Natalonaan Mo so Agpakaseguro

“PETEPETEG!” “Segsegurado!” “Garantisado!” Andi-duaruwa ya aminpigam lan nadngel iratan a balikas. Balet, diad inagew-agew a pambibilay tayo, dagdaiset so bengatla a segurado. Agnapadesiran a tuloy so bilay kanian mabetbet itayon manuumameng no kasin wala so bengatla a sigpot a naseguro tayo. Ompatnag a kabiangan la na bilay so panduaruwa tan agpakaseguro.

Natalosan a maslak a totoo so manpipilalek na kaligenan tan liket parad inkasikara tan ed pamilya ra. Papasyaen da so mantrabaho pian nagamoran iray bengatla a panisiaan dan mamaliket tan mamaligen ed sikara​—a kaslakan et say kuarta tan materyal a kaykayarian. Balet, saratan a kaykayarian so nayarin naderal a tampol makasengeg ed yegyeg, bagyo, aksidente, odino marawal a krimen. Biglan manguuman so bilay lapud saray graben sakit, diborsyo, odino inkaandi na trabaho. Tua a nayarin agnagagawa’d sika iratan a bengatla. Ingen, say pakaamta labat a walay teriblin bengatla a nayarin nagawa ed anggan anton panaon et makapaaburido tan makapagonigon la. Balet aliwa labat ya ontan.

Say agpakaseguro so mipadpara ed kabaliksan na panduaruwa, tan inukeran na sakey a diksionaryo so panduaruwa bilang agpakaseguro ed sisiaen odino opinyon a mabetbet ya onsasalet sano mandedesisyon. Niarum ni, inkuan na libron Managing Your Mind a “say agpakaseguro ed bengatlan importante et manunan pansesengegan na kapagaan tan pakaaburido.” Say agnatalonaan a panduaruwa so nayarin mangitonton ed kapagaan, pakadismaya, tan isanok. On, say pan-aburido ed nayarin nagawa odino agnagawa so makaderal ed mental tan pisikal a bunigas tayo.

Bilang resulta, arum a totoo so manggagawa ed kasunian. Kaparpara ra imay kalangweran a taga-Brazil ya angikuan: “Akin a pampagaan no anto so nagawa ed arapen? Say natan et natan, say nabuas et nabuas.” Say ontan a makaderal ya awawey a “mangan itayo tan oninum itayo” so mansumpal lambengat ed pakadismaya, pakagonigon, tan diad kaunoran et ipapatey. (1 Corinto 15:32) Mas maabig no sikatayoy onasingger ed Manamalsa, si Jehova a Dios, a dia ed sikato et “anggapo so kasala’to anggan anino na kauuman,” kuan na Biblia. (Santiago 1:17) No usisaen tayo so Salita na Dios, say Biblia, naromog tayo so maabig a simbawa tan panangiwanwan no panon tayon natalonaan iray agpakaseguroan ed bilay. Makatulong met itan ed sikatayo pian natalosan no akin a dakdakel so bengatla ya agnaseguro.

Rason ed Agpakaseguro

Say Kasulatan so mangitatarya na realistikon panmoria nipaakar ed bilay tan ontutulong itan ed sikatayo a nabayuboan so dugan awawey nipaakar ed agpakaseguroan tan panguman-uman. Anggaman saray siglaotan ed pamilya, kipapasen ed sosyedad, inka-intelihente, maabig a bunigas,  tan arum nira so makapangitarya na inkaligen, ipapabitar na Biblia ya agtayo nayarin ibaliwala iratan a bengatla odino ilaloan a mangitonton iratan ed bilay a maliket tan andian na problema. Oniay inkuan nen makabat ya Arin Solomon: “Say lumba andi ed saray masiglat, odino say bakal ed saray mabiskeg, anggan say tinapay met ed makabat, anggan saray kayamanan met ed totoo a makatalos, anggan say pamalangkap met ed totoo a matalabit.” Akin et andi? “[Lapud] say panaon tan kapalaran [“ag-iilaloan a bengatla,” NW] nagawa ed sikara ya amin.” Kanian, oniay impasakbay nen Solomon: “Singa saray sira a naala dia ed mauges ya iket, tan singa saray manok a naerel dia ed kalot, ontan met so saray anak a lalaki na totoo nakalotan ira ed mauges a panaon, sano napelag a bigla ed sikara.”​—Eclesiastes 9:11, 12.

Sinalambit met nen Jesus so nipaakar ed panaon na pirmin kapagaan tan agpakaseguroan ya onsabi ed amin a kailalakan na totoo. Diad malinew a panangibaga, oniay inkuanto: “Wala naani tanda diad agew tan bulan tan saray bibitewen; et dia ed tapew na dalin irap na saray nasyon, dia ed katanagel ed ungol na dayat tan saray daluyon. Saray totoo napunaw ira nisengeg ed takot, tan egagel da ed saray bengatlan onsabi ed mundo; ta saray pakayari na saray tawen natenyeg naani.” Ingen tinukoy nen Jesus so bengatlan positibo parad saray matuan-impanpuson totoo natan: “[Sano] nanengneng yo so sarayan bengatla a nagawa, amtaen yo a say panariay Dios asingger la.” (Lucas 21:25, 26, 31) Ontan met, imbes ya ontakot ed agseguradon arapen, walaan itayo na pananisia ed Dios ya ontutulong ed sikatayon nanengneng so walad benegan na agpakaseguro, salanti say alay abig tan maligen ya arapen.

‘Napno na Andi-Kaatapan ya Ilalo’

Anggaman ag-itayo makaseguro ed amin a bengatlan narerengel, nababasa, odino nanenengneng tayo, walaan itayo na maabig a rason pian manmatalek ed Manamalsa. Sikato so aliwa labat a Supremon Sakey noagta sikato met so maaron Ama a mangiyaansakit ed mangaraldalin ya ananak to. Oniay inkuan na Dios nipaakar ed dilin salita to: “Sikato naani ag-ompawil ed siak a paoypaoy, noag ingen sumpalen to naani so kaliktan ko, tan onaligwas naani ed bengatla a pangiyakaran ko ed sikato.”​—Isaias 55:11.

Imbangat nen Jesu-Kristo so katuaan a nanlapud Dios, tan dakel ed saray dinmengel ed sikato so anisia ed satan tekep na kombiksion tan inkasegurado. Alimbawa, oniay inkuan na sakey a grupo na saray matuan-impanpuson Samaritano ed sakey a bii ya inmunan akadngel ed si Jesus: “Natan manisia kami, agnisengeg ed salitam; ta sikami lanlamang nadngel mi, tan amta mi a saya sikaton tua so manangilaban na mundo.” (Juan 4:42) Ontan met natan, anggaman manbibilay itayo ed panaon na ag-inkaligen, agtayo kaukolan so manduaruwa ed no anto so panisiaan.

No nipaakar ed relihyoson sisiaen, dakel so walaay opinyon ya imbes a manggunaet a talosan ni, nepeg a panisiaan tayo la a tampol. Balet, agmipakna ed satan ya opinyon so managsulat na Biblia a si Lucas. Sikatoy nansukimat tan angitarya na suston impormasyon ta pian “nakabatan [na arum] so katuaan nipaakar ed bengabengatla” ya insulat to. (Lucas 1:4) Lapud say kapamilya tan kakaaro ya agtayo kapananisiaan et nayarin mapaga ompan naderya odino nadismaya itayo ed kaunoran, importante a sikatayoy makapangidepensa ed pananisia tayo. (1 Pedro 3:15) Natulongan tayoy arum a manmatalek ed Dios dia lambengat ed suston pakapikabat ed basiyan na papanisiaan tayo. Dedeskribien na Biblia si Jehova ed oniaran salita: “Say Dampay, ayadyari so gawa to; ta kaptekan so saray amin a dalan to: Sakey a Dios a napanmatalkan tan anggapo so kaugsan, sikato so matunong tan maptek.”​—Deuteronomio 32:4.

Imanoen pa so unor a balikas: “Sikato so matunong tan maptek.” Antoy paneknek tayo a segurado itayo ed satan? Sigpot a kombinsido si apostol  Pedro ed satan a katuaan. Oniay inkuan to ed opisyal a Romano tan say sankaabungan to: “Tua a nanengneng ko a say Dios anggapo so pangiduma to ed saray totoo; noag ingen dia ed balang nasyon akoen to so antakot ed sikato tan manggawa na matunong.” (Gawa 10:34, 35) Imbaga nen Pedro iratan a salita lapud agano ni et anengneng to no panon so impangimaneobra na Dios ed saray pamaakaran ta pian say pamilya na saray Gentil, a datin ipapasen ya agmalinis tan ag-aabobonan, so nagmaliw lan aabobonan na Dios. Singa si Pedro, nakombinse itayo met ed agpanangidumaduma tan inkatunong na Dios sano nanengneng tayon mismo so “sakey a baleg ya ulop” na totoo​—a masulok lan anemiran milyon​—a manlalapud masulok a 230 a daldalin ed sankamundoan ya angiwaklit la ed datin paraan na kabibilay da tan mankukurang ed dalan na inkatunong.​—Apocalipsis 7:9; Isaias 2:2-4.

Bilang tuan Kristianos, labay tayo so magmaliw, ya aliwan panatiko odino dogmatiko, noagta mapaabeba tan makatunongan. Ingen, ag-itayo manduaruwa ed papanisiaan tayo tan ed iilaloan tayo nipaakar ed arapen. Oniay insulat nen Pablo ed saray Kristiano nen inmunan siglo: “Pampirpirawatan mi a balang sakey ed sikayo ipanengneng to so onman a seet nipaakar ed inkapno na andi-kaatapan ya ilalo angga ed kasampotan.” (Hebreos 6:11) Ontan met, say maong a balita a manlalapud Biblia so mangiiter ed sikatayo na “inkapno na andi-kaatapan ya ilalo.” Satan ya ilalo, a malet a nibase ed Salita na Dios, so “agmangibabaing,” unong ya insalaysay nen Pablo.​—Roma 5:5.

Niarum ni, sikatayoy sigpot a kombinsido a say pangibangat ed arum na maong a balitan manlalapud Biblia so makapangitarok ed sikara na inkaligen tan inkasegurado ed espiritual ontan met ed emosyonal tan pisikal. Makapibiang itayo ed si Pablo a mangibabagan: “Say ebanghelyo tayo agsinmabi ed sikayo ed salita labat, noag dia ed pakayari met, tan dia ed espiritu santo, tan dia ed dakel a pamasekder.”​—1 Tesalonica 1:5.

Saray Bendisyon Natan a Resulta na Inkaligen ed Espiritual

Anggaman agtayo nailaloan so sigpot ya inkaligen ed bilay natan, walaray bengatla a nagawaan tayo pian makapambilay itayo a maligen diad relatibon paraan. Alimbawa, say regular a pililimog ed Kristianon kongregasyon diad saray miting so mamaligen ed sikatayo lapud ditan so kibabangatan tayo ed saray maptek tan maabig a prinsipyo tan maong a panag-ugali. Oniay insulat nen Pablo: “Dia ed saray mangayaman dia ed mundo, ibilin mo ed sikara ya ag-ira mantagey na linawa, tan agda met igaton so ilalo ra ed saray kayamanan a panduaruwaan, noag dia ed Dios, a sikato so mangiter ed sikatayo ed daakan na saray amin a bengatla a pinabangan tayo.” (1 Timoteo 6:17) Lapud naaaralan da so manmatalek ed si Jehova, imbes a diad temporaryon materyal a bengabengatla tan likeliket, dakel so akatalona la ed saray kapagaan tan pakadismaya a kinaukolan dan sungdoan nensaman.​—Mateo 6:19-21.

Diad loob na kongregasyon et panggagayagaan tayo met so maaron impanaagi, ya ontutulong tan onsusuporta diad dakel a paraan. Aminsan diad ministeryo to, si apostol Pablo tan saray kaiba ton manbabaroy so akasagmak na “pirmin pananesdes” tan sikaray ‘agmakaseguro ni ingen ed bilay [da].’ Iner so akaromogan nen Pablo na suporta tan inawa? Siempre, agbalot kinmapuy so panagmatalek to ed Dios. Anggaman kuan, sikatoy pinaseseg tan niligliwa na saray kapara ton Kristiano a tinmulong ed sikato. (2 Corinto 1:8, 9, NW; 7:5-7) Natan, sano onsasabi iray natural a desyang odino arum nin kalamidad, mabetbet a saray Kristianon agagi tayo so manunan ontutulong parad materyal tan espiritual a pankaukolan na saray kapara ran Kristiano ontan met ed arum a mankaukolan.

Say sananey nin makatulong pian natalonaan iray agpakaseguroan ed bilay et say pikakasi. Sikatayo so lawas makaasingger ed maaron mangatatawen ya Ama tayo sano nipaarap itayo ed ag-inilaloan a pananesdes. “Si Jehova met sikato so sakey ya atagey ya ilang ya onkana ed saray apasegsegang, sakey ya atagey ya ilang ed panaon na gulo.” (Salmo 9:9) Nayarin onsaew so toon atateng a manprotekta ed ananak da. Balet, say Dios so mabulos ya ontulong ed sikatayon natalonaan  iray kapagaan tan liknaan ya agpakaseguro. Diad pangibesngaw tayo ed saray kapagaan tayo ed si Jehova panamegley na pikakasi, makaseguro itayo a nayarian to so “manggawa na ontan la a daakan nen saray amin a nayarian tayo a kerewen odino nonoten, unong ed pakayari ya onggawa ed sikatayo.”​—Efeso 3:20.

Kasin maparanay kan onaasingger ed Dios panamegley na pikakasi? Kasin kombinsido ka a dedengelen na Dios iray pikakasim? “Imbaga’d siak nen nanay ko a nepeg ko so manpikasi ed Dios,” kuan na sakey a kalangweran a bii diad São Paulo. “Balet intepet ko’d inkasiak: ‘Akin a mitongtong ak ed sakey ya agko anggan kabat?’ Balet, say Uliran 18:10 so tinmulong ed siak a natalosan a kaukolan tayo so tulong na Dios tan nepeg tayoy mitongtong ed sikato diad pikakasi.” Oniay ibabaga na satan a teksto: “Say ngaran nen Jehova sikato so mabiskeg ya ilang; say maptek ombatik ya onloob ed sikato, tan nilaban.” Peteg, panon tayon nabayuboan so panagmatalek tan kompiyansa ed si Jehova no agtayo iyugali so maparanay a pitongtong ed sikato? Pian napanggayagaan iray bendisyon ed espiritual ya inkaligen, kaukolan tayon iyugali so inagew-agew a masimoon a panagpikasi. Oniay inkuan nen Jesus: “Manbantay kayo ed amin a panaon, a mikasi kayo, pian ontalona kayo a nilaban ed sarayan amin a bengatlan nagawa, tan makaalagey kayo ed arap na Anak na too.”​—Lucas 21:36.

Say sananey nin bengatla a naseseguro tayo et say ilalo tayo ed Panarian na Dios. Imanoen iray salita diad Daniel 2:44: “Say Dios na tawen mamaalagey naani na sakey a panarian ya anggan kapigan agnaani naderal tan say pananguley to agnaani niiter ed sananey a baley; balet buybuyaken to naani tan upoten to naani so saraya ya amin a panarian, et sikato so mansiansia lawas.” Satan ya ilalo so walaan na basiyan tan makaseguro itayo ed satan. Mabetbet ya onsasaew iray sipan na too, balet makapanmatalek itayo lawas ed salita nen Jehova. Imbes a sikatoy agnapanmatalkan, say Dios et singa sakey a baton dampay a napapegan tayo. Nalikna tayo so singa alikna nen David, a kuan to: “Say Dios, a dampay ko, diad sikato so apirengan ko; kinlong ko, tan saklor na kilalaban ko, ilang ko ya atagey, tan apireng ko; manangilaban ko, ilaban mo ak ed pasoot.”​—2 Samuel 22:3.

Oniay kaaruman ya imbaga na libron asalambit ed banda’d gapo a Managing Your Mind: “No lalon nonoten na sakey iray mauges a bengatla a nayarin nagawa, magmaliw a lalon realistiko irayan bengatla ed nonot to, tan lalon mairap ton natebek no panon a natalonaan iratan.” No ontan sirin, akin ya abuloyan tayoy inkasikatayo a nabelatan ed sarayan kapagaan tan panduaruwaan ed mundo? Imbes, sika so manmatalek ed segurado iran sipan ya itatarya na Dios, aliwan diad agsegurado iran bengatla ed mundo. Diad pakawalaan tayo na mabiskeg a pananisia ed segurado iran sipan nen Jehova, oniay naseseguro tayo: “Siopaman a manisia ed sikato, ag-ira nabaingan.”​—Roma 10:11.

[Blurb ed pahina 29]

Say Salita na Dios so mangigagarantiya ed arapen iran bendisyon parad katooan

[Blurb ed pahina 30]

“Siopaman a manisia ed sikato, ag-ira nabaingan”

[Litrato ed pahina 31]

Say maong a balita na Panarian so mangitarok na inkaligen ed totoo