Say Dondon so Mangitatandoro ed Inkatunong na Dios

KAYARI na impanrebelde nen Adan tan Eva, indatak nen Jehova so gagala to a mamawala na sakey a Bini a nasugat ed mukor. (Genesis 3:15) Asumpal iya sanen si Jesu-Kristo so impapatey na kakabusol na Dios diad panamairapan a kiew. (Galacia 3:13, 16) Andian na kasalanan si Jesus lapud sikatoy mamilagron inlukon ed panag-anakan na sakey a birhen diad pakapanyari na masanton espiritu. Kanian, say nipaagus a dala to et kinmanan bayar ed dondon a mangibulos ed totoo ya akatawir na kasalanan tan ipapatey manlapud si Adan.​—Roma 5:12, 19.

Anggapo so makaamper ed makapanyarin-amin a Dios a Jehova diad panumpal to ed saray gagala to. Kanian sanen akapankasalanan so too, nayarian ton ipasen a singano abayaran la so dondon anggano agni itan abayaran tan sikatoy makapideneng ed saramay angagamil na pananisia ed kasumpalan na saray gagala to. Diad ontan et saray makasalanan ya ilalak nen Adan, a singa si Enoc, Noe, tan Abraham, so akapanakar a kaiba na Dios tan akapikaaro ed Sikato bangta ag-amatikan so inkasanto To.​—Genesis 5:24; 6:9; Santiago 2:23.

Arum ed saray indibidual ya awalaan na pananisia ed si Jehova et akagawa na ambelat iran kasalanan. Sakey lan alimbawa si Arin David. Oniay nayarin itepet mo, ‘Panon ya ayarian nin siansia nen Jehova a bendisyonan si Arin David kayarin akikalugoran ed si Batseba insan to impapatey met si Urias ya asawa nen Batseba?’ Say importantin rason et say puron impagbabawi tan pananisia nen David. (2 Samuel 11:1-17; 12:1-14) Base ed bagat ya iyapay nen Jesu-Kristo, ayarian na Dios a perdonaen iray kasalanan na nagbabawin si David ingen ta pinansiansia na Dios so dilin inkahustisya tan inkatunong To. (Salmo 32:1, 2) Bilang paneknek ed saya, insalaysay na Biblia so sankaabigan ya agawaan na dondon nen Jesus, salanti, “onkana a kipatnag na inkatunong [na Dios] lapud pamerdona ed saray kasalanan ya apalabas” tan “ed saya a kaplesan a panaon.”​—Roma 3:25, 26.

On, makakaawat na alay abig iran gunggona so katooan lapu ed balor na dala nen Jesus. Base ed dondon, saray totoon makasalanan a  magbabawi so maapit a makapikaaro ed Dios. Niarum ni, say dondon so angilukas na dalan parad kioli na saray inaatey diad balon mundo na Dios. Kabiangan la iray matoor a lingkor na Dios ya inatey la sakbay ya imbayar nen Jesus so dondon tan anggan ed dakel ya inaatey ya andian na kakabatan tan ag-akapandayew ed Sikato. Oniay ibabaga na Biblia: “Wala naani kioli ed bilay na saray matunong tan agmatunong.” (Gawa 24:15) Diad satan a panaon, base ed dondon, ipagamor la nen Jehova ed amin a matulok a totoo so bilay ya andi-anggaan. (Juan 3:36) Oniay insalaysay nen Jesus a mismo: “Ontan lay impangaro na Dios ed mundo, ya inter to so bogbogtong ya Anak to, pian siopaman a manisia ed sikato agnatawtaw, noag ingen wala so bilay ton andi-anggaan.” (Juan 3:16) Amin irayan gunggona so nagamoran na katooan lapu ed probisyon na Dios a dondon bagat.

Balet, say sankatalonggaringan ya aspekto na dondon et aliwan saray gunggona a naawat tayo manlapud satan. Say sankaimportantian et say agawaan na dondon nen Kristo parad ngaran nen Jehova. Pinaneknekan na satan a si Jehova et sakey a Dios a walaan na naspot ya inkatunong, a nayarian ton pidenengan so makasalanan a katooan bangta mansiansian malinis tan masanto. No agginetma na Dios so pangitarya na dondon, anggapo so ilalak nen Adan a makapanakar a kaiba nen Jehova odino magmaliw a kaaro to, anggan si Enoc, Noe, tan Abraham. Amta itan na salmista kanian oniay insulat to: “No sika, Jehova, et uninengen mo so saray kasulitan, O Katawan, siopa kasi naani makaalagey?” (Salmo 130:3) Agaylan misalsalamat itayo ed si Jehova lapud impangibaki to ed inad-aro ton Anak diad dalin tan ed si Jesus a mabulos ya angiter ed bilay to bilang panondon ed sikatayo!​—Marcos 10:45.