabiktima na saray matakew odino atap ya ayayep no ag-iratan naasikaso. (1 Samuel 17:34-36) No anggapo so maasikason managpastol, nayarin agda naromog so pankabkaban da. Diad unor laran taon nen David, maseguron panliketan ton nanonotan so dakel a panaon ya inusar to ed impangiwanwan, impanalimbeng, tan impamakan ed saray karnero.

³ Agpankelawan no akin a say kimey na managpastol so anonotan nen David sanen sikatoy apuyanan a mangideskribe ed panangasikaso nen Jehova ed totoo to. Say koma-23 a Salmo, ya insulat nen David, so ginmapo ed sarayan salita: “Si Jehova so managpastol ed siak; agak naani onkulang.” Konsideraen tayo no akin a matukoy itan a balikas. Insan, diad Salmo 23 et naimano tayo iray paraan a pangaasikaso nen Jehova ed saray mandadayew ed sikato a singa ed pangaasikaso na sakey a managpastol ed saray karnero to.​—1 Pedro 2:25.

Matukoy a Panangikompara

4, 5. Panon so panedeskribe na Biblia ed saray awawey na karnero?

⁴ Dakel so titulo nen Jehova diad Kasulatan, balet ta say titulon ‘Pastol’ so sankamatamoyan a pananawag ed sikato. (Salmo 80:1) Pian natalosan tayon maong no akin a si Jehova et matukoy a tinawag a Pastol, nakaukolan tayon naamtaan so duaran punto: unona, say awawey na karnero tan say komadua, saray kimey tan kalidad na sakey a maong a pastol.

⁵ Mabetbet a saglawien na Biblia iray awawey na karnero, a dedeskribien iratan a mainomay ya onkiwas ed maaron panangomponi na managpastol (2 Samuel 12:3), aliwa iran masebeg (Isaias 53:7), tan ag-ira makadepensa. (Miqueas 5:8) Oniay inkuan na sakey a managsulat a nankomponi na karnero ed loob na dakel a taon: “‘Talagan agniyagel na saray karnero so inkasikara’ a singa pangipapasen na arum. Nakaukolan da so tuloytuloy a panangimano tan maalwar a panangasikaso nen  say arum niran klase na ayayep.” Pian nabilay ira, sarayan andiay-depensan pinalsa so mankaukolan na sakey a maasikason managpastol.​—Ezequiel 34:5.

6. Panon ya impaliwawa na sakey a diksionaryo na Biblia so ordinaryon sanagew ed bilay na sakey a managpastol nensaman?

⁶ Anto so kipapasen na ordinaryon sanagew parad sakey a managpastol nensaman? Oniay impaliwawa na sakey a diksionaryo na Biblia: “Kabkabuasan ni labat et ipaway to la iray pulok to manlapud pukokan, tan sikato so tumboken da anggad pangipastolan ed sikara. Ditan et sanagew to iran bantayan, ya imanoen ton anggapo so nabalang a karnero, tan no wala man bilang so agto naimano tan akaarawi itan manlapud pulok, panseetan ton anapen itan anggad naromog to insan to ipawil. . . . Diad labi et isempet to so pulok tan ipukok to ira, a bilangen to ira panamegley na baston to legan ya onloloob ira ed puerta pian naseguro to ya anggapo so abalang. . . . Mabetbet et kaukolan ton bantayan a sanlabi so pulok manlapud panangataki na saray atap ya ayep, odino ed kasiliban na dukotdukot a managtakew.” *

7. Akin a no maminsan et say managpastol so nakaukolan a mangipatnag na magenap nin panag-anos tan inkamatamoy?

⁷ Walaray panaon sano say karnero, nagkalalo la ed malukon ya inan-karnero tan say kilaw to, so mankaukolan na magenap nin panag-anos tan matamoy a panangasikaso. (Genesis 33:13) Oniay inkuan na sakey a reperensya na Biblia: “Say kianak na kilaw ed sakey a pulok so mabetbet a nagagawa diad abay na palandey. Say managpastol so alerton manbantay ed inan-karnero legan na saray panaon a makapkapuy tan bakloyen na managpastol so kordero tan awiten to itan ed pulok. Diad loob na pigaran agew, anggad agni makaakar itan, satan so alsaen to odino ekeman to diad saray saloy na kolibemben to.” (Isaias 40:10, 11) Mapatnag a nakaukolan na sakey a maong a managpastol so mabiskeg ingen ta matamoy iran kalidad.

8. Antoran rason so indalatdat nen David no akin a sikatoy walaan na kompiyansa ed si Jehova?

⁸ “Si Jehova so managpastol ed siak”​—agta satan so matukoy a deskripsion ed mangatatawen ya Ama tayo? Legan tayon uusisaen so Salmo 23, naimano tayo no panon so pangaasikaso ed sikatayo na Dios tekep na biskeg tan inkamatamoy na sakey a managpastol. Diad bersikulo 1, imbalikas nen David so kompiyansa to ya itarya na Dios so amin a nakaukolan na karnero To ta pian ‘anggapo so pankulangan’ da. Diad saray tinmumbok a bersikulo, indalatdat nen David so taloran rason no akin a sikatoy walaan na ontan a kompiyansa: Si Jehova so mangiwawanwan, manasalimbeng, tan manatagano ed karnero To. Sansakey tayon singbaten itan.

“Ibasbas To Ak”

9. Anton mareen a kipapasen so deneskribe nen David, tan panon a niwala ed ontan a kipapasen iray karnero?

⁹ Unona, ibabasbas odino iwawanwan nen Jehova so totoo to. Oniay insulat nen David: “Parukolen to ak ed malambot ira a pastolan: itonton to ak ed abay na saray mareen a danudanum. Pasimbaloen to so kamarerwak; ibasbas to ak ed saray pulpulong na inkatunong ed panamegley na ngaran to.” (Salmo 23:2, 3) Sakey a pulok a mareen ya akarukol ed mabunan pastolan​—ontan so impaneskribe nen David ed kipapasen a walay inkapnek, pakarepreskoan, tan seguridad. Say Hebreon salita ya impatalos a “pastolan” so mankabaliksan na “marakep a pasen.” Saray mismon karnero so maseguron agmakaromog na lugar a mareen a dukolan da. Sikara so nepeg ya iwanwan na managpastol ed ontan a “marakep a pasen.”

10. Panon ya ipapatnag na Dios so panagmatalek to ed sikatayo?

¹⁰ Panon so pangiwawanwan nen Jehova ed sikatayo natan? Sakey lan paraan et diad panamegley na ehemplo to. Papasesegen itayo na Salita to ya ‘aligen so Dios.’ (Efeso 5:1) Say konteksto na saratan a salita so manutukoy ed panangabagey, panamerdona, tan aro. (Efeso 4:32; 5:2) Maseguron impatnag nen Jehova so sankaabigan ya alimbawa diad pangipapanengneng to ed ontan iran alay abig a kalidad. Kasin sikatoy aliwan realistiko ed kerew ton sikatoy aligen tayo? Andi. Diad tua et satan  ya apuyanan a simbawa so alay abig a panangipatnag na panagmatalek to ed sikatayo. Diad anton paraan? Sikatayo so apalsa unong ed indengan na Dios, a mankabaliksan a sikatayo et apalangkapan na moral iran kalidad tan say pakasarag a bayuboan so espiritualidad. (Genesis 1:26) Kanian, amta nen Jehova ya anggaman ag-itayo ayadyari, sarag tayon bayuboan so ontan met iran kalidad ya ipapatnag to. Isipen pa​—say maaron Dios tayo so matalek a sikato so naalig tayo. No aligen tayo so alimbawa to, sikatayo so iwanwan to, a singa panangibaga, a mamaarap diad marakep, ‘mareen a pasen.’ Diad sayan marawal a mundo, sikatayo so ‘manayam ed andi-kaatapan,’ a naeksperiensya tayo so deen lapud amta tayon walay panangabobon na Dios ed sikatayo.​—Salmo 4:8; 29:11.

11. Diad pangiwawanwan to ed saray karnero to, anto so nonodnonoten nen Jehova, tan panon itan a napatnagan ed kekerewen to ed sikatayo?

¹¹ Diad pangiwawanwan to ed sikatayo, si Jehova so matamoy tan maanos. Nononoten na managpastol iray agnagawaan na karnero to, kanian iwawanwan to ira “unong na anggaay nayarian na saray ayayep.” (Genesis 33:14, Maung a Balita) Mipadpara, iwawanwan nen Jehova iray karnero to “unong na anggaay nayarian” da. Nononoten to iray abilidad tan kipapasen da. Sikato so onaadapta ed anggaay nayarian da, ya agton balot kekerewen so agda niiter. Say kekerewen to et magmaliw itayon interon-kamarerwa. (Colosas 3:23) Balet panon to no tinmakken kayo la tan agyo la nagawaan imay datin gagawaen yo? Odino limitado lay nagawaan yo lapud graben sakit? Diad ontan a kipapasen et napatnagan so karakpan na pankaukolan ed pagmaliw tayon interon-kamarerwa. Anggapo so duaran too ya eksakton mankapareho. Say interon-kamarerwan panaglingkor so mankabaliksan na pangusar ed amin a biskeg tan kasil yo anggad nayarian yo diad panaglingkor ed Dios. Anggaman ed saray kakabosan a nayarin mangaapekta ed kakukurang tayo, papablien nen Jehova so interon-puson panagdayew tayo.​—Marcos 12:29, 30.

12. Anton alimbawa ed Mosaikon Ganggan so mangiyiilustra ya iwawanwan nen Jehova iray karnero to ‘unong ed anggaay nayarian da’?

¹² Pian niyilustra ya iwawanwan nen Jehova iray karnero to ‘unong ed anggaay nayarian da,’ isipen pa so nibaga nipaakar ed pigaran apay parad kasalanan a nidatak ed Mosaikon Ganggan. Kaliktan nen Jehova iray maabig ya apay ya insaklang unong ed maliket a puso. Ontan met, saray apay so akadepende ed pakasarag na mangiyaapay. Inkuan na Ganggan: “No [sikatoy] agmakasarag . . . a mamawala na sakey a karnero a kilaw, mangiyakar ed satan na . . . duaran palekpek, odino duaran sibong a malapati.” Tan no agto ni nasarag so anggan say duaran malapati? Nayarian toy mangiyapay na “pino a tapong.” (Levitico 5:7, 11) Ipapatnag na saya ya agkekerewen na Dios so bengatlan agnasarag na mangiyaapay. Lapud agmanguuman so Dios, naligliwa itayo ed pakaamtan agton balot kerewen ed sikatayo so agtayo nayarian; imbes, panliketan ton awaten so nayarian tayon iter. (Malaquias 3:6) Agaylan makapaliket so paiwanwan ed ontan a makatalos a Pastol!

‘Agak la Ontakot ed Mauges, Ta Sika Wala Ka ya Ibak’

13. Diad Salmo 23:4, panon so maapit ya impansalita nen David, tan akin ya agla itan pankelawan?

¹³ Impabitar nen David so komaduan rason na panmamatalek to: Sasalimbengan nen Jehova so  karnero To. Oniay nabasa tayo: “Anggan manakar ak ed lawak na anino na patey, agak la ontakot ed mauges: ta sika wala ka ya ibak; say baras tan say tayukor mo ligliwaen da ak.” (Salmo 23:4) Nagkalalon maapit so impansalita dia nen David, a tinawag to si Jehova a “sika.” Ag-itan pankelawan lapud sinaglawi nen David so impanulong na Dios ed sikato pian makapansungdo ed kairapan. Adalan la nen David so dakel iran ambilunget a lawak sanen niiyan ed peligro so mismon bilay to. Balet agto inabuloyan a sikatoy natalonaan na takot lapud alikna ton kaiba to so Dios, a sankabembenan To so “baras” tan “tayukor” To. Lapud amta nen David a walay pananalimbeng na Dios, sikatoy aligliwa tan lalon apaapit ed si Jehova. *

14. Anto so panamaseguro ed sikatayo na Biblia nipaakar ed pananalimbeng nen Jehova, balet anto so agkabaliksan na satan?

¹⁴ Panon so panasalimbeng nen Jehova ed saray karnero to natan? Ipapaseguro ed sikatayo na Biblia ya anggapon balot so onsusumpa​—demonyo man odino too​—ya ontalonan mamagit ed saray karnero to manlapud dalin. Satan so agbalot abuloyan nen Jehova. (Isaias 54:17; 2 Pedro 2:9) Balet, ag-itan mankabaliksan a salimbengan itayo na Pastol tayo manlapud amin a desyang. Naeeksperiensya tayo iray subok a kaslakan a nagagawa ed totoo, tan nipapaarap itayo ed isusumpa a nagagawa ed amin a tuan Kristiano. (2 Timoteo 3:12; Santiago 1:2) Walaray panaon a singano ‘manaakar itayo ed lawak na anino na patey.’ Alimbawa, nayarin dawdawit itayon inatey lapud panamasegsegang odino sakit. Odino nayarin walay pinabli tayo ed bilay a dawdawit odino nidunget ed ipapatey. Legan na saratan ya ompatnag ya ambilunget a panaon, say Pastol tayo so walad sikatayo, tan salimbengan to itayo. Panon?

15, 16. (a) Diad antoran paraan so panutulong nen Jehova ed sikatayo pian naarap tayo iray babeng a kidudungetan tayo? (b) Isalaysay pa so eksperiensya a mangipapatnag ed panutulong nen Jehova ed sikatayo diad panaon na subok.

¹⁵ Ag-isisipan nen Jehova so mamilagron isalet to. * Balet makaseguro tayo ed saya: Sikatayo so tulongan nen Jehova a makatalona ed antokaman iran babeng a kipaarapan tayo. Iter to ed sikatayo so kakabatan pian natalonaan so “nambabangil a katuksoan.” (Santiago 1:2-5) Uusaren na sakey a managpastol so baston odino tayukor to pian matamoy ton ipaarap iray karnero to diad dugan direksion, ya agto lambengat itan uusaren a pan-ablog ed saray managsimaw. Sikatayo so ‘matamoy met ya ipaarap’ nen Jehova, diad panamegley na sakey a kapananisiaan, pian iyaplika so nibase ed Biblia a simbawa a makapanguman ed kipapasen tayo. Niarum ni, iter nen Jehova ed sikatayo so biskeg pian makapansungdo itayo. (Filipos 4:13) Panamegley na masanton espiritu to, kinlongan to itayo na “sankatageyan ya inkabaleg na pakayari.” (2 Corinto 4:7) Ontulong ed sikatayo so espiritu na Dios pian nasungdoan so antokaman a subok nen Satanas ed sikatayo. (1 Corinto 10:13) Agta makaligliwan naamtaan ya akaparaan lawas si Jehova ya ontulong ed sikatayo?

¹⁶ On, anggan panon lay kabilunget na lawak a dalanen tayo, agtayo bukbukor so manakar ditan. Kaiba tayo so Pastol tayo, a tulongan to itayo diad saray paraan ya agtayo sigpot a natebek ed gapo. Konsideraen pa so eksperiensya na sakey a Kristianon matatken ya adiskobre a walaan na makapatey a tumor ed utek. “Aksobien ko a diad gapo et ninonot ko a manpapasnok si Jehova ed siak odino no kasin aaroen to ak ni. Balet determinado ak ya ag-onarawi ed si Jehova. Imbes, imbesngaw ko ed sikato iray kapagaan ko. Tan tinulongan ak nen Jehova, a mabetbet to ak a liligliwaen panamegley na saray agagik. Dakel so anginabang na makatulong iran simbawa a base ed eksperiensya ra nipaakar ed no panon dan tinalonaan so graben sakit. Say asimbang iran komento ra so angipanonot ed siak ya aliwan nikadkaduma so sasagmaken ko. Say praktikal a suporta ra, pati say mapangasin itutulong da, so angipaseguro ed siak ya agmanpapasnok ed siak si Jehova. Siempre, nepeg kon pipuligesgesan so sakit ko, tan agko amta no anto so pansumpalan. Balet ta kombinsido ak a kaibak si Jehova tan itultuloy to ak a tulongan a makatalona ed sayan subok.”

 “Sika Itadiaan Mo Ak na Sakey a Pananganan a Dungoan Ko”

17. Panon so impaneskribe nen David ed si Jehova diad Salmo 23:5, tan akin ya ag-iya misumlangan ed ilustrasyon nipaakar ed managpastol?

¹⁷ Sinalambit nen David so komatlon rason na panmamatalek to ed Pastol to: Tataganoen nen Jehova iray karnero to, tan gagawaen to itan diad daakan a paraan. Oniay insulat nen David: “Sika itadiaan moak na sakey a pananganan a dungoan ko ed arapan na saray manamusol ed siak: sika pinuyokan mo so ulok na larak: say kopak manlepwas.” (Salmo 23:5) Diad sayan bersikulo, deneskribe nen David so Pastol to bilang mabunlok a managsankaili a mangitatarya na daakan a tagano tan inumen. Agmansumlangan iyan duaran ilustrasyon​—say maasikason managpastol tan mabunlok a managsankaili. On, say maong a managpastol so nepeg a makaamta no iner so mabunan pampastolan tan magenap a pamainuman pian “anggapoy kulang” na pulok to.​—Salmo 23:1, 2.

18. Anto so mangipatnag a si Jehova et mabunlok a managsankaili?

¹⁸ Kasin say Pastol tayo et sakey met a mabunlok a managsankaili? Ag-itan panduaruwaan! Isipen pa so kalidad, karakel, tan pandurumaan na espiritual a tagano a panggagayagaan tayo. Diad panamegley na matoor tan makabat ya aripen a klase, itatarya nen Jehova ed sikatayo so makatulong iran publikasyon tan makaibangat iran programa ed pantitipon, asamblea, tan kombension​—ya amin na saratan so mamepenek ed espiritual iran pankaukolan tayo. (Mateo 24:45-47) Seguradon ag-onkulang so espiritual a tagano. Say “matoor tan makabat ya aripen” so amawala la na minilyon a Biblia tan saray katulongan ed panagaral na Biblia, tan saratan a publikasyon so wala la natan ed 413 a lenguahe. Itatarya nen Jehova iyan daakan ya espiritual a tagano​—manlapud “gatas,” saray manunan bangat na Biblia, anggad “anawet a tagano,” saray araralem ya impormasyon ed espiritual. (Hebreos 5:11-14) Bilang resulta, sano nidunget itayo ed saray problema odino dedesisyonan, kaslakan et naromog tayo no anto so nakaukolan tayo. Anto lay pansumpalan tayo no anggapo iratan ya espiritual a tagano? Say Pastol tayo so peteg a sankamabunlokan a manangitarya!​—Isaias 25:6; 65:13.

“Manayam ak ed Abung nen Jehova”

19, 20. (a) Diad Salmo 23:6, anton kompiyansa so imbalikas nen David, tan panon itayon nawalaan met na ontan a kompiyansa? (b) Anto so singbaten ed ontumbok ya artikulo?

¹⁹ Kayarin minolimoli nen David iray paraan na Pastol tan Manangitarya to, oniay inkuan to: “Andi-saew a say kaabigan tan say panangasi ontumbok ira ed amin ya agew na bilay ko: tan manayam ak ed abung nen Jehova ed ando lan ando.” (Salmo 23:6) Say imbalikas nen David et manlalapud puso a napno na pisasalamat tan pananisia​—pisasalamat ed pakanodnonot ed apalabas tan pananisia diad paniilalo ed arapen. Sayan datin managpastol so maligen, ta amta to a no sikatoy mansiansian maapit ed mangatatawen a Pastol to, a singano manaayam ed abung To, sikato so lawas maaron asikasoen nen Jehova.

²⁰ Agaylay pisasalamat tayo lapud alay abig iran salita a nikurit ed koma-23 a Salmo! Anggapo lay naromog nen David a mas matukoy a mangideskribe ed no panon so pangiwawanwan, panasalimbeng, tan panatagano nen Jehova ed saray karnero to. Nikurit so maligsan balikas nen David pian nawalaan itayo na kompiyansa a sikatayoy makapanilalo met ed si Jehova bilang Pastol tayo. On, no mansiansia itayon maapit ed si Jehova, asikasoen to itayo bilang maaron Pastol tayo ed “ando lan ando,” salanti, diad andi-anggaan. Balet, bilang karnero to, walaan itayo na responsabilidad a mankurang a kaiba so baleg a Pastol tayo, si Jehova. Say lalanoren na satan so singbaten ed ontumbok ya artikulo.

[Saray paimano ed leksab]

Kasin Nanonotan Yo?

• Akin a si Jehova et matukoy ya inkompara nen David ed sakey a managpastol?

• Panon so pangiwawanwan nen Jehova ed sikatayo tekep na pakatalos?

• Diad antoran paraan so panutulong nen Jehova ed sikatayo pian nasungdoan iray subok?

• Anto so mangipatnag a si Jehova et mabunlok a managsankaili?

[Tepetepet Parad Panagaral]

[Litrato ed pahina 18]

Singa say managpastol ed Israel, iwawanwan nen Jehova iray karnero To