Sikayoran Tobonbalo​—Aglingwanan nen Jehova so Gagawaen Yo!

“Say Dios aliwan agmatunong pian nalingwanan to so gawa yo tan say aro ya impanengneng yo ed ngaran to, ed impanulong yo ed saray sasanto ed saray pankaukolan da, tan ed panutulong yo ni natan ed sikara.”​—HEBREOS 6:10.

1. Panon ya ipapabitar na saray libro na Biblia a Hebreos tan Malaquias a papablien nen Jehova so panlilingkor mo ed sikato?

 WALA la kasi so ginawam a maabig a bengatla parad sakey a kaarom balet ta anggapo so naawat mo’d sikato a balikas na pisasalamat? Makapaermen sano ibaliwala so sakey a gawa na inkamabunlok odino, alodloor ni, no nilingwanan la itan. Balet, agaylay piduma sano mangisaklang itayo na sigpot-puson panaglingkor ed si Jehova! Oniay ibabaga na Biblia: “Say Dios aliwan agmatunong pian nalingwanan to so gawa yo tan say aro ya impanengneng yo ed ngaran to, ed impanulong yo ed saray sasanto ed saray pankaukolan da, tan ed panutulong yo ni natan ed sikara.” (Hebreos 6:10) Isipen pa so kabaliksan na satan.  Peteg ya ipasen itan nen Jehova ya ag-inkatunong ed biang to​—sakey a kasalanan​—no lingwanan to so ginawam tan no anto so gagawaen mo diad panaglingkor ed sikato. Agaylan maapresyan Dios!​—Malaquias 3:10.

2. Anto so manggawan nikadkaduma so panlingkor ed si Jehova?

² Walaan ka na nikadkaduman pankanawnawa a mandayew tan manlingkor ed maapresyan Dios. Lapud wala labat so manga anemiran milyon a kapananisiaan mo no ikompara ed anemiran bilyon a totoo ed sankamundoan, talagan nikadkaduma so pribilehyom. Niarum ni, say itatalineng mo tan ikikiwas mo ed mensahe na maong a balita et ebidensya ya interesadon tuloy si Jehova ed sika. Diad tua, oniay kuan nen Jesus: “Anggapo so too a makadago ed siak, likud no say Ama ya angibaki ed siak sikato so yasingger to.” (Juan 6:44) On, tutulongan nen Jehova so totoo a manganamot ed saray gunggona na bagat nen Kristo.

Apresyaen Mo so Nikadkaduman Pribilehyom

3. Panon ya imbalikas na saray ilalak nen Kore so panamabli ed pribilehyo ran manlingkor ed si Jehova?

³ Unong a siningbat la ed inmunan artikulo, walaan ka na nikaduman talindeg pian napaliket mo so puso nen Jehova. (Uliran 27:11) Saya so bengatlan agmon balot nepeg ya ibaliwala. Diad sakey ed saray apuyanan a salmo ra, imbalikas na saray ilalak nen Kore so apresasyon da ed pribilehyo ran manlingkor ed si Jehova. Oniay nabasa tayo: “Say sanagew ed loob na saray saban mo magmaong ni nen say sanlibo. Lablabay ko ni ompasen a sakey a bantay-pinto ed abung na Dios ko, nen say manayam ed alolong ya abel na kabaglan.”​—Salmo 84:10.

4. (a) Anto so nayarin sengegan no akin a moriaen na arum a mapeget so panagdayew ed si Jehova? (b) Diad anton paraan ya impatnag a mismo nen Jehova a sikatoy magunaet a manimano tan manumang ed saray lingkor to?

⁴ Ontan kasi so liknaan mo ed pribilehyom a manlingkor ed mangatatawen ya Amam? Tua, no maminsan et nayarin singa pepegetan na panagdayew ed si Jehova so kawayangan mo. Tua a say pambilay unong ed saray prinsipyo na Biblia so mankaukolan na sakey a sukat na dilin-panagsakripisyo. Balet, diad kaunoran et pakagunggonaan mo so antokaman a kakaukolanen nen Jehova ed sika. (Salmo 1:1-3) Niarum ni, iimanoen nen Jehova iray sagpot mo tan ipapatnag to so apresasyon to ed panmamatoor mo. On, insulat nen Pablo a si Jehova et “mananumang ed saray mananap ed sikato.” (Hebreos 11:6) Aanapen nen Jehova iray pankanawnawa pian nagawaan to itan. Oniay inkuan na matunong a propeta diad Israel nensaman: “Saray mata nen Jehova ombatik dia tan diman ed amin a dalin, pian ompatnag a mabiskeg ya ontulong ed saray ayadyari puso ra a dapit ed sikato.”​—2 Awaran 16:9.

5. (a) Anto so sakey ed saray sankaabigan a paraan a nipanengneng mo a nagnap so pusom ed si Jehova? (b) Akin a singa mairap ya itongtong ed arum so nipaakar ed pananisiam?

⁵ Sakey ed saray sankaabigan a paraan a nipatnag mo a nagnap so pusom ed si Jehova et say pangitongtong mo ed sikato diad arum. Asalim ta  lay akapitongtong ed arum ed saray kaeskuelaan mo nipaakar ed pananisiam? Diad primero et nayarin makapatalaw so panggawa ed satan, tan anggan say mismon pannonot labat ed satan. ‘Panon to ey no elekan da ak?’ so nayarin itepet mo. ‘Panon to no isipen dan nidumaduma so relihyon ko?’ Binidbir nen Jesus ya ag-ondengel so amin a totoo diad mensahe na Panarian. (Juan 15:20) Balet, ag-iya mankabaliksan a nigana ka lan manbilay a walaay panagludlurey tan panangipulisay. Diad pisunian, aromog na dakel a tobonbalon Tasi a wala so mabulos ya ondengel tan agamoran da ni ingen so babaleg a respeto na saray kalimog da lapud katutulok da ed saray sisiaen da.

‘Tulongan Ka nen Jehova’

6, 7. (a) Panon ya akapanpulong so sakey a 17 años a marikit ed saray kaklase to? (b) Anto so naaralan mo ed eksperiensya nen Jennifer?

⁶ Balet panon kan makapanpakpel a mansalita nipaakar ed pananisiam? Akin ta no magmaliw kan matua tan prangka sano mantepet so totoo nipaakar ed relihyon mo? Konsideraen pa so eksperiensya nen 17 años a si Jennifer. “Mangoogto ak ed saman diad eskuelaan. Nibanbanan pantotongtongan na saray bibii ed lamisaan so nipaakar ed relihyon, tan siak so tinepetan na sakey no anto so relihyon ko,” so inkuan to. Anerbiyos kasi si Jennifer ed inyebat to? “On,” so inkuanto, “lapud agak segurado no anto so magmaliw a reaksion da.” Kanian anto so ginawa nen Jennifer? “Imbagak ed saray bibii a sakey ak ed saray Tasi nen Jehova,” so intuloy to. “Abigla ira ed gapo. Ompatnag a walaan iray kanonotan a nidumaduman totoo iray Tasi nen Jehova. Satan so amakiwas ed sikara a mantepet ed siak, tan nipalinew ko ed sikara so arum ed saray lingon panmoria ra. Anggan diad tinmumbok laran agew, siak so sagpaminsan ya inasinggeran na arum ed saray bibii pian mantepet.”

⁷ Kasin nagbabawian nen Jennifer so impanganamot ton mangitongtong ed saray sisiaen to? Andin balot! Inkuanto: “Balibali liknaan ko nipaakar ed satan sanen asumpal so ogto. Natan et marakep lay panmoria na saraman a bibii ed no siopan talaga iray Tasi nen Jehova.” Simpli so nibaga nen Jennifer: “No naiirapan kan manpulong ed saray kaklasem odino maestram, manpikasin magano. Tulongan ka nen Jehova. Manliket ka ta inusar mon maabig so pankanawnawa pian manpulong.”​—1 Pedro 3:15.

8. (a) Panon ya akatulong so pikakasi ed si Nehemias sanen sikatoy nidunget ed ag-inilaloan a kipapasen? (b) Anto so arum ed saray kipapasen ed eskuelaan a nayarin nakaukolan mo so antikey tan mareen a pampikasi ed si Jehova?

⁸ Imanoen so inrekomenda nen Jennifer a ‘manpikasin magano’ ed si Jehova sano pankanawnawam lan ipulong so nipaakar ed pananisiam. Ontan so mapatnag a ginawa nen Nehemias, a managserbi na kopa na Persianon Ari ya Artajerjes, sanen sikatoy nipaarap ed ag-inilaloan a kipapasen. Napatnagan a maong so inkagonigon nen Nehemias lapud sikatoy apakabatan nipaakar ed makapasinagem a kipapasen na saray Judio tan naamtaan to ya ageraygeray ni iray padir tan wangalan na Jerusalem. Naimano na ari so pakakaaburido nen Nehemias, kanian tinepetan toy Nehemias no anto so kapapagaan to. Sakbay ya onebat et nampikasi si Nehemias parad panangigiya. Insan sikato so makpel a kinmerew na permiso ya ompawil ed Jerusalem tan ontulong a mangipaalagey ed nagban syudad. Inabobonan nen Artajerjes so kerew nen Nehemias. (Nehemias 2:1-8) Anto so leksion? No nanenerbiyos ka sano pankanawnawam lan ipulong so nipaakar ed pananisiam, agmo lilingwanan so pampikasin mareen. Oniay insulat nen Pedro: “Imatalek yo ya amin ed [si Jehova] so kapagaan yo; ta sikato asikasoen to kayo.”​—1 Pedro 5:7; Salmo 55:22.

“Akaparaan a Mangidepensa”

9. Panon ya akapangipalima so 13 años a si Leah na 23 a kopya na libron Young People Ask?

⁹ Konsideraen so sakey nin eksperiensya. Si Leah, a manedad na 13, so manbabasa na libron Questions Young People Ask​—Answers That Work * legan na panangogto diad eskuelaan. “Sankanengneng ak na arum,” so inkuanto, “insan nagogonoyan et kitangulaw la ra ed benegan ko. Ginmapo iran nantepet no anto iman a libro.” Sanen onngangarem la, apatiran bibii so kinmerew ed si Leah na kopya na libron Young People Ask. Agnambayag et innabang na saray bibii so  libro ed arum, tan labay da met so nawalaan na kopya. Kayari na pigaran simba, si Leah so akapangipalima na 23 a kopya na libron Young People Ask ed saray kaeskuelaan to tan ed saray kakaaro ra. Mainomay kasi ed biang nen Leah so mansalita sanen sikatoy tinepetan nin unona na arum nipaakar ed libron babasaen to? Andi! “Diad primero et anerbisyos ak,” so inaksobi to. “Balet, nampikasi ak, tan amtak a siak so tulongan nen Jehova.”

10, 11. Panon ya atulongan na manmarmarikit ya Israelita so hepe na armada na Sirya a makaaral nipaakar ed si Jehova, tan antoran pananguman so ginawa to ed saginonor?

¹⁰ Nayarin ipanonot ed sika na eksperiensya nen Leah so nipaakar ed mipadparan kipapasen ya inkidungetan na manmarmarikit ya Israelita ya akautibo ed Sirya. Si Naaman, a hepe na armada na Sirya, so akating. Nayarin inggapo na akulaw to so tongtongan ya amakiwas ed sayan ugaw a bii a mansalita nipaakar ed pananisia to. “No komon ta say katawan ko a laki onarap ed propeta a wala ed Samaria!” so inkuan to. “Sirin onabig ed kating to.”​—2 Arari 5:1-3.

¹¹ Bilang resulta na impanpakpel na sayan ugaw a bii, akabatan nen Naaman ya “anggapo so Dios dia ed amin a dalin, noag dia ed Israel.” Sikato ni ingen so nagmaliw a determinadon “agmangiyapay na bagat a poolan odino bagat ed saray arum a dirios, noag dia ed Jehova.”  (2 Arari 5:15, 17) Maseguron benendisyonan nen Jehova so inkakpel na sayan melag a bii. Nayarian to tan gawaen to met so ontan ed saray kalangweran natan. Naeksperiensya met nen Leah itan. Sinmabi panaon, arum ed saray kaeskuelaan to so inmasingger ed sikato tan inkuan dan say libron Young People Ask so makakatulong ed sikara ed saray ugali ra. “Maliket ak,” kuan nen Leah, “lapud amtak a natutulongan ko so arum a makaaral ni nipaakar ed si Jehova tan natutulongan ko ira a manguman ed kabibilay da.”

12. Panon kan napabiskeg a mangidepensa ed pananisiam?

¹² Nawalaan ka met na saray eksperiensya a singa ed si Jennifer tan si Leah. Tumboken so simbawa ya insulat nen Pedro, a bilang Kristiano et nepeg a lawas kan “akaparaan a mangidepensa ed arap na balang sakey a mankaukolan ed sikayo na katunongan nisesengeg ed ilalon walad sikayo, balet gawaen itan tekep na maulimek a liknaan tan aralem a respeto.” (1 Pedro 3:15, NW) Panon mon nagawaan itan? Aligen so ginawa na saray Kristiano nen inmunan siglo ya impikasi ra ed si Jehova a tulongan to ira a makapanpulong ‘tekep na inkakpel.’ (Gawa 4:29) Insan manpakpel diad pangitongtong ed arum na nipaakar ed saray sisiaen mo. Nayarin nasurprisa ka ed saray resulta. Niarum ni, napaliket mo so puso nen Jehova.

Saray Video tan Espisyal a Proyekto

13. Antoran pankanawnawa so inanamot na pigaran tobonbalo pian mangiter na pantasi? (Nengnengen iray kahon ed pahina 20 tan 21.)

¹³ Nipaliwawa na dakel a tobonbalo so nipaakar ed pananisia ra diad saray kaeskuelaan da odino ed manbabangat ed sikara diad impangusar da ed saray video. Panapanaon et ilulukas na saray project da ed eskuelaan so pankanawnawan mangidayew ed si Jehova. Alimbawa, bilang kabiangan na suheto ra nipaakar ed awaran na mundo, akaawat na asainmin so duaran 15 años a laki, a parehon Tasi nen Jehova, a mangisulat na report nipaakar ed sakey ed saray relihyon ed mundo. Nanmuyong iran dua a mangisulat ed report da nipaakar ed saray Tasi nen Jehova, ya inusar dan reperensya so libron Jehovah’s Witnesses​— Proclaimers of God’s Kingdom. * Walaan met ira na limaran-minuton pangisingbat ed report da. Insan, say maestro tan saray estudyante so walaan na dakdakel a tepet kanian nansiansia ni na 20 a minutos irayan lalaki diad arap na klase ra. Kayari na pigaran simba, nantultuloy nin nantepet iray kaklase ra nipaakar ed saray Tasi nen Jehova!

14, 15. (a) Akin a say takot ed too et sakey a patit? (b) Akin a nepeg kan manmatalek nipaakar ed pananginabang mo na saray sisiaen mo ed arum?

¹⁴ Unong ed iyiilustra na saray asalambit laran eksperiensya, nagamoran so alay abig iran bendisyon diad pangitongtong ed arum na nipaakar ed saray sisiaen mo bilang sakey ed saray Tasi nen Jehova. Agmo aabuloyan so takot ed too a mangikibot ed sika na pribilehyo tan gayagan ontulong ed arum a makapikabat ed si Jehova. Oniay ibabaga na Biblia: “Say takot na too mantarok na kalot; balet anggan siopa ya ipasen to so ilalo to ed Jehova nilaban.”​—Uliran 29:25.

¹⁵ Tandaan, bilang Kristianon tobonbalo et walaan ka na bengatlan kakkaukolan na saray kalimog mo​—say sankaabigan a dalan na bilay natan tan say sipan ya andi-anggaan a bilay diad arapen. (1 Timoteo 4:8) Makapainteres ta diad Estados Unidos​—a nayarin isipen mon saray totoo diman et anggapoy interes odino puros trabaho so walad nonot da​—impatnag na sakey a surbi a manga kapalduan porsiento ed saray tobonbalo so seryoson tuloy nipaakar ed relihyon, tan kakatlo so angikuan a say relihyoson pananisia so “sankaimportantian ya impluensya” ed bilay da. Maseguron ontan met so situasyon diad arum niran parte na mundo. Nayarin maliket met ya ondengel iray kalimog mo ed eskuelaan ed no anto so ibagam nipaakar ed Biblia.

Bilang Tobonbalo, Onapit ed si Jehova

16. Anto ni so nalalanor ed pamaliket ed si Jehova nilikud ed pangitongtong ed arum nipaakar ed sikato?

¹⁶ Siempre, say pamaliket ed puso nen Jehova so aglambengat mangilalanor ed pangitongtong ed sikato. Nakaukolan met ya itunos mo so konduktam ed saray estandarte to. Oniay insulat nen apostol Juan: “Ta saya so aro na Dios, a sumpalen tayo so saray ganggan to: tan saray ganggan to aliwa ran ambelat.” (1 Juan 5:3) Naromogan mon peteg itan no onapit ka ed si Jehova. Panon mon nagawaan itan?

17. Panon kan onapit ed si Jehova?

¹⁷ Ipanaon so pambasa ed Biblia tan saray nibase’d Biblian publikasyon. No lalon nakakabat mo si Jehova, lalon mainomay so pangunor ed sikato tan pangitongtong ed sikato diad arum. “Say maong a too ipaway to so maabig dia ed maong a kayamanan na puso to,” so kuan nen Jesus, “ta dia ed inkadaakan na puso say sangi to mansalita.” (Lucas 6:45) Kanian panoen mo so pusom na maabig iran bengatla. Akin ta no mangiletneg ka na saray kalat nipaakar ed satan? Nayarin manpaaligwas ka ed panagparaan ed saray miting diad kongregasyon ed sayan ontumbok a simba. Say ontumbok a kalat mo et say pankomento na antikey balet ta impapuso. Siempre, makanakana ya iyaplikam met iray bengatlan nanaaralan mo.​—Filipos 4:9.

18. Anggano managmak ka na isusumpa, anto so napanmatalkan mo?

¹⁸ Saray bendisyon a nagagamoran lapud panaglingkor ed si Jehova so magnayon​—on, andi-anggaan. Tua, sagpaminsan kan makaeksperiensya na isusumpa odino panagludlurey bilang sakey ed saray Tasi nen Jehova. Balet isipen pa so nipaakar ed si Moises. Ibabaga na Biblia ya “inyan to so mata to ed katumangan.” (Hebreos 11:24-26) Makapanmatalek ka met a tumangan ka nen Jehova lapud saray sagpot mon makaaral nipaakar ed sikato tan ed pangitongtong ed sikato diad arum. On agton balot ‘nalingwanan so gawam tan say arom ya impanengneng mo ed ngaran to.’​—Hebreos 6:10.

[Saray paimano ed leksab]

Kasin Natandaan Mo?

• Akin a makapanseguro ka a papablien nen Jehova so serbisyom?

• Antoran paraan ed panagpulong ed eskuelaan so aromog na arum bilang matalona?

• Panon kan napabiskeg a manpulong ed saray kaeskuelaan mo?

• Panon kan onapit ed si Jehova?

[Tepetepet Parad Panagaral]

[Kahon/Saray litrato ed pahina 20]

Anggan Saray Ugugaw et Mangidadayew ed si Jehova!

Anggan saramay mantin-edyer ni labat et akapangiter la ra na epektibon pantasi diad eskuelaan. Konsideraen pa irayan antikey ya eksperiensya.

Babasaen na saray kaklase nen 10 años ya Amber a wala la’d komaliman grado so nipaakar ed impangataki na Nazi ed saray Judio legan na Guerra Mundial II. Denesidi nen Amber ya awiten so video a Purple Triangles parad say maestra to. Asurprisa so maestra ta pinasegsegang met manaya na uley na Nazi iray Tasi nen Jehova. Impabantayan na maestra so video ed interon klase.

Sanen waloy-taon nen Alexa, sikato so nansulat ed saray kaklase to ya impaliwawa to no akin ya agto mibibiang ed panagselebra na Krismas. Mandinayew a maong so maestra kanian impabasa to ed si Alexa so sulat to diad arap na saray mismon kaklase to ontan met ed duara niran klase! “Nibangat ak a manrespeto ed arum a midumaan iray sisiaen da ed siak,” so inkuanto ed konklusyon to, “tan pisalamatan ta kayo ta rerespetoen yo so desisyon kon agmanselebra na Krismas.”

Kagapo ni labat nen Eric ed inmunan grado, inawit to la ed eskuelaan so libron My Book of Bible Stories tan kinmerew na permiso ya ipanengneng itan ed saray kaklase to. “Walay marakep ya anonotan ko,” so kuan na maestra. “Akin ta no ibasam so istorya diad arap na klase?” Ontan so ginawa nen Eric. Kayari na satan, impaitagey to so kalimaan na saramay malabay a nawalaan na kopya na libro. Labinwalo​—pati say maestra​—so angitagey na lima ra! Naisip nen Eric a sikatoy awalaan na nikaduman teritoryan pampulongan.

Pisalsalamatan nen siam-taon a Whitney so brosyur a Jehovah’s Witnesses and Education. * “Diad tinaon, say nanay ko so mangiiter ed sayan brosyur diad saray maestro tan maestrak,” so kuanto, “balet diad sayan taon et siak lay angiter. Diad tulong na sayan brosyur, siak so pinili na maestrak ya ‘student of the week.’”

[Paimano ed Leksab]

[Kahon/Saray litrato ed pahina 21]

Saray Kipapasen a Nitongtong na Arum so Nipaakar ed Pananisia Ra

Sano naikdan ira na asainmin a report odino project diad eskuelaan, arum so mamipili na tema a mangiyabuloy ed sikaran makapantasi

Walaray tobonbalo ya angiter na video odino publikasyon a manasaglawi ed sakey a teman sisingbaten ed klase ra dia ed managbangat ed sikara

Sanen manbabasa na Biblia odino sakey a nibase’d-Biblia a publikasyon so arum a tobonbalo legan na recess, sikara so inasinggeran na arum niran tobonbalo a walaan na saray tepet

[Litrato ed pahina 18]

Nayarin makatulong iray eksperiensyado ed saray tobonbalo pian manlingkor ed si Jehova