Kasin Nanonotan Yo?

Naapresya yo ta’n binasa so agano niran paway na Say Panag-Bantayan? Sirin, imanoen no kasin naebatan yo so onggendan a tepetepet:

• Antoray pakapatnagan a walaray agagi nen Jesus a lalaki tan bibii?

Ontan so ibabaga na Biblia diad Mateo 13:55, 56 tan Marcos 6:3. Nausar ed saratan a bersikulo so Griegon salita (adelphos) pian nibiig so “arum a klase na pisikal odino legal a relasyon [tan] satan so mankabaliksan labat na peteg ya agi odino agi ed sakey ya ateng.” (The Catholic Biblical Quarterly, Enero 1992)​—12/15, pahina 3.

• Anto so naiimanon panguumanan la na pambabakal, tan antoray mabetbet a sengegan na satan?

Diad agano niran taon et saray bakal a manunan manasalot ed katooan et saray guerra sibil​—pambabakal ed baetan na mankalaban a grupo na mibabaley ed parehon bansa. Saray sengegan na satan et say etniko tan tribun pambubusolan, panduruma na relihyon, ag-inkahustisya, tan gotgotan ed politika. Say sananey nin sengegan et say inkaagum ed pakapanyari tan kuarta.​—1/1, pahina 3-4.

• Panon tayon naseguro ya agginetma nen Jesus ya ulit-uliten na saray Kristiano iray salita ed modelon pikakasi?

Indatak nen Jesus iyan modelo na pikakasi diad Sermon to ed Palandey. Manga 18 bulan ed saginonor et inulit to iray manunan ideya na akadkaunan bilin to nipaakar ed panagpikasi. (Mateo 6:9-13; Lucas 11:1-4) Makatantanda ya agto inulit itan a salita por salita, a pakapatnagan ya agto gagala ya ipatlep tan ulit-uliten so pikakasi.​—2/1, pahina 8.

• Kayari na Delap, iner so akaromogan na malapati ed bulong na olibo ya inawit na satan ed biong?

Agtayo amta no panon kaasin odino kaunongay temperatura na saray danum na delap. Balet saray kiew ya olibo so kabkabat la a mansisimit lamet kayarin napopo. Kanian nayarin walaray kiew ya ag-inatey ed delap tan nansimit lamet na bulobulong sanen inmekat so danum.​—2/15, pahina 31.

• Kaleganan na guerra sibil ed Nigeria, tekep na impanbarikada diad Biafra, panon ya akaawat na espiritual a tagano iray Tasi nen Jehova ed satan a lugar?

Sakey ya empleyado na gobierno so niasain diad post office ed Europa tan say sananey et mantratrabaho ed patekkiaban na eroplano diad Biafra. Pareho ira a Tasi. Inawat da so mapeligron kimey a pangitulor na espiritual a tagano diad Biafra, kanian agunggonaan so dakel ya agagi anggad anampot so bakal nen 1970.​—3/1, pahina 27.

• Anto so agawaan na Kareenan ed Westphalia, tan panon ya alanor so relihyon?

Say Repormasyon so angapag ed Masanton Empiryo na Roma diad taloran relihyon​—Katoliko, Lutheran, tan Calvinista. Say Unyon na Protestanti tan say Liga na Katoliko so aporma diad kasakbayan na koma-17 a siglo. Insan ginmapo so relihyoson panlalaban diad Bohemia tan nansumpal itan ed pansasamsaman na pakayari ed arum niran bansa. Saray manuley a Katoliko tan Protestanti so akisamsaman ed mapolitikan pakauley tan gunggona ed komersyo. Diad kaunoran, ginawa iray negosasyon parad kareenan diad Westphalia a luyag na Alemanya. Kayari na ngalngalin limay taon, pinirmaan so Paknaan ed Westphalia nen 1648, a sengegan na impanampot na Talomplon Taon a Pambabakal tan ananda ed gapoan na modernon Europa bilang sakey a kontinente na saray manunan estado.​—3/15, pahina 20-3.

• Anto so kabaliksan na tanda, odino ngaran, na “[atap ya] ayep”​—say numeron 666?

Sayan tanda so asalambit diad Apocalipsis 13:16-18. Say ayep so ontutukoy ed pananguley na too, tan say impakawalaan na ayep na “bilang na too” so mangipapabitar a saray gobierno so mangipapatnag ed makabos a kipapasen na too. Say 6 ya aruman na 60 tan aruman na 600 so mangipatnag a satan so sigpot a makulang ed imaton na Dios. Saramay walaan na sayan tanda so mangidadayew tan mangigagalang ed mapolitikan Estado, odino maniilalo ira ed satan parad kilalaban.​—4/1, pahina 4-7.