Sikayoran Kalangweran​—Kasin Papaaligwasen Yo so Espiritualidad Yo?

“ANGGAMAN onaatendi ak ed saray Makristianon miting, anggapoy mabiskeg a pilalek kon manlingkor ed si Jehova,” so inkuan nen Hideo legan ton nononoten so impanhaiskul to. “Mabetbet kon piugagep a siak so bantog ed saray kaklasek tan mankinon a manaakar-akar a kaiba so inarok. Anggapoy espesipiko iran kalat ko, tan anggapoy pilalek kon paaligwasen so espiritualidad ko.” Singa si Hideo, dakel a kalangweran so singa labat la nipapalirpalir, ya andian na pilalek a dampoten iray makagunggona a kalat odino onaligwas.

No sakey kan kalangweran, nayarin panliketan mo so migalaw odino manligliwa. Balet, no nipaakar ed saray espiritual a kimey, nayarin aliwan ontan so naliliknam. Kasin posibli a panliketan iray espiritual a kalat? Imanoen pa irayan salita na salmista: “Say panonot nen Jehova so napanmatalkan, gawaen ton makabat so andiay eksperiensya. . . . Say ganggan nen Jehova so malinis, liwawaan to so saray mata.” (Salmo 19:7, 8, NW) Say Salita na Dios so makapangiwanwan ed “andiay eksperiensya” pian makabat ya onkiwas, a “liwawaan to so saray mata” to. On, onsayaksak ka tan naliketan ka ed saray espiritual a bengatla. Balet anto so kaukolan pian naliknam itan? Iner so pangigapoan mo?

Onkiwas a Manlingkor ed Dios

Unona, nepeg a sika so napakiwas. Imanoen pa so kipapasen na kalangweran ya Arin Josias na Juda. Sanen aromog so libro na Ganggan nen Jehova diad templo, satan so impabasa nen Josias tan atenyeg a maong ed nadngel to. Say resulta et ‘inekal nen Josias iray amin a kadimla a nanlapu ed saray amin a dalin a nipabtang ed saray anak na Israel.’ (2 Awaran 34:14-21, 33) Say impanbasa ed Salita na Dios so amakiwas ed si Josias a manggawa na nagkalalo ni diad kiyalibansa na puron panagdayew.

Nabayuboan mo met so pilalek a panlingkoran si Jehova no regular mon basaen so Biblia tan dalepdepen so abasam. Satan so amakiwas ed si Hideo. Sikatoy maapit ya akilimog ed mas maedad a payunir, a sigpot-panaon a ministro na saray Tasi nen Jehova. Say payunir et maseet ya estudyante na Biblia tan nanggunaetan ton inyaplika iray bangat na satan ed bilay to. Lapud apaseseg a maong ed ehemplo na payunir, satan so inalig nen Hideo  tan abayuboan to so mabiskeg a pilalek a panlingkoran so Dios tan arum a totoo. Say espiritual ya ibubulaslas to so nanresulta ed makabaliksan a bilay.

Say inagew-agew a pambasa ed Biblia so makapasagyat ed saray kalangweran. Oniay insalaysay nen Takahiro: “Kada no onugip ak la insan namoriak ya agko ni agawaan so panagbasak na Biblia ed satan ya agew, siak so ombangon tan manbasa. Say resulta et aliknak so panangiwanwan nen Jehova. Say inagew-agew a panagbasa ed Biblia so akatulong na baleg ed ibubulaslas ko ed espiritual. Lapud determinado ak a makapibiang a nagkalalo ed serbisyo ed si Jehova, siak so nan-regular payunir a tampol kapangraduar ko ed haiskul. Tan panggagayagaan ko itan a maong.”

Likud ed panagbasa na Biblia, anto ni so makatulong ed sika pian lalon napakiwas kan mandayew ed si Jehova? Si Tomohiro so inyaralan nen ina to na katuaan ed Biblia. Inkuan to: “Ginmapo lambengat ya atenyeg so liknaan ko ed panangaro nen Jehova tan ed dondon bagat nen Jesus sanen inaral ko a maong so libron Life Does Have a Purpose diad edad a 19. Satan a pisasalamat ed panangaro na Dios so amakiwas ed siak a palaknaben so serbisyok ed si Jehova.” (2 Corinto 5:14, 15) Singa si Tomohiro, dakel a kalangweran so napapaseseg a mamaaligwas ed espiritualidad da diad pangegemtan da ed maseet a personal a panagaral ed Biblia.

Anggaman ontan, panon to no anggapo nin siansiay pilalek mon manlingkor ed si Jehova? Wala kasi natuplegan mo? Insulat nen apostol Pablo: “Ta say Dios so mankimey ed loob yo ed panlabay tan say panggawa.” (Filipos 2:13) No onkerew ka na tulong ed si Jehova diad pikakasi, mabulos to kan ikdan na masanton espiritu to, a mamabiskeg ed sikan aglabat ‘manggawa’ noagta ‘manlabay’ met. Kabaliksan na saya a pabiskegen na masanton espiritu na Dios so pilalek mon gawaen so anggaay nayarian mo a panlingkoran si Jehova tan tulongan to kan ombulaslas ed espiritual. Sigpot sirin a manmatalek ka ed pakayari nen Jehova tan pabiskeg moy pusom!

Iletneg Iray Dilin Kalat Mo

Sano determinado ka lan manlingkor a nagkalalo ed si Jehova, kaukolan a mangiletneg ka na personal iran kalat pian ombulaslas ed espiritual. Oniay inkuan nen Mana, sakey a Kristianon biin kalangweran: “Say pangiletneg ed saray kalat so baleg a tulong ed siak. Imbes a pasener ak, makapanpakpel ak ya onabanti. Legan a sankanonot ko iray kalat ko, masimoon ak a nampikasi ed si Jehova ya iwanwan to ak, tan inmaligwas ak ya anggapo so akaab-abala.”

Nepeg a saray kalat mo so realistiko tan sarag a dampoten. Say pambasa na sakey a kapitulo na Biblia ya inagew-agew et sakey a makatunongan a kalat. Sarag mo met ya igapo so pansukimat. Pian iyilustra iya ed publikasyon a wala ed Ingles, nayarin aralen mo iray kalidad nen Jehova a nilista ed subtitulon “Qualities by Name” diad silong na entry a “Jehovah” diad Watch Tower Publications Index. Walay manga 40 entry a sarag mon konsideraen, tan seguradon say pansukimat so mamaapit ed sika ed si Jehova tan managyat ed sikan manggawa na nagkalalo ni parad sikato. Kabiangan ed saray arum nin nadampot a kalat et say pankomento anggan maminsan labat legan na kada miting na Kristiano a nakaukolan so pibiang na saray dumerengel, pangabat a maong ed anggan sakey a membro na kongregasyon diad kada miting, tan agpaulyanan ya onlabas so sanagew ya ag-akapampikasi ed si Jehova tan ag-akapanpulong nipaakar ed sikato ed arum.

No agka ni akapampalista ed Teokratikon Eskuelaan Parad Ministeryo, satan so maabig a kalat parad sika. Kasin mibibiang ka la ed mapublikon ministeryo? No andi ni, nayarin kaliktan mon pankimeyan so pagmaliw ya agbautismadon manangipalapag. Natural a say onsublay a kundang et say seryoson pangonsidera ed say relasyon mo ed  si Jehova tan say pangidedikam na inkasika ed sikato. Dakel a kalangweran so manggugunaet a manbilay unong ed dedikasyon da diad pandampot ed sigpot-panaon a ministeryo.

Anggaman maabig so pakawalaan na saray kalat ed bilay, manalwar ka ompan nabayuboan mo so espiritu na pikokompetensya. Mas lalo kan naliketan ed gagawaen mo no agmo ikokompara so inkasika ed arum.​—Galacia 5:26; 6:4.

Nayarin liknaen mon aliwa kan atalitali tan nairapan kan mangiletneg na makatunongan iran kalat. Sirin et tumboken so simbawa na Biblia: “Ikiling mo so layag mo, tan denglen mo so salita na makabat.” (Uliran 22:17) Patulongan ka ed saray atateng mo odino saray arum a matatken a Kristiano. Siempre, kaukolan a makatunongan tan makapaseseg iray atateng tan saray arum ed sayan pamaakaran. Lapud nayarin nabalang so gayaga na saray kalangweran tan anggapoy gunggona ni ingen na pangiletneg na saray kalat, no nadedesdes iran manggemtan ed kalat ya indatak na arum parad sikara. Ontan so agawa ed sakey ya ugaw a bii, a kuan to: “Saray atateng ko so angiletneg na nanggegendanan a kalat parad siak, singa say panpalista ed Teokratikon Eskuelaan Parad Ministeryo, pibiang ed lawak na kimeyan, pampabautismo, tan pagmaliw a payunir. Pinasyay impansagpot ko pian nadampot so kada sakey ed saratan. Sanen adampot ko so sakey a kalat, agak kinomendaan na atateng ko, noagta, inikdan da ak lamet na sakey a kalat a dampoten. Say resulta et liknaen kon napapaskar ak a dampoten iray kalat. Naknaksawan ak tan agko aliknan apenek ak.” Anto tay problema? Susto ya amin iratan a kalat, balet agto iratan kalat a dili. Pian ontalona, kaukolan a sika so napakiwas a mangiletneg na kalat parad inkasika!

Nonot mo pay Jesu-Kristo. Sanen linma dia ed dalin, amta to no anto so iilaloan nen Ama ton si Jehova ed sikato. Parad si Jesus say panggawa ed linawa nen Jehova et aliwa labat lan kalat, noagta sakey a misyon a kaukolan a sumpalen. Panon a minoria nen Jesus so asainmin to? Inkuan to: “Say kanen ko sikato so panggawak na linawa na saman so angibaki ed siak, tan manumpal na kimey to.” (Juan 4:34) Nanggayagaan nen Jesus a ginawa so linawa nen Jehova tan sinumpal to iray iilaloan na Ama to. Singa itan tagano ed si Jesus​—sikatoy aliketan tan napnek diad impanumpal ed kimey ya iilaloan a gawaen to. (Hebreos 10:5-10) Manliket ka met sano suston napakiwas ka a manggawa ed ipapaseseg na atateng mo a gawaen mo.

Ag-onsusukon Manggawa na Maabig

Sano walaan ka lay kalat, panseetan a dampoten itan. Oniay inkuan na Galacia 6:9: “Ag-itayo sirin komon nakesawan a manggawa na maabig: pian dia ed panaon to manani itayo, noag itayo pinmakil.” Agka manmamatalek ed dilin biskeg odino abilidad mo. Seguradon walaray makasbel ed sika tan no maminsan et nayarin liknaen mon sinmaew ka. Balet papaseguroan itayo na Biblia: “Dia ed saray amin a dalan mo . . . bidbiren mo [so Dios], et sikato itonton to so saray basbas mo.” (Uliran 3:6) Tulongan ka nen Jehova legan mon pansasagpotan a dampoten iray espiritual a kalat mo.

On, diad pamayubom ed pilalek mon panlingkoran si Jehova tan diad pandampot mo ed saray espiritual a kalat, nayarian mon ‘ipatnag so ibubunam ed saray ganagana.’ (1 Timoteo 4:15) Diad ontan et nawalaan ka na makabaliksan a bilay diad panaglingkor ed Dios.

[Litrato ed pahina 9]

Say pambasa ed Biblia tan pandalepdep ed abasam so mamakiwas ed sikan manlingkor ed si Jehova

[Litrato ed pahina 10]

Sinumpal nen Jesus iray iilaloan na Ama to