Kasin Nanonotan Yo?

Naapresya yo ta’n binasa so agano niran paway na Say Panag-Bantayan? Sirin, imanoen no naebatan yo so onggendan a tepetepet:

• Panon ya onkanan salimbeng so “abilidad a mannonot”? (Uliran 1:4, NW)

Satan so mamasakbay ed sikatayo ed saray espiritual a kapeligroan tan mamakiwas ed sikatayo a mangiplano na makabat a kiwas, a singa say ipaliis ed saray seksual a pakatuksoan ed trabaho. Ontulong itan ed sikatayo a mamidbir a saray kaparan Kristiano so ag-ayadyari, a mamakiwas ed sikatayon paliisan so bengatbengat ya ikiwas sano onsasanok. Satan met so ontulong ed sikatayon napaliisan iray materyalistikon desdes a mangibalang ed espiritualidad tayo.​—8/15, pahina 21-4 (ed Watchtower).

• Panon a magmaliw a makagunggonan kaabay so sakey?

Say duaran paraan pian magmaliw a maong a kaabay et say pagmaliw a mabulos a mangiter tan maapresyan mangawat. Makana so pagmaliw a maong a kaabay sano onsabi so kairapan. Panggugunaetan na saray Tastasi nen Jehova so magmaliw a maong a kaabay diad pangipapasakbay da ed arum ed ebenton magano lan nagawa, say ikiwas na Dios pian panganggaen so karelmengan.​—9/1, pahina 4-7.

• Unong ed Biblia sioparay tuan sasanto, tan panon dan natulongan so katooan?

Amin ya akadkaunan Kristiano so tuan sasanto, odino saray masanto, a pinagmaliw na Dios ya ontan, aliwan say totoo odino saray organisasyon. (Roma 1:7) Diad bektan sikaray napaoli ed mangatatawen a bilay, saray masanto so nakaiba nen Kristo a mamendisyon ed saray matoor diad dalin. (Efeso 1:18-21)​—9/15, pahina 5-7.

• Anto so kakanaan na pikabat na saray Kristiano ed saray pagalaw diad Gresya nensaman?

Saray sulat di apostol Pedro tan Pablo so walaan na saray nibasen ilustrasyon odino impanukoy ed saray galaw nensaman. (1 Corinto 9:26; 1 Timoteo 4:7; 2 Timoteo 2:5; 1 Pedro 5:10) Parad sakey ya atleta nensaman, importante so nawalaan na manangipasal, pangagamil na dangka, tan maabig a kipaarapan na saray sagpot to. Mipadpara met itan ed saray espiritual a sagpot na Kristianos natan.​—10/1, pahina 28-31.

• Antoray irap tan gunggona ed pamabaleg ed ananak diad arum a bansa?

Dakel ya ugugaw so mas maganon makaaral na balon lenguahe nen saray atateng da, a nairapan a mantalos ed kanonotan tan reaksion na ananak da. Tan nayarin agtampol natalosan na ugugaw iray bangat na Biblia diad lenguahe na atateng da. Ingen, napaelet so siglaotan na pamilya legan ya ibabangat na atateng so lenguahe ra ed ananak da, lapud sikara so makaamta ed duaran lenguahe tan mikabisado ed duaran kultura.​—10/15, pahina 22-6 (ed Watchtower).

• Akin ya importante ya iyugali so ikerew na dispensa?

Mabetbet a say masimoon ya ikerew na dispensa so paraan pian nipawil so aderal a relasyon. Itatarya na Biblia iray ehemplo ed inka-epektibo na ikerew na dispensa. (1 Samuel 25:2-35; Gawa 23:1-5) Sano nansiblangan so duaran too, mabetbet a walay lingo na balang dapag. Kanian, kakaukolanen so pampakna tan ikerew na dispensa.​—11/1, pahina 4-7.

• Akin a mauges so pisugal, anggan daiset labat a kuarta?

Say panagsugal so mangilagyat na inka-makasarili, pilalaslasan, tan agum, a kokondenaen na Biblia. (1 Corinto 6:9, 10) Dakel ed saray sugarol so ginmapo sanen ugaw ni ira, diad pipustaan na melag a kantidad.​—11/1, pahina 31.

• Lapud dakel a libro na Biblia so nisulat ed Griego, akin a kaukolan nin ipatalos so Biblia ed Griego, tan antoray resulta?

Say modernon Griego so samet a miduma ed Griego na Septuagint a patalos ed Hebreon Kasulatan tan ed Kristianon Griegon Kasulatan. Diad loob na saray siglo et aminpiga a sinalin ipatalos so pigara odino say interon Biblia ed pansasalitan Griego. Natan, wala lay ngalngali 30 a patalos, a kompleto odino kabiangan na Biblia, a nabasa na ordinaryon Griego, say sakey a makatantanda et say New World Translation of the Holy Scriptures, ya impalapag nen 1997.​—11/15, pahina 26-9 (ed Watchtower).

• Akin ya agkakaukolanen ed saray Kristiano so pangiter na kakaplo?

Unong ed ganggan ya inter ed Israel nensaman, say kakaplo so paraan pian nasuportaan so tribu nen Levi tan naasikaso iray mankakaukolan. (Levitico 27:30; Deuteronomio 14:28, 29) Say masakripisyon impatey nen Jesus so amural ed Ganggan pati say kakaukolanen na satan a pangiter na kakaplo. (Efeso 2:13-15) Diad inmunan kongregasyon, say pangaligan et kada Kristiano so mangiter na unong ed nayarian to tan unong ed kaliktan na puso to. (2 Corinto 9:5, 7)​—12/1, pahina 4-6.

• Kasin say Apocalipsis 20:8 so mankabaliksan a diad unor a subok, dakerakel a tuloy so nibalang nen Satanas?

Ibabaga na teksto a saramay nibalang et “singa buer ed dayat.” Diad Biblia, satan a balikas so mabetbet a mankabaliksan na ag-amtan karakel, ingen ag-ipapatnag na satan so dakerakel a maong. Say bini nen Abraham a “singa saray buer a wala ed gilig na dayat,” so apatnagan ed kaunoran a 144,000 a persona. (Genesis 22:17; Apocalipsis 14:1-4)​—12/1, pahina 29.