Propesiya nen Isaias​—Liwawa Parad Amin a Katooan II

Kapitulo Desi Otso

Pinabilay nen Jehova so Espiritu na Saray Duka

Isaias 57:1-21

1. Anton panamaseguro so inter nen Jehova, tan antoran tepet so pinalesa na saray salita to?

 “ONIA so kuan na Atagey tan Baleg a manayam ed ando lan ando, a say ngaran to sikato so Santo: Manayam ak ed atagey tan masanto a pasen, pati say walaan na sakey ya espiritu a mauyamo, pian bilayen ko lamet so espiritu na mauyamo tan pian bilayen ko lamet so puso na nansibkel.” (Isaias 57:15) Ontan so insulat nen propeta Isaias nen komawalon siglo K.K.P. Anto ta so agawa ed Juda kanian makapaseseg a tuloy iyan mensahe? Panon a makatulong irayan apuyanan a salita ed saray Kristiano natan? Say pangonsidera ed Isaias kapitulo 57 so ontulong ed sikatayon mangebat ed saratan a tepet.

‘Onasingger Kayo Dia, Sikayo a Lalaki’

2. (a) Kapigan so ompatnag a kiyaplikaan na saray salita na Isaias kapitulo 57? (b) Anto so kipapasen na saray matunong ed panaon nen Isaias?

² Ompatnag a sayan kabiangan na propesiya nen Isaias so onaplika ed mismon panaon nen Isaias. Konsideraen no panon so inkigalet a tuloy na karelmengan: “Say matunong natawtaw, et anggapo so too a mangyan ed sikato ed puso; et saray manangasi a totoo naekal ira, anggapo so manisip a say matunong naekal a manlapu ed mauges ya onsabi. Sikato onloob ed deen; sikara manpainawa ra ed saray dukolan da, balang sakey a manakar ed inkatunong to.” (Isaias 57:1, 2) No nabaktar so sakey a matunong a too, anggapo so mangiyansakit. Agbalot im-imanoen so ag-ilaloan ya impatey to. Say iyugip to ed patey so mangitarok ed sikato na deen, a mangibulos ed sikato manlapud panamairap na saray agmaridios tan ed desyang. Say nasyon a pinili na Dios so nilereg la ed makapasinagem a kipapasen. Balet talagan napaseseg iramay mansiasiansian matoor lapud pakaamta ya aglambengat iimanoen nen Jehova so nagagawa noagta susuportaan to met ira!

3. Panon so impanawag nen Jehova ed marelmeng a kailalakan na Juda, tan akin?

³ Tinawag nen Jehova so marelmeng a kailalakan na Juda, a kuanto: “Onasingger kayo dia, sikayo anak a lalaki na manag-anito, ilalak na mikakalugoran tan balangkantis.” (Isaias 57:3) Saratan a makapabaing a deskripsion so manepeg ed sikara bilang ananak a lalaki na manag-anito tan ilalak na managkalugoran tan balangkantis. Say palson panagdayew a binalingan da so mangilaktip ed makapagulgula iran gawa na idolatriya tan espiritismo ontan met ed imoral iran agamil ed sekso. Kanian oniay intepet nen Jehova ed sarayan managkasalanan: “Sumpa ed siopa so nanmudmoraan yo? Sumpa ed siopa so pangisangiyan yo na sangi, tan pangidilatan yo na dila? Aliwa ta a sikayo so saray anak na impakasumlang, sakey ya ilalak na inkatila; sikayo a parlangan yo so saray laman yo ed pegley na saray roble, ed silong na balang malambot a kiew, a mamatey na saray anak ed saray lawak, ed lepsag na saray letak na saray bato?”​—Isaias 57:4, 5.

4. Anto so nankasalananan na saray marelmeng ed Juda?

⁴ Saray marelmeng ed Juda so maparungtal ya angagamil na makapatalagnaw a paganon panagdayew da, a ‘manmumudmora.’ Minudmora da iray propeta na Dios a nibakin mangipetek ed sikara, a dinidilatan da ira diad makapabaing tan agmarespeton andawes. Anggaman ananak ira nen Abraham, saray rebelyoson dalan da so nanggawa ed sikaran ananak na impakasumlang tan say bini na katilaan. (Isaias 1:4; 30:9; Juan 8:39, 44) Diad leet na angkakabaleg iran kiew diad kapugaroan, pinapetang da so marelihyoson liknaan da ed idolatroson panagdayew da. Tan agaylan maruksan panagdayew itan! Agayla, pinapatey da ni ingen so dilin ananak da, a singa saray nasyon a lapud makapadimla iran agamil da et pinatakyas ira nen Jehova diad dalin da!​—1 Arari 14:23; 2 Arari 16:3, 4; Isaias 1:29.

 Pangiyibung ed Apay ya Iinumen Diad Kabatoan

5, 6. (a) Anto so pinili nin gawaen na saray manaayam ed Juda imbes a mandayew ira ed si Jehova? (b) Panon a parungtalan tan inkalapagan so impandayew na Juda ed talintao?

⁵ Imanoen pa no panon so inkigalet na saray manaayam ed Juda diad idolatriya: “Diad laet na saray malinis a batobato na lawak sikato so betang mo: sikara, sikara so kapalaran mo; ed sikara lanlamang so angibongan mo na bagat ya inumen, sika angiyapay ka na sakey a panangigalang. Napipakna ak ta ed saraya a bengatla?” (Isaias 57:6) Saray Judio so totoon akisipanan ed Dios, balet ta imbes a sikatoy dayewen da, nandokdok iray batobato ed ilog tan ginawa da iratan a dirios. Inyabawag nen David a si Jehova so betang to, balet sarayan managkasalanan so amili ed andiay-bilay iran baton talintao bilang say pakapalaran da tan inyibung da ed saratan iray apay ya iinumen. (Salmo 16:5; Habacuc 2:19) Anton pakaligliwaan so naromog nen Jehova ed ontan a pikewet a panagdayew na totoon mangirerepresenta ed ngaran to?

⁶ Diad inerman​—diad silong na angkakabaleg a kiew, diad saray patar, diad saray pukdol, diad saray syudad da​—angagamil so Juda na idolatriya. Balet naiimano nen Jehova itan ya amin, tan diad panamegley nen Isaias et inwalwal To so inkauges da: “Dia ed tapew na atagey tan baleg a palandey impasen mo so dukolan mo: diman met tinmatdang ka a mangiyapay na bagat. Dia ed sanib na saray pinto tan saray lusek impasen mo so pakanodnonotan.” (Isaias 57:7, 8a) Diad atagey iran pasen, diman so nanggawaan na Juda na dukolan na espiritual a karutakan to, tan diman so angiyapayan to na bagbagat ed sankailin dirios. * Anggan saray pribadon kaabungan so walaan na saray talintao ed beneg na puerta tan diad saray lusek da.

7. Tekep na anton awawey ya angagamil so Juda na imoral a panagdayew?

⁷ Arum so nayarin manumameng no akin a nigalet a maong so Juda ed marutak a panagdayew. Wala kasi so mabibiskeg a puersa ya amaskar ed sikaton ikaindan si Jehova? Say ebat et anggapo. Mabulos tan magunaet to itan a ginawa. Oniay kuan nen Jehova: “Sika pinmatnag ka ed sananey ya aliwa a siak, et tinmatdang ka; pinabaleg mo so dukolan mo, et akisipan ka ed sikara: sika inarom so saray dukolan da ed anggan iner ya akanengnengan mo.” (Isaias 57:8b) Say Juda so akisipanan ed saray palson dirios to, tan pinabli to so agmanepeg a pirerelasyonan to ed saratan. Nagkalalo nin inaro to so imoral iran agamil ed sekso​—pati say panangusar ed saray simbolo na kayarian na laki​—a pakabidbiran ed panagdayew ed sarayan dirios!

8. Diad siopan ari a nagkalautlan kinmayat so idolatriya diad Juda?

⁸ Say deskripsion na imoral a tuloy tan maruksan panagdayew ed talintao so mitunosan ed amta tayo la nipaakar ed pigaran marelmeng ya arari ed Juda. Alimbawa, si Manases so angipaalagey ed saray atagey a pasen, angiletneg na saray altar parad Baal, tan angiyan na saray palson relihyoson altar diad duaran saban na templo. Imparalan to’d apoy iray ilalak to, angagamil na panagsalamangka, angusar na panagparles, tan angiyalibansa ed saray agamil na espiritismo. Inyan met nen Arin Manases so ginawa ton imbolik a talintao na sagradon lusek diad templo nen Jehova. * Sinagyat to so Juda a manggawa na “mauges a lalo nen say ginawa na saray nasyon a si Jehova binagbag to.” (2 Arari 21:2-9) Panisiaan na arum ya impapatey nen Manases si Isaias, anggaman say ngaran nen Manases so agpinmatnag ed Isaias 1:1.

“Ingganggan Mo so Saray Ibabakim”

9. Akin ya ingganggan na Juda iray ibabaki diad “arawi”?

⁹ Mas aloor ni so impakalukso na Juda nen say impanlingkor to ed palson dirios. Diad impangusar nen Jehova ed si Isaias bilang pinagkasangiyan to, oniay kuan To: “Sika linma ka ed ari [“Melech,” NW] ya intarok mo so larak, et pinarakel mo so saray balingit mo, et ingganggan mo so saray ibabakim ed arawi, et pinaabebam so inkasika angga met lanlamang ed Sheol.” (Isaias 57:9) Say agmatoor a panarian na Juda so linma ed “Melech,” “say ari” ed Hebreon salita​—a nayarin ari ed arum a bansa​—a mangiyoopresi ed sikato na saray mabli tan balibali iran regalo, ya insimbolo na larak tan saray ambalingit ya ipupuyok. Ingganggan na Juda iray ibabaki diad ararawin pasen. Akin? Pian tangguyoren iray Gentil a nasyon a mialyansa ed sikato diad mapolitikan paraan. Lapud impulisay to si Jehova, nanmatalekan to so arari ed arum a bansa.

10. (a) Panon so impialyansa nen Arin Ahaz ed ari na Asirya? (b) Diad anton paraan ya ‘inyabeba na Juda so inkasikato diad Sheol’?

 ¹⁰ Sakey lan alimbawa na saya et diad panaon nen Arin Ahaz. Lapud nasesesga ed impanalyansa na Israel tan Sirya, satan ya agmatoor ya ari na Juda so angibaki na saray mensahero ed si Tiglat-pileser III na Asirya, a kuanto: “Siak so aripen mo tan anak mo: ontatdang ka, tan ilaban mo ak ed lima na ari ed Sirya, tan diad lima na ari ed Israel, ya inmalagey ira sumpa ed siak.” Angipawit si Ahaz na pilak tan balitok bilang pasuksok ed ari na Asirya, tan kinmiwas so ari, ya inggapo to so makapadesyang ya inyataki ed Sirya. (2 Arari 16:7-9) Diad impideneng to ed saray Gentil a nasyon, linmeksab so Juda ed “saray kaaralman na Sheol.” (An American Translation) Lapud saratan ya impideneng to, sikato so ompatey, odino ontunda lan magmaliw ya independentin nasyon a walaay ari.

11. Anton palson inkaligen so ipapatnag na Juda?

¹¹ Intuloy nen Jehova ya inkuan ed Juda: “Sika abanalan ka ed inkarukey na dalan mo; anggan ontan agmo inkuan, Sikato so maapa: sika akaromog ka na mamakasil ed biskeg mo; kanian agka apunaw.” (Isaias 57:10) On, nansagpot a maong so nasyon diad saray apostatan dalan to, tan agto atebek ya anggapoy ilalo na saray panggugunaetan to. Diad pisunian et papalikdoen to so inkasikato a sikatoy ontatalona ed dili ton pakayari. Iisipen ton sikatoy mabiskeg tan mabunigas. Agaylan makulangkulang!

12. Antoran kipapasen ed Kakristianoan so mipara ed saramay walad Juda?

¹² Natan et wala met so sakey ya organisasyon a mangipanonot ed Juda diad panaon nen Isaias. Uusaren na Kakristianoan so ngaran nen Jesus, balet sikatoy miaalyansa ed saray nasyon tan pinano to na taltalintao iray pasen a pandadayewan to. Saray ontutumbok ed sikato so angiletneg ni ingen na taltalintao diad ayaman da. Imbagat na Kakristianoan iray kalangweran to diad saray bakal na nasyones. Agaylan makapaopendi itan ed tuan Dios, ya angiganggan ed saray Kristiano ya: “Ibatikan yo so saray talintao”! (1 Corinto 10:14) Diad impibali to ed politika, say Kakristianoan so ‘nanggawa na pilalawanan ed saray arari ed dalin.’ (Apocalipsis 17:1, 2) Diad tua et sikato so manunan onsusuporta ed Nasyones Unidas. Anto so manatalaran ed sayan relihyoson balangkantis? Bueno, anto so imbaga nen Jehova ed kapadpara na satan, say agmatoor a Juda, a nagkalalo lan inrepresenta na kabiseran syudad to, say Jerusalem?

‘Saray Tinipon Mo et Agda Ka Niyagel’

13. Anton ‘panagtila’ so inagamil na Juda, tan panoy inkiwas to ed panaanos nen Jehova?

¹³ “Siopa so atakotan mo tan inkiwalaan mo dia ed takot, pian sika mantila ka?” so intepet nen Jehova. Matukoy a tepet! Say Juda so maseguron agmangipapanengneng na mabunigas tan maridios a takot ed si Jehova. Ta no andi, sikato so agmagmaliw komon a nasyon na matitila tan managdayew ed saray palson dirios. Oniay intuloy ya inkuan nen Jehova: “Agmo ak ninonot odino sikato so inggaton mo ed puso? Agko ta binembenan nensaman so deen ko ed abayag a panaon, et sika agka tinmakot ed siak?” (Isaias 57:11) Si Jehova so nansiansian mareen, ya agton tampol indapo so pananusa ed Juda. Kasin inapresya itan na Juda? Andi, minoria to so panaanos na Dios bilang agpananginenen. Anggapo lan balot so takot to ed Sikato.

14, 15. Anto so imbaga nen Jehova nipaakar ed saray gawa na Juda tan “saray tinipon” to?

¹⁴ Balet, mangangga so panaon na panaanos na Dios. Diad pantatalaran ed satan a panaon, oniay inyabawag nen Jehova: “Ipaliwawak naani so inkatunong mo; et no nipaakar ed saray gawam, sikara ag-ira makanabang ed sika. Sano oningal ka, saray tinipon mo yagel da ka komon; balet say dagem alaen to ra naani, sakey a sibok itaynan to ra ya amin.” (Isaias 57:12, 13a) Iwalwal nen Jehova so pantunongtunongan na Juda. Anggapoy kakanaan na saray pansimpisimpitan to. “Saray tinipon” to, amin a taltalintao to, so agmakapangiliktar ed sikato. Sano ondapo so desyang, saray dirios a panmamatalkan to so isiplog lambengat na dagem.

¹⁵ Saray salita nen Jehova so asumpal nen 607 K.K.P. Satan so agawa sanen dineral nen Arin Nabucodonosor na Babilonia so Jerusalem, pinoolan to so templo, tan kinautibo to so maslak a totoo. “Dia ed ontan say Juda nipaway a dinakep a nanlapu ed dalin to.”​—2 Arari 25:1-21.

16. Anto so manatalaran ed Kakristianoan tan ed arum a kabiangan na “Babilonia a Baleg”?

¹⁶ Mipadpara, say dakel ya atipon a taltalintao na Kakristianoan so agmakapangiliktar ed sikato diad agew na sanok nen Jehova. (Isaias 2:19-22; 2 Tesalonica 1:6-10) Naderal so Kakristianoan kaiba so arum nin kabiangan na “Babilonia a Baleg”​—say sankamundoan ya empiryo na palson relihyon. Say simbolikon eskarlatan-kolor ya atap ya ayep tan say samploran saklor to et “gawaen da [so Babilonia a Baleg] a maermen tan labos-lakseb, tan kanen da so laman to, tan sikato so lablabasen dan poolan ed apoy.” (Apocalipsis 17:3, 16, 17) Agaylan liket tayo diad  impangunor ed ganggan ya: “Ompaway kayo ed sikato, baley ko, pian agkayo nalanor ed saray kasalanan to, tan agkayo manlikna ed saray bakbak to”! (Apocalipsis 18:4, 5) Agtayon balot komon ompapawil ed sikato odino ed saray dalan to.

“Say Onapireng ed Siak Kayarianen To Naani so Dalin”

17. Anto so nisipan ed saray ‘onapireng ed si Jehova,’ tan kapigan itan a nagawa?

¹⁷ Komusta balet so ontumbok iran salita na propesiya na Isaias? “Say onapireng ed siak kayarianen to naani so dalin, tan tawiren to naani so masanto a palandey ko.” (Isaias 57:13b) Siopa so pitotongtongan nen Jehova natan? Sikato so onnenengneng ed panaon a labas ni na onsabin desyang tan ipapasakbay to so kibulos na totoo to manlapud Babilonia tan say kipawil na tuan panagdayew diad masanton palandey to, diad Jerusalem. (Isaias 66:20; Daniel 9:16) Agaylan lapuan na panamaseseg itan ed siopaman a Judio a mansiasiansian matoor! Niarum ni, oniay kuan nen Jehova: “Sikato ikuan to, Tabonan yo, tabonan yo, itadia yo so dalan, ekalen yo so kigapolan ed dalan na baley ko.” (Isaias 57:14) Sano onsabi so panaon na pangiliktar na Dios ed totoo to, niparaan so dalan, a naekal so amin a babeng.​—2 Awaran 36:22, 23.

18. Panon ya adeskribe so kinaatagey nen Jehova, ingen ta anton maaron panagpaga so ipapatnag to?

¹⁸ Satan a punto so angisiglaotan nen propeta Isaias ed saray salitan inaon ed gapo: “Onia so kuan na Atagey tan Baleg a manayam ed ando lan ando, a say ngaran to sikato so Santo: Manayam ak ed atagey tan masanto a pasen, pati say walaan na sakey ya espiritu a mauyamo, pian bilayen ko lamet so espiritu na mauyamo tan pian bilayen ko lamet so puso na nansibkel.” (Isaias 57:15) Say trono nen Jehova so walad sankatageyan a katawenan. Anggapo lay kipapasen a mas atagey odino matalonggaring ni nen say satan. Agaylan makapaligliwan naamtaan a manlapu diman et nanengneng to so amin a bengatla​—aliwan saray kasalanan labat na marelmeng noagta ontan met ed saray matunong a gawa na saramay manggugunaet a manlingkor ed sikato! (Salmo 102:19; 103:6) Niarum ni, narerengel to iray ey-ey na saray lalamesen tan pabilayen to iray kapusoan na saray papairapen. Sarayan salita so talagan anenyeg ed kapusoan na saray magbabawin Judio diad kadaanan a panaon. Maseguron tetenyegen met na saratan so kapusoan tayo natan.

19. Kapigan manampot so sanok nen Jehova?

¹⁹ Makapaligliwa met iray kaaruman a salita nen Jehova: “Agak naani misangsangan lawas, agak naani onsanok lawas; ta say espiritu napunaw komon ed arap ko, tan saray kamarerwa a ginawak.” (Isaias 57:16) Anggapo ed saray pinalsa na Dios so makaliktar no magnayon tan tuloytuloy so sanok nen Jehova. Balet makapaliket ta say sanok na Dios et dia lambengat ed nigeter a panaon. Sano nasumpal na satan so gagala to, ontunda met lanlamang itan. Sayan apuyanan ya aralem a pakatalos so ontulong ed sikatayon nabayuboan so aralem ya apresasyon ed panangaro nen Jehova ed pinalsa to.

20. (a) Panon a pidenengan nen Jehova so agmagbabawin managgaway-mauges? (b) Diad anton dalan a liligliwaen nen Jehova so mansisibkel?

²⁰ Nagamoran tayo ni so aralem a pakatalos diad pangituloy nen Jehova. Unona et oniay kuanto: “Lapu ed inkauges na inkaagum to nasnokan ak; et sikato so kinabil ko; insanib ko so lupak et nampasnok ak; et sikato tinmuloy ed kasisipa na puso to ed dalan.” (Isaias 57:17) Saray agawan makapuy lapud agum so maseguron sanokan na Dios. No rebelyoso nin siansia so puso na sakey, si Jehova so mansiansian onsanok. Balet panon to no onkiwas so rebelyoso unong ed disiplina? Ipanengneng ed satan nen Jehova no panon a say panangaro tan panangabagey to so mamakiwas ed sikato: “Anengneng ko so saray dalan to, tan sikato naani tambalen ko: sikato naani itonton ko met, tan ipawil ko naani so saray ligliwa ed sikato tan ed saray manamaermen to.” (Isaias 57:18) Kayari na panisiplina to, paabigen nen Jehova so mansisibkel tan sikatoy ligliwaen To, pati saramay mieermen ed sikato. Satan so rason no akin ya akasempet iray Judio nen 537 K.K.P. Tua, say Juda so aglan balot magmaliw ya independentin panarian ya uuleyan na ari a kapolian nen David. Balet, nipaalagey lamet so templo, tan nipawil so tuan panagdayew.

21. (a) Panon a pinabilay nen Jehova so espiritu na saray alanaan a Kristiano nen 1919? (b) Anton kalidad so maabig a bayuboan tayo bilang indibidual?

²¹ “Say Atagey tan Baleg,” si Jehova, so angipatnag met na kapagaan ed pankaabigan na saray alanaan a nakdaan nen 1919. Lapud mansisibkel tan mapaabeban espiritu ra, mapangasin inimano na baleg a Dios a si Jehova so paniirap da tan inliktar to ra manlapud impangautibo na Babilonia. Inekal to so amin a pakatiroran tan intonton to ira ed kawayangan ta pian makapangisaklang ira na puron panagdayew ed sikato. Kanian wala so kasumpalan ed saman na saray salita nen Jehova panamegley nen Isaias. Tan lugan na saratan a salita iray magnayon a prinsipyo ya onaplika met ed balang sakey ed sikatayo. Aawaten lambengat  nen Jehova so panagdayew na saramay mapaabeba ed kanonotan. Tan no makapankasalanan so sakey ed saray lingkor na Dios, nepeg a sikatoy maples a mamidbir ed lingo to, mangawat na panamaat, tan ipetek to iray dalan to. Agtayon balot komon lilingwanan a papaabigen tan liligliwaen nen Jehova iray mapaabeba balet ta ‘susumpaen to so atagey a linawa.’​—Santiago 4:6.

‘Deen ed Saramay Walad Arawi tan Walad Asingger’

22. Anton arapen so impasakbay nen Jehova parad saray (a) magbabawi? (b) marelmeng?

²² Oniay inyabawag nen Jehova pian panparengen to so arapen na saramay magbabawi tan saramay mansiansia ed marelmeng iran dalan da: “Mamalsa ak na bunga na saray bibil: Deen, deen, ed saman so wala ed arawi tan ed saman so wala ed asingger, . . . et sikato naani tambalen ko. Balet saray marelmeng singa ra saray nagulo a dayat; ta agto nayarian so onlinak tan saray danum to mangibuntok ira na pitek tan dutak. Anggapo so deen . . . ed saray marelmeng.”​—Isaias 57:19-21.

23. Anto so bunga na saray bibil, tan diad anton dalan a ‘papalsaen’ nen Jehova itan a bunga?

²³ Say bunga na bibil et say bagat na panangidayew ya isasaklang ed Dios, salanti, say mapublikon panangiyabawag ed ngaran to. (Hebreos 13:15) Panon a ‘papalsaen’ nen Jehova itan a mapublikon panangiyabawag? Ta pian makapangiyapay na bagat na panangidayew, kaukolan nin aralen ya unona na indibidual so nipaakar ed Dios insan mangagamil na pananisia ed sikato. Say pananisia​—a bunga na espiritu na Dios​—so mamakiwas ed satan a too pian ibaga ed arum no anto so nadngelan to. Diad arum a salita, sikato so mapublikon mangiyabawag. (Roma 10:13-15; Galacia 5:22) Nepeg met a tandaan a si Jehova so alenleneg ya angiganggan ed saray lingkor to a mangiyabawag ed kirayewan to. Tan si Jehova so mangibulos ed totoo to, pian sikara so makapangiyapay na ontan iran bagat na panangidayew. (1 Pedro 2:9) Kanian, nibaga a pinalsa nen Jehova itan a bunga na saray bibil.

24. (a) Siopa so makaeksperiensya ed deen na Dios, tan anto so resulta? (b) Siopa so agmakaeksperiensya na deen, tan anto so resulta parad sikara?

²⁴ Agaylan makapasagyat a bunga na saray bibil so iyaapay na saray Judio legan iran ompapawil ed binalegan dan dalin a mankakanta na panangidayew ed si Jehova! Seguradon sikara so maliket a makaeksperiensya ed deen na Dios, balanglan sikara so ‘walad arawi’​—arawi ed Juda, a siansia nin manaalagar a makasempet​—odino ‘walad asingger’​—a wala la’d binalegan dan dalin. Diad malaknab a pidumaan, agaylay pidumaan na saray kipapasen na saray marelmeng! Siopaman ya ag-onkiwas ed pananisiplina nen Jehova, saray marelmeng so andian a balot na kareenan, siopaman ira tan inerman so kawalaan da. Singa say madaluyon a dayat, mamawala ira na, aliwan say bunga na bibil, noagta say “pitek tan dutak,” amin a bengatlan marutak.

25. Panon a naeksperiensya na dakel a manlapud arawi tan asingger so kareenan?

²⁵ Natan met, saray managdayew ed si Jehova diad nanduruman pasen so mangiyaabawag ed maong a balita na Panarian na Dios. Saray Kristiano a walad nanduruman pasen diad masulok a 230 a daldalin so mangiyaapay na bunga na saray bibil da, a mangiyaabawag ed panangidayew da ed alenleneg a tuan Dios. Saray panangidayew a kakantaen da so narerengel “manlapud sampot na dalin.” (Isaias 42:10-12) Saramay makakarengel ed saray balikas tan ebat da so mangaawat ed katuaan na Salitay Dios, say Biblia. Saratan so makaeksperiensya na kareenan, a nagamoran labat diad panaglingkor ed “Dios na kareenan.”​—Roma 16:20.

26. (a) Anto so manatalaran ed saray marelmeng? (b) Anto so engranden sipan parad saramay mauyamo, tan anto so nepeg a determinasyon tayo?

²⁶ Tua, agtatalinengen na marelmeng so mensahe na Panarian. Balet, magano la ya agla ra naabuloyan a manggirogiro ed kareenan na saray matunong. ‘Wala ni so daiset, et say bagel onandi la,’ so insipan nen Jehova. Saramay papasalimbengan ed si Jehova so manawir ed dalin diad makapakelaw a paraan. “Saray mauyamo tawiren da naani dalin, tan manliket ira a dili ed inkadaakan na kareenan.” (Salmo 37:10, 11, 29) Agaylan dakep a pasen so dalin tayo ed satan a panaon! Komon ta amin tayo so determinado ya agbalot ibalang so kareenan ya ipapagamor na Dios, ta pian makapankanta itayo na panangidayew ed Dios diad andi-anggaan.

[Saray paimano ed leksab]

[Tepetepet Parad Panagaral]