Saray Tobonbalo a Mamapaliket ed Puso nen Jehova

“Ana’ko, onkabat ka, tan paliketen mo so pusok, pian naebatan ko so mamalaw ed siak.”​—ULIRAN 27:11.

Sarayan aaralen ya artikulo so nagkalalo lan intarya parad saray tobonbalo ed limog na saray Tasi nen Jehova. Kanian, pasesegen mi kayo iran tobonbalo ya aralen a maong iyan materyal tan mabulos kayon mankomento sano konsideraen iya ed Panagaral na Panag-Bantayan ed kongregasyon.

1, 2. (a) Ipaliwawa no kasin say pakasagyat labat ed saray bengatla ed mundo so mankabaliksan ya agka la manepeg a magmaliw a Kristiano. (Roma 7:21) (b) Anto so naaralan mo ed alimbawa nen Asap? (Nengnengen so kahon ed pahina 13.)

 ISIPEN pa a manasaliw ka na saray kawes. Legay pampipilim et anengneng mo so aysing a makapasagyat ed sika. Say kolor tan estilo so ompatnag ya inangay mo, tan say presyo to so talagan mamura. Balet ta kinunineng mo itan a maong. Abigla ka ta narorotrot la itan ed saloy, tan aliwan marakep so inkadait to. Anggaman marakep itan a kawes, makapuy so kalidad na satan. Labay mo kasin saliwen so ontan a makapuy a produkto?

² Ikompara iya ed kipapasen a nayarin kipaarapan mo bilang Kristianon tobonbalo. Diad primeron pakanengneng, saray bengatla ed sayan mundo​—a singa ed satan a kawes​—so nayarin ompatnag a makapasagsagyat. Singa bilang, saray kaeskuelaan mo so nayarin oonla ed maliket iran party, mandrudruga, maniinum ira, agseryoson midi-date, tan mirerelasyonan ed sekso sakbay na kasal. Kasin nasasagyat ka no maminsan ed ontan ya estiloy-kabibilay? Pipirawaten mo kasin nasali so nibabagan kawayangan da? No ontan, agka bengatbengat a mangikuan a mauges ka tan agka la manepeg a magmaliw a Kristiano. Say katuaan to et bibidbiren na Biblia a talagan mabiskeg so pananagyat na mundo​—anggan ed sakey a too a malabay a mamaliket ed Dios.​—2 Timoteo 4:10.

3. (a) Akin a maapa so pangegemtan ed saray bengatla diad mundo? (b) Panon so impaneskribe na sakey a Kristiano ed kaapaan na minumundo iran gegemtan?

³ Ipangasim pa natan ya imanoen a maong, a singa ed pankukunineng mo ed kawes a labay mon saliwen. Tepetan moy inkasika, ‘Anto so kalidad na sayan sistema na bengabengatla?’ Idadalatdat na Biblia a “say mundo mangangga.” (1 Juan 2:17) Temporaryo labat so antokaman a liket a nagamoran ed mundo. Niarum ni, say agmaridios a kondukta so walaan na seryoson pansumpalan. Seguradon ag-itan pakagunggonaan. Sakey a Kristiano, a kinaukolan a mansungdo ed tatawagen ton “saray ot-ot a resulta na lingon impangusar ed panaon na inkatobonbalo,” so angikuan: “Nayarin ompatnag a makapaliket tan makapasagyat so mundo. Tan tangguyoren ka na satan a nayarian moy makapanliket [ed iyoopresi]  na satan ya andiay makapuy a resulta. Balet ta satan so mapatnag ya aliwan posibli. Anamoten ka na mundo, tan sano anggapo lay kaukolan to ed sika, ibantak to ka la. * Akin a perdien mo so panaon na inkatobonbalom ed sayan abebbeban dalan na kabibilay?

Salimbeng a Sumpad ‘Marelmeng a Sakey’

4, 5. (a) Antis na impatey to, anto so impikasi nen Jesus ed si Jehova? (b) Akin a matukoy itan a kerew?

⁴ Lapud amoria ra ya anggapoy bengatlan maabig a niyopresi na sayan sistema na bengabengatla, saray kalangweran ed limog na saray Tasi nen Jehova so manggugunaet ya ompaliis ed pakapikaaro ed sayan mundo. (Santiago 4:4) Kasin sakey ka ed sarayan matoor a tobonbalo? No ontan, sika so nakomendaan. Tua, aliwan mainomay so onresisti ed desdes na kalimog tan magmaliw a duma, balet wala so makatulong ed sika.

⁵ Antis na impatey to, impikasi nen Jesus a ‘bantayan’ nen Jehova iray babangatan to ‘lapu ed mauges a sakey.’ (Juan 17:15) Inkerew iya nen Jesus lapud maabig a rason. Amta to a say pagmaliw a matoor so aliwan mainomay parad saray patumbok to, antokaman so edad da. Akin? Sakey lan rason, a singa binidbir nen Jesus, et nipaarap iray babangatan to ed mabiskeg tan agnanengneng a kabusol​—‘say marelmeng a sakey,’ si Satanas a Diablo. Ibabaga na Biblia a sayan mauges ya espiritun pinalsa so “wala ed kaliberliber yo a singa omoang a leon a mananap na buagen to.”​—1 Pedro 5:8.

6. Panon tayon naseguro ya anggapoy panangabagey nen Satanas ed saray kalangweran?

⁶ Diad interon awaran, panliliketan nen Satanas so pangitatarok to na sankaruksaan iran panamairap ed totoo. Nonoten pa so makapasinagem iran desyang ya indapo nen Satanas ed si Job tan ed pamilya to. (Job 1:13-19; 2:7) Nayarin nanonotan mo iray nibalitan ebento diad panaon mon mismo a pakabidbiran na marawal ya awawey nen Satanas. Say Diablo so ag-ontutundan mananap na biktimaen to, tan diad panaanap toy buagen to, agto kakasian iray tobonbalo. Singa bilang, diad gapo na inmunan siglo K.P., ginetma nen Herodes ya ipapatey so amin ya ugugaw a lalaki diad Betlehem a mantaon na duara odino mas ugaw ni. (Mateo 2:16) Nayarin si Satanas so amakiwas ed si Herodes pian pateyen so ugaw a magmaliw a Mesias ya insipan na Dios, a mangidapo na panangukom na Dios ed si Satanas! (Genesis 3:15) Mabitar, anggapoy panangabagey nen Satanas ed saray kalangweran. Say alenleneg a getma to et deralen so dakel a totoo no posibli. Nagkalalo lan tua iya natan, lapud nibasileng la si Satanas diad dalin manlapud tawen, a ‘walaan na baleg a sanok, ya  amta ton antikey lay panaon to.’​—Apocalipsis 12:9, 12.

7. (a) Panon so pidumaan a tuloy nen Jehova ed si Satanas? (b) Antoy liknaan nen Jehova nipaakar ed pakapanggayagam ed bilay?

⁷ Miduman tuloy ed si Satanas, a walaan na “baleg a sanok,” si Jehova so walaan na “matamoy a panangasi.” (Lucas 1:78) Sikato so mismon mangilalaman ed aro. Diad tua, sayan matalonggaring a kalidad so pakapatnagan a tuloy ed Manamalsa tayo ta oniay ibabaga na Biblia: “Say Dios sikato so aro.” (1 Juan 4:8) Agaylay pandumaan na dios na sayan sistema ed saray bengatla tan say Dios a pribilehyo tayon dayewen! Anggaman panggugunaetan nen Satanas so panderal, ‘aglabay [nen Jehova] a natawtaw so siopaman.’ (2 Pedro 3:9) Momoriaen to a mabmabli so kada bilay na too​—pati say bilay mo. Sano bibilinen ka nen Jehova panamegley na Salita to ya agmagmaliw a kabiangan na mundo, agto aamperen so pakapanggayagam ed bilay nisay pepegetan to so kawayangan mo. (Juan 15:19) Diad pisunian, babantayan to ka lapud marelmeng a sakey. Kaliktan na mangatatawen ya Amam a nawalaan kay bengatlan magmaong nen say temporaryon likeliket ed sayan mundo. Say pilalek to et nagamoran mo so ‘peteg a bilay’​—say andi-anggaan a bilay ed paraison dalin. (1 Timoteo 6:17-19) Kaliktan nen Jehova ya ontalona ka, tan papasesegen to ka a kapeten itan a kalat. (1 Timoteo 2:4) Niarum ni, inanatnat nen Jehova ed sika so nikaduman imbitasyon. Anto itan?

“Paliketen Mo so Pusok”

8, 9. (a) Anto so niregalom ed si Jehova? (b) Panon so pangakantiaw nen Satanas ed si Jehova, unong a niyilustra ed agawa’d si Job?

⁸ Asalim la kasi so analiw na regalo a parad sakey a maapit a kaaro insan naimatonan mo so panim-imis to tekep na inkasurprisa tan pisalsalamat sanen naawat to itan? Nayarin ninonot mon maong no anton klase na regalo so matukoy parad sikato. Nonoten natan iyan tepet: Anton klase na regalo so niiter mo ed Manamalsam, si Jehova a Dios? Diad primero et nayarin singa makulangkulang itan a kanonotan. Anto ta so nakaukolan na Makapanyarin-amin ed say too lambengat? Anto so posiblin niiter mo ed sikato ya anggapo ni ed sikato? Onebat so Biblia diad Uliran 27:11: “Ana’ko, onkabat ka, tan paliketen mo so pusok, pian naebatan ko so mamalaw ed siak.”

⁹ Unong a nayarin naamtaan mo la ed impanaral moy Biblia, si Satanas a Diablo so mangakantiaw ed si Jehova. Ipipilit to a manlilingkor so totoo ed Dios lapud sinisiblet iran rason, aliwan lapud aro. Inkuan nen Satanas a no nidunget ira ed kairapan et ikaindan dan tampol so tuan panagdayew. Singa bilang, nonoten pa so imbaga nen Satanas ed si Jehova nipaakar ed matunong a too a si Job: “Agka ta nanggawa na alar ed liberliber to, tan dia ed liberliber na abung to, tan ed liberliber na amin a wala ed sikato, ed amin a diking? Benendisyonan mo so kimey na saray lima to, tan say kayarian to minmunat ed dalin. Balet yunat mo so limam natan, tan diwiten mo so amin a wala ed sikato, et ikaindan to ka ed lupam.”​—Job 1:10, 11.

10. (a) Panon tayon naseguro a susuppiaten nen Satanas so katooran na amin, aliwa lambengat a si Job? (b) Panon kan nalalanor ed isyu nipaakar ed inkasoberano?

¹⁰ Unong a niparungtal ed salaysay na Biblia, aliwa lambengat a say katooran nen Job so sinuppiat nen Satanas noagta pati say katooran na amin a manlilingkor ed Dios​—pati sika. Diad tua, oniay inkuan nen Satanas ed si Jehova diad impanukoy to ed interon katooan: “Amin a say too [aliwa labat a si Job noagta amin] wala ed sikato iter to nipaakar ed bilay to.” (Job 2:4) Natetebek mo kasi so betang mo ed sayan importantin isyu? Unong a nipabitar ed Uliran 27:11, ibabaga nen Jehova a wala so niiter mo ed sikato​—sakey a basiyan na ebat to ed mankakantiaw ed sikato, si Satanas. Isipen pa​—kekerewen ed sika na Sankatalbaan a Soberano a personal kan manggaway ebat ed sankabalegan ya isyu diad amin a panaon. Agaylan nikadkaduman responsabilidad tan pribilehyo itan parad sika! Sarag mo kasin gawaen so kekerewen ed sika nen Jehova? Agawaan itan nen Job. (Job 2:9, 10) Ontan met ed si Jesus tan ed dakerakel ni diad interon awaran, pati ed dakel a tobonbalo. (Filipos 2:8; Apocalipsis 6:9) Nagawaan mo met itan. Balet ta  sakey a bengatla so segurado, anggapo so neutral ed sayan pamaakaran. Diad ikikiwas mo, nipanengneng mo a susuportaan mo so kantiaw nen Satanas odino ebat nen Jehova. Dinan so pilien mon itandoro?

Iyaansakit Ka nen Jehova

11, 12. Kasin naapektoan si Jehova ed no pilien moy panserbi ed sikato odino andi? Ipaliwawa.

¹¹ Importante kasi ed si Jehova no dinan so pilien mo? Agta dakel lan totoo so akapanmatoor pian sikatoy nawalaan na magenap ya iyebat ed si Satanas? Tua, impilit na Diablo ya anggapo so manlilingkor ed si Jehova lapud aro, sakey ya akusasyon ya apaneknekan lan palso. Siansia, labay nen Jehova ya ondapag ka’d sikato ed isyu na inkasoberano lapud iyaansakit to ka bilang indibidual. Inkuan nen Jesus: “Ontan met ya agkaliktan nen Ama yo a wala ed tawen, a sakey ed sarayan ankekelag ya ugugaw et natawtaw.”​—Mateo 18:14.

¹² Malinew, interesado si Jehova ed kurson pilien mo. Nagkalalo ni, sikato so apektado ed satan. Ipapabitar na Biblia a si Jehova so walaan na aralem a liknaan a naapektoan ed maong odino mauges iran kiwas na totoo. Alimbawa, sanen aminpigan nanrebelde iray Israelita, si Jehova so “asakitan.” (Salmo 78:40, 41, NW) Sakbay na Delubio ed panaon nen Noe, sanen ‘abalbaleg lay kabagelan na too,’ satan so “amasinagel ed puso” nen Jehova. (Genesis 6:5, 6) Isipen pa so kabaliksan na satan. No mauges so pankurang mo, napasakitan mo so Manamalsam. Agkabaliksan na satan a maletey odino maemosyon so Dios. Imbes, inaro to ka tan iyaansakit to so pankaabigan mo. Diad biek a dapag, sano manggawa ka na maptek, napaliket mo so puso nen Jehova. Sikato so maliket, aliwa lambengat a lapud wala lamet so iyebat to ed si Satanas, noagta lapud sikato met so magmaliw lan Mananumang ed sika. Tan satan so labay ton pagmaliwan. (Hebreos 11:6) Agaylan maaron Ama ed sika si Jehova a Dios!

Saray Mayaman a Bendisyon Natan

13. Panon a say panaglingkor ed si Jehova so mangitarok la natan na bendisyon?

¹³ Saray bendisyon a nagamoran lapud panlilingkor ed si Jehova so aglambengat naeksperiensya ed arapen. Natan ni labat et dakel a tobonbalo ed limog na saray Tasi nen Jehova so nabebendisyonan tekep na gayaga tan inkapnek, tan lapud maabig a rason. “Saray panontonan nen Jehova maptek ira, pagayagaen da so puso,” so insulat na salmista. (Salmo 19:8) Magmaong ni nen say siopaman a too, amta nen Jehova no anto so maabig parad sikatayo. Panamegley nen propeta Isaias, oniay kuan nen Jehova: “Siak si Jehova a Dios mo, ya angibangat ed sika na nipaakar ed nabang mo, a mangitonton ed sika ed  dalan a laen mo komon. O no komon ta dinengel mo so saray bilin ko! Dia ed ontan say deen mo singa komon sakey ya ilog, tan say inkatunong mo singa komon daluyon na dayat.”​—Isaias 48:17, 18.

14. Panon kan natulongan na saray prinsipyo na Biblia a makapaliis ed ansakit ya epekto na otang?

¹⁴ Say itulok ed saray prinsipyo na Biblia so mangipaliis ed sika manlapud dakel ya ot-ot tan sakit na linawa. Alimbawa, ibabaga na Biblia a saramay akabayubo ed aro ed kuarta so ‘atalos na dakel a kaermenan.’ (1 Timoteo 6:9, 10) Kasin wala lay akaeksperiensya ed saray kalimog mo nipaakar ed maruksan katuaan na sayan teksto? Arum a kalangweran a lalaki tan bibii so pirmin akaotang lapud labay da lambengat so nawalaan na sanka-usoan iran kawes tan sankabaloan iran kagawaan. Agaylan ansakit a nengneng na panangaripen so pakabelatan la ed mabaybayag a babayaran tan walaay atagey ya interes, ya agmo talaga nayarian!​—Uliran 22:7.

15. Diad antoran paraan so panalimbeng ed sika na saray prinsipyo na Biblia manlapud ot-ot ya epekto na seksual ya imoralidad?

¹⁵ Nonoten met so nipaakar ed seksual ya imoralidad. Kada taon diad interon mundo et dakerakel a tin-edyer ya agni kasal so nalulukonan. Arum so nananak ya agda met nilabay nisay walaan iray pakasarag a mamabaleg. Manpapaekal met so arum tan sasagmaken da iray epekto na agonigon a konsiensia. Insan wala iray kalangweran a lalaki tan bibii ya akalay sakit ed pisesekso, a singa say AIDS. Siempre, para ed sakey a makapikabat ed si Jehova, say sankabalegan ya epekto na amin et say aderal a relasyon ed si Jehova. * (Galacia 5:19-21) Lapud maabig a rason, oniay ibabaga na Biblia: “Ibatikan yo so lawanan.”​—1 Corinto 6:18.

Panserbi ed “Maliket a Dios”

16. (a) Panon tayon naamtaan a labay nen Jehova a panliketan moy inkatobonbalom? (b) Akin ya angidatak si Jehova na saray totontonen a tumboken mo?

¹⁶ Idedeskribe na Biblia a si Jehova et “maliket a Dios.” (1 Timoteo 1:11, NW) Labay to met a maliket ka. Diad tua, ontan so ibabaga na mismon Salita to: “Panggayagaan mo so inkatobonbalom. Manliket ka legan ya ugaw ka ni.” (Eclesiastes 11:9, Today’s English Version) Balet aliwa lambengat a say kaplesan so nenengnengen nen Jehova tan natebek to so mabayag iran pansumpalan  na maong tan mauges ya awawey. Satan so rason no akin ya oniay bilin to ed sika: “Nonoten mo met so Manamalsam dia ed saray agew na inkaugaw mo, ed arapen a saray mauges ya agew onsabi, tan saray taon onasingger ira, sano ikuan mo, Andian ak na liket ed sikara.”​—Eclesiastes 12:1.

17, 18. Panon so impangibalikas na sakey a kalangweran a Kristiano nipaakar ed liket to ed panaglingkor ed si Jehova, tan panon mon naromog so ontan met a liket?

¹⁷ Natan et dakel a tobonbalo so akaromog na pirmin liket ed panaglingkor ed si Jehova. Alimbawa, oniay kuan nen 15 años a si Lina: “Walaan ak na kompiyansa tan dilin-respeto. Walaan ak na mabunigas a laman lapud ipapaliis ko ed panagsigarilyo tan druga. Walay makanan giya a niiiter ed siak panamegley na kongregasyon ya ontutulong pian makatalindeg ak ed pirmin pananesdes. Maligliga so lupak lapud walan makapabiskeg a panlilimog diad Kingdom Hall. Manuna ed amin, walaan ak na sankaabigan ya ilalo ya andi-anggaan a bilay diad dalin.”

¹⁸ Singa si Lina, dakel a Kristianon tobonbalo so mibabakal a maong parad pananisia, tan saya so mangitatarok ed sikara na liket. Momoriaen da a say bilay da​—anggaman makapaangat no maminsan​—so walaan na peteg a gagala tan tuan arapen. Mantultuloy ka sirin a manlingkor ed Dios a peteg a mangiyaansakit ed pankaabigan mo. Paliket mo so puso to, tan paliketen to ka natan tan diad ando lan ando!​—Salmo 5:11.

[Saray paimano ed leksab]

Kasin Natandaan Mo?

• Anton kapeligroan so kidudungetan mo manlapud ‘mauges a sakey,’ si Satanas?

• Panon mon napaliket so puso nen Jehova?

• Panon so pangipapabitar na Biblia ya iyaansakit ka nen Jehova?

• Anto so arum ed saray bendisyon a nagamoran manlapud panaglingkor ed si Jehova?

[Tepetepet Parad Panagaral]

[Kahon/Litrato ed pahina 13]

Nigapol Lawari so Sakey a Matunong a Too

Si Asap et kabkabat a Levitan managtogtog ed templo nen Jehova diad Israel nensaman. Sikato ni ingen so anibukel ed saray kantan inusar ed mapublikon panagdayew. Balet, anggaman ed nikadkaduma iran pribilehyo to, walay panaon ya asagyat si Asap ed agmaridios a kondukta na saray kalimog to, a singano agnadudusan manusumlang ed saray ganggan na Dios. “Saray salisalik ngalngali a sinmipa ra wari; saray kundang ko asingsingger lawari a kinmaruskos,” so inaksobi ed saginonor nen Asap. “Ta makaibeg ak wari ed andi kalakal, sanen anengneng ko so imbulaslas na bagel.”​—Salmo 73:2, 3.

Diad saginonor et linma si Asap ed santuaryo na Dios tan impikasi to itan. Sanen amoria to iray pamaakaran diad espiritual a paraan, atalosan to a kagula nen Jehova so kaugsan tan onsabi panaon et anien na marelmeng tan matunong so intanem da. (Salmo 73:17-20; Galacia 6:7, 8) On, saray marelmeng so walad andanglel a paspasen. Diad kaunoran, nabaktar ira sano deralen nen Jehova iyan agmaridios a sistema.​—Apocalipsis 21:8.

[Saray litrato ed pahina 15]

Interesado si Jehova ed pankaabigan mo, bangta say getma nen Satanas et deralen ka

[Litrato ed pahina 16]

Dakel a tobonbalo so makakaromog na pirmin liket diad panaglingkor ed si Jehova kaiba iray kaparan Kristiano