“Sakey ed Saray Sankaabigan ya Agew ed Bilay Ko”

“DAKDAKEL so nirereport a manasagmak na depresyon, tan posiblin saya so sankamanunaan a problema ed mental a bunigas diad limog na saray kalangweran,” so inkuan na Beyondblue, sakey ya ahensia a gagastosan na gobierno ed Australia. Ipaparungtal na saray impanaral a diad kada taon et manga 100,000 a kalangweran ya Australiano so manasagmak na depresyon.

Apektado met iray kalangweran a Kristiano. Balet, lapud pananisia ra ed si Jehova, dakel ed sikara so akatalona ed negatibon liknaan tan tinmalona ira bilang kalangweran. Lapud satan et sikaray pandidinayewan na arum. Panon?

Konsideraen pa so eksperiensya na 18-años a si Claire. Sikaran san-ina so onaatendi ed kongregasyon na saray Tasi nen Jehova diad Melbourne. Sanen tinaynan na tatay nen Claire so pamilya ra, si Claire so anagmak na depresyon. Balet, nansiansian mabiskeg so pananisia to ed mangatatawen ya Ama to, si Jehova. Sakey ya agew, linma ed abung di Claire so doktor na pamilya ra, a si Lydia, pian nengnengen so mansasakit a nanay nen Claire. Kayari na satan, inyopresi na doktora ya ipatnubang si Claire diad shopping center. Legan iran manbiabiahe, tinepetan na doktora si Claire no wala lay inaro to. Imbaga nen Claire a bilang sakey a Tasi nen Jehova, sikatoy agbasta midi-date ed lalaki. Nikelawan so doktora. Impaliwawa nen Claire no panon ya ontutulong ed sikato so Biblia pian makapanggawa na makabat iran desisyon ed bilay to. Diad kaunoran, insipan nen Claire ya iyawitan to so doktora na sakey a kopya na publikasyon a nibase ed Biblia ya akatulong a maong ed sikato. Say libro so apauloan na Questions Young People Ask​—Answers That Work.

Taloy agew kayarin naawat nen Lydia so libro, tinawagan to so nanay nen Claire diad telepono pian ibaga a nanliketan ton binasa itan. Insan kinmerew na anemira nin kopya pian iter to ed saray katrabahoan to. Sanen intulor nen Claire iray libro, imbaga na doktora a pandinayewan ton maong so pananisia nen Claire. Inyopresi nen Claire ya iyaralan to na Biblia so doktora, tan inawat to itan.

Si Claire so pigay bulan lan mangiyaaral ed doktora legan na panagpainawa ed ugto. Aminsan et kinerew nen Lydia ed si Claire a sikatoy mansalita diad sakey a seminar nipaakar ed depresyon ed saray kalangweran. Anggaman masuyat si Claire, sikatoy inmabobon lanlamang. Masulok a 60 a totoo so inmatendi ed seminar. Apatiran propesyonal ed mental a bunigas​—ya amin da et wala la’d edad​—so nampaliwawa ed saray dumerengel. Insan sinmublay a nansalita si Claire. Impabitar to ya importantin tuloy a saray kalangweran so nawalaan na relasyon ed Dios. Impaliwawa to a si Jehova a Dios so mangiyaansakit a maong ed saray kalangweran tan tutulongan to so amin ya onaasingger ed sikato parad suporta tan ligliwa. Niarum ni, imbalikas nen Claire so pananisia to a magano lan paandien nen Jehova so amin a beblay ed pisikal tan mental. (Isaias 33:24) Antoy resulta na sayan maabig ya impantasi?

“Kayari na sesyon, dakel so inmasingger ed siak pian ibalikas so pandinayew dan maong diad impakadngel da ed sakey a kalangweran a nansalita nipaakar ed Dios,” so inkuan nen Claire. “Siak so akapangipalima na 23 a kopya na libron Young People Ask. Walay taloran bibii a kabiangan ed dumerengel ya angiter ed siak na numeroy telepono ra. Sakey ed sikara so manaaral la na Biblia. Saman so sakey ed saray sankaabigan ya agew ed bilay ko.”