‘Manaaroan Kayo ed Sakey tan Sakey’

“Lapu ed saya amin a too nabidbiran da a sikayoray babangatan ko, no wala so aro yo ed sakey tan sakey.”​—JUAN 13:35.

1. Anton kalidad so indanet nen Jesus sakbay a tuloy na impatey to?

 “ANGKELAG ya ananak.” (Juan 13:33, NW) Ontan so matamoy ya impanawag nen Jesus ed saray apostol to diad samay labi sakbay na impatey to. Anggapoy rekord tayo ed saray salaysay na Ebanghelyo a satan a maabagey a balikas so inusar la nen Jesus diad impitongtong to ed sikara. Balet, diad saman a nikadkaduman labi et sikato so apakiwas a mangusar ed satan a maaron pananawag pian ipalikna so aralem a panangaro to ed saray patumbok to. Diad tua, sinaglawi nen Jesus so aro a manga 30 danay ed saman a labi. Akin ya ontan so impangidanet to ed satan a kalidad?

2. Akin ya importantin tuloy ed saray Kristiano so pangipanengneng na aro?

² Insalaysay nen Jesus no akin ya importantin tuloy so aro. “Lapu ed saya,” kuanto, “amin a too nabidbiran da a sikayoray babangatan ko, no wala so aro yo ed sakey tan sakey.” (Juan 13:35; 15:12, 17) Say pagmaliw a patumbok nen Kristo so maapit a nisiglaot ed panangipanengneng na inaagin aro. Nabidbiran iray tuan Kristiano, aliwan diad nikadkaduman nengneng na kawes odino arum iran nikaduman kustombre, noagta diad maapit tan matamoy ya aro ra ed balang sakey. Say pakawalaan na ontan a matalonggaring a nengneng na aro so komadua ed taloran manunan kakaukolanen parad sakey a babangatan nen Kristo ya asalambit ed gapo na inmunan artikulo. Anto so ontulong ed sikatayo pian mantultuloy tayon nakapet iyan kakaukolanen?

“Gawaen Yo Itan a Nagkalalo”

3. Anton bilin nipaakar ed aro so inter nen apostol Pablo?

³ Singa naimano ed saray patumbok nen Kristo nen inmunan siglo, sayan matalonggaring ya aro so sankaimano met natan ed limog na saray  peteg a babangatan nen Kristo. Parad saray inmunan-siglon Kristiano, oniay insulat nen apostol Pablo: “No nipaakar ed aro na sanaagi, agyo kami la nakaukolan a mansulat ni ed sikayo, ta sikayon dili so binangatan la na Dios a mangaro ed sakey tan sakey; tan diad tua et gagawaen yo la itan ed amin ya agagi.” Anggaman ontan, oniay inyarum ni nen Pablo: “Gawaen yo itan a nagkalalo.” (1 Tesalonica 3:12; 4:9, 10, NW) Nakaukolan tayo met a talinengen so pananimbawa nen Pablo tan panggunaetan ya ipanengneng a “nagkalalo” so aro ed balang sakey.

4. Unong ed si Pablo tan Jesus, siopara so nepeg ya ikdan tayo na nikaduman konsiderasyon?

⁴ Diad satan met ya apuyanan a sulat, pinaseseg nen Pablo iray kapananisiaan to a ‘tambayoen iray nagogonigon a kamarerwa’ tan “antabayan iray makapuy.” (1 Tesalonica 5:14, NW) Diad sananey ya inkagawa, pinanonotan to iray Kristiano a ‘nepeg a sungdoan na saray mabiskeg so kaleteyan na makapuy.’ (Roma 15:1) Angiter met si Jesus na bilibilin nipaakar ed pananulong ed saramay maletey. Kayari ton impasakbay a sikatoy ikaindan nen Pedro diad samay labin pangerel ed sikato, oniay inkuan nen Jesus ed si Pedro: “Sano makapagbabawi ka la, pabiskegen mo so saray agagim.” Akin? Lapud ikaindan da met si Jesus kanian mankaukolan ira na tulong. (Lucas 22:32; Juan 21:15-17) Kanian, igaganggan itayo na Salitay Dios ya ipatnag tayo met so aro tayo ed saramay maletey ed espiritual tan nayarin agla mililimog ed Kristianon kongregasyon. (Hebreos 12:12) Akin a nepeg tayon gawaen itan? Mangitarya na ebat so duaran malinew ya ilustrasyon nen Jesus.

Abalang a Karnero tan Abalang a Sinsilyo

5, 6. (a) Anton duaran antikey ya ilustrasyon so indalatdat nen Jesus? (b) Anto so ipapatnag na sarayan ilustrasyon nipaakar ed si Jehova?

⁵ Pian nibangat to ed saray dumerengel to so panmoria nen Jehova ed saramay abalang la, angiter si Jesus na duaran antikey ya ilustrasyon. Say sakey so nipaakar ed managpastol. Inkuan nen Jesus: “Siopa a too ed sikayo, a walaan na sanlasus a karnero, et no nabalang so sakey ed sikara, agto taynan ed lawak so siamaplo tan siam, tan laen ton anapen so abalang, angga ed pakaromog to? Et sano aromog to la, sikatoy yan to ed abala to, a sililiket. Et sano onsabi ed abung, tiponen to so kakaaro to tan kaab-abay to, a kuan to ed sikara, Miliket kayo ed siak, ta aromog ko so karnerok ya abalang. Kuan ko ed sikayo, ya ontan met wala naani liket ed tawen nisengeg ed sakey a managkasalanan a magbabawi, nagkalalo nen dia ed saray siamaplo tan siam a matunong a totoo, ya agda kaukolan so pagbabawi.”​—Lucas 15:4-7.

⁶ Say komaduan ilustrasyon et say nipaakar ed bii. Inkuan nen Jesus: “Siopa so bii a walaan na samplora a drakma, no nabalang to so sakey, agmanelsel na silew et panisan to so abung, tan anapen to a seetan angga ed naromog to? Et sano naromog to, tiponen toray kakaaro to tan kaababay to, a kuan to, Miliket kayo ed siak, ta aromog ko so drakma ya abalang ko. Ontan met, kuan ko ed sikayo, wala so liket ed arap na saray angheles na Dios nisengeg ed sakey a managkasalanan a magbabawi.”​—Lucas 15:8-10.

7. Anton duaran leksion so ipapabitar ed sikatayo na saray ilustrasyon nipaakar ed abalang a karnero tan abalang a sinsilyo?

⁷ Anto so naaralan tayo ed sayan duaran antikey ya ilustrasyon? Ipapabitar ed sikatayo na saratan (1) no panon so nepeg a panlikna tayo ed saramay linmetey tan (2) no anto so nepeg tayon gawaen pian natulongan ira. Konsideraen tayo irayan punto.

Abalang Balet ta Pinabpabli

8. (a) Panon so inkiwas na managpastol tan say bii nipaakar ed abalang da? (b) Anto so ipapatnag na reaksion da nipaakar ed panmoria ra ed nababalang a kayarian da?

⁸ Diad parehon ilustrasyon et walay abalang, balet imanoen so inkiwas na saray makankayarian. Ag-imbaga na managpastol ya: ‘Anto so kakanaan na sakey a karnero anta wala ni so 99 a karnerok? Agko la nakaukolan itan a karnero.’ Agmet imbaga na bii ya: ‘Akin a panaburidoan koy sakey a sinsilyo? Kontento ak la ed siameran walad siak.’ Imbes, inanap na managpastol so abalang a karnero to a singano alenleneg itan a kayarian to. Tan alikna met na bii so inkabalang na sinsilyo to a singano anggapo lay arum a sinsilyo to. Diad parehon ilustrasyon et mabmabli  ed isip na makankayarian so abalang a bengatla. Anto so iyiilustra na saya?

9. Anto so iyiilustra na panagpaga ya impatnag na managpastol tan say bii?

⁹ Imanoen so inkuan nen Jesus diad parehon situasyon: “Ontan met wala naani liket ed tawen nisengeg ed sakey a managkasalanan a magbabawi” tan “ontan met, kuan ko ed sikayo, wala so liket ed arap na saray angheles na Dios nisengeg ed sakey a managkasalanan a magbabawi.” Ipapatnag sirin na impampaga na managpastol tan say bii, diad melag a paraan, so liknaan nen Jehova tan saray mangatatawen a pinalsa to. No panon a say abalang et mabmabli ed imaton na managpastol tan say bii, saramay kinmasipa tan agla mililimog ed totoo na Dios et mabli nin siansia ed imaton nen Jehova. (Jeremias 31:3) Saratan ya indibidual so nayarin maletey ed espiritual, balet ta aliwa met iran rebelyoso. Anggaman ed maletey lan kipapasen da, diad sakey a laknab et nayarin uunoren da ni iray kakaukolanen nen Jehova. (Salmo 119:176; Gawa 15:29) Kanian, singa met nensaman a panaon, si Jehova so agbengatbengat a ‘mangibantak ed sikara manlapu ed arapan to.’​—2 Arari 13:23.

10, 11. (a) Panon tayon moriaen iramay kinmasipa ed kongregasyon? (b) Unong ed duaran ilustrasyon nen Jesus, panon tayon nipatnag so panagpaga tayo ed sikara?

¹⁰ Singa si Jehova tan si Jesus, sikatayo so mapaga met a tuloy nipaakar ed saramay maletey tan agmakapililimog ed Kristianon kongregasyon. (Ezequiel 34:16; Lucas 19:10) Moriaen tayo so indibidual a maletey ed espiritual bilang abalang a karnero​—aliwan bilang andian lay ilalo. Agtayo ikatunongan ya: ‘Akin a panaburidoan so maletey? Sikato so agla nakaukolan na kongregasyon.’ Imbes, singa si Jehova et moriaen tayon makanakana iramay kinmasipa a malabay lan ompawil.

¹¹ Balet, panon tayon nipatnag so panagpaga tayo ed sikara? Ipapabitar na duaran ilustrasyon nen Jesus a nagawaan tayo itan (1) diad pangipatnag lan unona na interes, (2) diad pagmaliw a matamoy, tan (3) diad pagmaliw a masimoon. Sansakeyen tayo pan imanoen irayan aspekto.

Ipatnag lan Unona so Interes

12. Anto so ipapabitar ed sikatayo na saray salitan ‘anapen so nababalang’ nipaakar ed awawey na managpastol?

¹² Diad primero ed duaran ilustrasyon, imbaga nen Jesus a say managpastol so ‘mananap ed nababalang.’ Kinmiwas lan tampol so managpastol tan nansagpotan ton inanap so karnero. Say irap, kapeligroan, tan kaarawi so ag-angamper ed sikato. Diad kasunian, nanseet so managpastol ‘angga ed naromog to itan.’​—Lucas 15:4.

13. Panon a kinmiwas iray matoor a lalaki nensaman ed saray pankaukolan na saray maletey, tan panon tayon aligen iratan ya alimbawa ed Biblia?

¹³ Mipadpara, mabetbet a kakaukolanen ed panulong ed toon mankaukolan na panamaseseg so ikiwas lan unona na mabiskeg. Atebek itan na saray matoor a lalaki nensaman. Singa bilang, sanen naimano nen Jonathan, say ilalak nen Arin Saul, a mankaukolan na panamaseseg so maapit a kaaro ton si David, si Jonathan so “inmalagey, tan linma ed David ed kakiewan, tan pinabiskeg to so lima to ed Dios.” (1 Samuel 23:15, 16) Kayari na pigaran siglo, sanen naimano nen Gobernador Nehemias ya adismaya so pigara ed saray Judion agagi to, sikato so ‘inmalagey a tampol’ tan pinaseseg to ira a ‘nodnonoten da so Katawan.’ (Nehemias 4:14) Labay tayo  met natan so ‘onalagey’​—a mangipatnag lan unona na interes​—pian pabiskegen iramay maletey. Balet siopa ed kongregasyon so nepeg a manggawa ed satan?

14. Siopara ed loob na Kristianon kongregasyon so nepeg ya ontulong ed saramay maletey?

¹⁴ Nagkalautla, saray Kristianon mamatatken, so walaan na responsabilidad a ‘mamabiskeg ed saray makapuy a lima, mamakasil ed saray makapuy a pueg’ tan ‘mangikuan ed saray matakot a puso, Manpabiskeg kayo, agkayo antakot.’ (Isaias 35:3, 4; 1 Pedro 5:1, 2) Balet imanoen pa a say bilin nen Pablo a “tambayoen iray nagogonigon a kamarerwa” tan “pabiskegen iran makapuy” so aglambengat niiter ed saray mamatatken. Imbes, nipaarap iratan a salita nen Pablo ed interon “kongregasyon na saray taga-Tesalonica.” (1 Tesalonica 1:1; 5:14, NW) Say panulong ed saramay maletey so gawaen sirin na amin a Kristiano. Singa say managpastol ed ilustrasyon, kada Kristiano so nepeg a napakiwas a ‘mananap ed abalang.’ Siempre, saya so mas epektibon nagawaan no mitulongan ed saray mamatatken. Wala kasi nagawaan yo pian natulongan so maletey diad kongregasyon yo?

Magmaliw a Matamoy

15. Akin ya ontan so inkiwas na managpastol?

¹⁵ Anto so gawaen na managpastol sano naromog ton siansia so abalang a karnero? “Sikatoy ‘yan to ed abala to.” (Lucas 15:5) Agaylan makapatenyeg tan makapasagyat a salaysay! Nayarin nanteyengteyeng la so karnero ed loob na pigaran agew tan labi diad agkabisadon lugar, a nayarin nipaarap ni ingen ed pananesga na saray manisimaw a leon. (Job 38:39, 40) Andi-duaruwan makapkapuy lay karnero lapud eras. Keretkeret la itan pian natalonaan to ni ed dilin biskeg to iray babeng a naabet to diad dalan a papawil ed kasimpukokan. Kanian, ontalimukor so managpastol, tan matamoy ton alsaen so karnero, tan awiten to itan a dalanan ton amin iray babeng no papawil la ed kasimpukokan. Panon tayon nipatnag met so panangasikaso na sayan managpastol?

16. Akin a nepeg tayon ipatnag so inkamatamoy ya impatnag na managpastol ed abalang a karnero?

¹⁶ Say too ya agla makapililimog ed kongregasyon so nayarin naksawan la ed espiritual a pantalos. Singa say karnero a nisian ed managpastol, satan ya indibidual so nayarin manteteyengteyeng ed maruksan kaliberliber na sayan mundo. Lapud anggapo ed pananalimbeng na kasimpukokan​—say Kristianon kongregasyon, sikato so lalon nipaarap ed saray panangataki na Diablo, a ‘wala ed kaliberliber a singa omoang a leon a mananap na buagen to.’ (1 Pedro 5:8) Niarum ni, sikato so maletey la lapud kakulangan na espiritual a tagano. Kanian, lapud begtebegtew et sikato so maseguron makapkapuy pian natalonaan ni iray babeng a naabet to diad ipawil to ed kongregasyon. Kanian, nakaukolan tayo so ontalimukor, a singa panangibaga, a maas-asigtan alsaen so maletey, tan sikatoy awiten a papawil. (Galacia 6:2) Panon tayon nagawaan itan?

17. Panon tayon naalig si apostol Pablo sano bisitaen tayo so maletey?

¹⁷ Imbaga nen apostol Pablo: “Siopa so makapuy, tan agak makapuy?” (2 Corinto 11:29; 1 Corinto  9:22) Si Pablo so walaan na empatya ed totoo, pati ed saray maletey. Labay tayon ipatnag so ontan met a liknaan ed saramay maletey. Sano ombibisita itayo ed sakey a Kristianon maletey ed espiritual, ipaseguro a sikatoy makanakana ed imaton nen Jehova tan sikatoy naiiliwan lan maong na saray kapara ton Tastasi. (1 Tesalonica 2:17) Ipaamta ed sikato a sikaray akaparaan ya ontulong ed sikato tan mabulos a magmaliw ya “agi a nianak sano wala so gonigon.” (Uliran 17:17, NW; Salmo 34:18) Say impapuso iran balikas tayo so nayarin matamoy tan kalkalnan mamaseseg ed sikato anggad punto a nayarian to lay ompawil ed kasimpukokan. Anto so ontumbok a gawaen tayo? Igiya itayo na ilustrasyon a nipaakar ed bii tan say abalang a sinsilyo.

Magmaliw a Masimoon

18. (a) Akin ya agnaandiay ilalo so bii ed ilustrasyon? (b) Antoray masimoon a nansagpotan na bii, tan anto so resulta?

¹⁸ Amta na biin akabalang na sinsilyo so mairap a kipapasen balet ta wala ni so ilalo. No naplag so sinsilyo ed maawang tan marikarikan uma odino diad aralem tan mapitek a linok, nayarin agto la anapen itan lapud abalang la itan. Balet, lapud amta ton walad loob na abung to so sinsilyo tan naromog to ni, pampelengan toy mananap. (Lucas 15:8) Unona, sikatoy manelsel na lamparaan pian silewan so ambilunget ya abung. Insan, panisan to so datal, a likasen to no walay nakakling. Diad kaunoran, sikatoy maalwar a mananap ed saray silong anggad nawandagan toy pilak a sinsilyo. Atumangan so masimoon a sagpot na bii!

19. Antoran leksion nipaakar ed itutulong ed saray maletey so naaralan tayo ed inkiwas na bii diad ilustrasyon na abalang a sinsilyo?

¹⁹ Unong ya ipapanonot ed sikatayo na detalye na sayan ilustrasyon, nagawaan tayo so Makasulatan ya obligasyon ya ontulong ed maletey a Kristiano. Ontan met, namoria tayo a mankaukolan itan na sagpot. On, imbaga nen apostol Pablo ed saray mamatatken ed Efeso: “Dia ed panagsagpot yo na ontan, nepeg yo a tulongan so saray makapuy.” (Gawa 20:35a) Nodnonoten pa ya agnaalmo na bii so sinsilyo diad iliberliber to labat ed abung to. Sikato so tinmalona lapud maalwar ton inanap ‘anggad aromog to itan.’ Mipadpara, sano panggunaetan tayon pabiskegen so indibidual a maletey ed espiritual, nakaukolan a masimoon tan walaay gagala so paraan tayo. Anto so gawaen tayo?

20. Anto so nagawaan pian natulongan so maletey?

²⁰ Panon tayon natulongan so maletey pian ombiskeg so pananisia tan apresasyon to? Nayarin nakaukolan so personal a panagaral na Biblia diad matukoy a publikasyon na Kristiano. On, say pangiyaral na Biblia ed maletey ya indibidual so mangiyabuloy ed sikatayo ya ontulong ed sikato diad tuloytuloy tan malaknab a paraan. Maseguron say service overseer so sankaabigan a mandetermina no siopa so makatulong a maong. Nayarin isuheri to no antoran tema so aralen tan no dinan a publikasyon so lalon makatulong. No panon ya inusar na bii ed ilustrasyon  iray makatulong a kagawaan pian naromog to so aanapen to, ontan met natan lapud walaan itayo na saray kagawaan a makatulong pian nasumpal tayo so inter na Dios a responsabilidad ya ontulong ed saray maletey. Duara ed saray balon kagawaan, odino publikasyon tayo, so nagkalalon makatulong ed sayan sagpot. Saratan et say libron Dayewen so Alenleneg a Tuan Dios tan say Onapit ed si Jehova. *

21. Panon a mangitarok na bendisyon so panulong ed saramay maletey?

²¹ Say itulong ed saramay maletey so mangitarok na bendisyon ed amin. Manliket so natutulongan diad pakapilimog to lamet ed saray tuan kakaaro. Nalikna tayo so pirmin liket a nagamoran labat diad panangiter. (Lucas 15:6, 9; Gawa 20:35) Onligsa so interon kongregasyon no balang sakey et walaan na maaron interes ed arum. Tan manuna ed amin, say kagalangan so parad saray maasikason Managpastol tayo, si Jehova tan si Jesus, lapud nipapatnag so pilalek dan ontulong ed saray maletey diad saray lingkor da diad dalin. (Salmo 72:12-14; Mateo 11:28-30; 1 Corinto 11:1; Efeso 5:1) Agaylan abig sirin so walan rason tayo pian mantultuloy a ‘manaaroan ed balang sakey’!

[Paimano ed Leksab]

Kasin Nipaliwawa Yo?

• Akin a makana so pangipanengneng na aro ed balang sakey ed sikatayo?

• Akin ya ipatnag tayo met so aro ed saramay maletey?

• Antoran leksion so naaralan tayo ed saray ilustrasyon a nipaakar ed abalang a karnero tan abalang a sinsilyo?

• Antoran praktikal a kundang so gawaen tayo pian natulongan so maletey?

[Tepetepet Parad Panagaral]

[Saray litrato ed pahina 16, 17]

Diad panulong ed saray maletey, ipatnag tayo lan unona so interes tan magmaliw itayon matamoy tan masimoon

[Litrato ed pahina 16, 17]

Say panulong ed saramay maletey so mangitarok na bendisyon ed amin