Pagunggonaan ed Maaron-Kaabigan nen Jehova

“Siopa so makabat? Sikato . . . ipatnag to so inkasikaton maimano ed saray gawa na maaron-kaabigan nen Jehova.”​—SALMO 107:43, NW.

1. Kapigan so sankaunaan ya impangusar ed balikas a “maaron-kaabigan” diad Biblia, tan antoran tepet nipaakar ed sayan kalidad so konsideraen tayo?

 MANGA 4,000 a taon lay apalabas, oniay inkuan na kaanakan nen Abraham a si Lot nipaakar ed si Jehova: “Papalaknaben mo so maaron-kaabigan mo.” (Genesis 19:19, NW) Saya so sankaunaan ya inkipatnag na balikas a “maaron-kaabigan” diad Biblia. Sinaglawi met di Jacob, Noemi, David, tan arum niran lingkor na Dios so nipaakar ed sayan kalidad nen Jehova. (Genesis 32:10; Rut 1:8; 2 Samuel 2:6) Diad tua, saray terminon “maaron-kaabigan” tan “saray maaron-kaabigan” so pinmatnag na manga 250 a danay diad New World Translation of the Holy Scriptures. Balet anto so maaron-kaabigan nen Jehova? Diad siopa so angipatnagan ed satan nensaman? Tan panon itayon nagunggonaan ed satan?

2. Akin a say Hebreon salita a nipatalos a “maaron-kaabigan” so mairap ya ukeran, tan anto so matukoy a sananey a patalos ed satan?

² Diad Kasulatan, say “maaron-kaabigan” so patalos ed Hebreon termino a walaay malaknab a kabaliksan kanian say maslak iran lenguahe so andian na eksakton salita a manguker ed nagnap a kabaliksan na satan. Sirin, saray patalos a singa say “aro,” “panangasi,” tan “inkamatoor” so agsigpot a makapanguker ed kalaknab na kabaliksan na satan. Balet, say mas malaknab a patalos a “maaron-kaabigan” so “asingger ed sigpot a kabaliksan na salita,” so inkuan na Theological Wordbook of the Old Testament. Say New World Translation of the Holy Scriptures​—With References so matukoy ya angusar ed “matoor ya aro” bilang say sananey a patalos ed Hebreon termino a nipatalos a “maaron-kaabigan.”​—Exodo 15:13; Salmo 5:7; paimano’d-leksab.

Midumaan ed Aro tan Katooran

3. Panon a midumaan so maaron-kaabigan ed aro?

³ Say maaron-kaabigan, odino matoor ya aro, so maapit a misiglaotan ed saray kalidad ya aro tan katooran. Ingen, satan so midumaan ed saratan diad importante iran dalan. Konsideraen so pandumaan na maaron-kaabigan tan say aro. Say aro so nayarin niyaplika ed saray bengatla tan ideya. Sinaglawi na Biblia so ‘pangaro ed alak tan larak’ tan ‘pangaro ed kakabatan.’ (Uliran 21:17; 29:3) Balet say maaron-kaabigan so iyaaplika ed totoo, aliwan ed saray ideya odino andiay-bilay iran bengatla. Singa bilang, nalalanor iray totoo sanen imbaga na Exodo 20:6, unong ed New World Translation, a si Jehova so “mangaagamil na maaron-kaabigan ed koma-sanlibon kailalakan.”

4. Panon a midumaan so maaron-kaabigan manlapud katooran?

⁴ Say Hebreon salita a nipatalos a “maaron-kaabigan” so walaan na mas malaknab a kabaliksan nen say salitan “katooran.” Diad arum iran lenguahe, say “katooran” so mabetbet ya uusaren parad say awawey a nepeg ya ipatnag na abebbeba ed atagtagey. Balet unong ya inkuan na sakey a managsukimat, manlapud punto de bista na Biblia, say maaron-kaabigan so “mas mabetbet a manutukoy ed kasunian a tuloy a siglaotan: say makapanyari so matoor ed maletey odino mankaukolan odino maniilalo.” Nayarian sirin nen Arin David ya ikerew ed si Jehova: “Pandalangirang mo so lupam ed aripen mo: ilaban moak pa nisengeg ed panangasim [“maaron-kaabigan mo,” NW].” (Salmo 31:16) Kinerew ed si Jehova, say makapanyarin sakey, ya ipatnag to so maaron-kaabigan, odino matoor ya aro, ed say mankaukolan a David. Lapud say mankaukolan so andian na autoridad ed makapanyari, say maaron-kaabigan  a nipatnag ed ontan a kipapasen so mabulos ya impanengneng, aliwan apilitan.

5. (a) Antoray pakapatnagan ed maaron-kaabigan na Dios unong a nipapabitar ed Salita to? (b) Antoran balikas na maaron-kaabigan nen Jehova so konsideraen tayo?

⁵ “Siopa so makabat?” so intepet na salmista. “Sikato . . . impatnag to so inkasikaton maimano ed saray gawa na maaron-kaabigan nen Jehova.” (Salmo 107:43, NW) Say maaron-kaabigan nen Jehova so manresulta ed kililiktar tan kilalaban. (Salmo 6:4; 119:88, 159) Sakey itan a proteksion tan sengegan a mangitonton ed pakainawaan manlapud saray gonigon. (Salmo 31:16, 21; 40:11; 143:12) Lapud sayan kalidad, posibli so iyabig manlapud kasalanan. (Salmo 25:7) Diad panrepaso ed pigaran salaysay na Kasulatan tan pansuri ed arum niran teksto ed Biblia, natalosan tayon say maaron-kaabigan nen Jehova so (1) nibabalikas panamegley na espesipiko iran kiwas tan (2) naeeksperiensya na matoor iran lingkor to.

Kililiktar​—Sakey a Pakapatnagan na Maaron-Kaabigan

6, 7. (a) Panon a pinalaknab nen Jehova so maaron-kaabigan to diad biang nen Lot? (b) Kapigan so impanalambit nen Lot ed maaron-kaabigan nen Jehova?

⁶ Nayarin say sankaabigan a paraan pian nadetermina so laknab na maaron-kaabigan nen Jehova et say panusisa ed saray Makasulatan a salaysay a mangilalanor ed sayan kalidad. Diad Genesis 14:1-16, naromog tayo a si Lot a kaanakan nen Abraham, so kinautibo na saray puersa na kakabusol. Balet si Lot so insalba nen Abraham. Napepeligro lamet so bilay nen Lot sanen  denesidi nen Jehova a deralen so marelmeng a syudad na Sodoma, a panaayaman nen Lot tan say pamilya to.​—Genesis 18:20-22; 19:12, 13.

⁷ Sakbay a tuloy na inkaderal na Sodoma, si Lot tan say pamilya to so impaway na saray anghel nen Jehova manlapud syudad. Diad saman ya inkagawa et inkuan nen Lot: “Akaromog so aripen mo na panangasi ed saray matam, tan pinabaleg mo so panangasim [“maaron-kaabigan,” NW], ya inonot mo ya iliktar so bilay ko.” (Genesis 19:16, 19) Diad sarayan salita et binidbir nen Lot ya impatnag nen Jehova so nikadkaduman maaron-kaabigan diad impangiliktar ed sikato. Diad sayan kipapasen, nipatnag so maaron-kaabigan na Dios panamegley na kililiktar tan kilalaban.​—2 Pedro 2:7.

Say Maaron-Kaabigan nen Jehova tan say Panangigiya To

8, 9. (a) Anto so niganggan ed lingkor nen Abraham? (b) Akin a nampikasi so lingkor parad maaron-kaabigan na Dios, tan anto so agawa legan a sikatoy manpipikasi?

⁸ Diad Genesis kapitulo 24, nabasa tayo so sananey nin pakapatnagan na maaron-kaabigan odino matoor ya aro, na Dios. Indalatdat na salaysay so nipaakar ed impangibaki nen Abraham ed lingkor to a manbaroy ed dalin na saray kakanayon nen Abraham pian mananap na asawaen nen ilalak ton Isaac. (Bersikulo 2-4) Mairap so kimey ya inkibakian na satan a lingkor, balet ta sikato so apaseguroan ed panangigiya na anghel nen Jehova. (Bersikulo 7) Diad saginonor et akasabi so lingkor ed sakey a bobon a walad paway na “syudad na Nahor” (balanglan diad Haran odino diad asingger a lugar) sanen nitan laray bibii ya onasol. (Bersikulo 10, 11) Sanen anengneng to iray bibiin manasingger la, amta to a sinmabi la so importantin bekta ed resulta na inkigangganan to. Balet panon ton napili so manepeg a bii?

⁹ Lapud amta ton nakaukolan toy tulong na Dios, onia so impikasi na lingkor nen Abraham: “O Jehova, Dios nen katawan ko ya Abraham, pikasik ed sika a pawitan mo ak na maong a kapalaran ed saya ya agew, tan mangiparungtal ka na abig na linawa [“maaron-kaabigan,” NW] ed katawan ko ya Abraham.” (Bersikulo 12) Panon so pangipatnag nen Jehova ed maaron-kaabigan to? Kinmerew so lingkor na sakey ya espesipikon tanda a pakabidbiran to ed marikit a pinili na Dios. (Bersikulo 13, 14) Sakey a bii so eksakton nanggawa ed walan inkerew to ed si Jehova. Agayla, singano nadngel a mismo na bii so pikakasi to! (Bersikulo 15-20) Nikelkelawan, say lingkor so ‘ag-oneseesel ed sikato a maniimano.’ Balet, wala niray importantin bengatla a kaukolan a nasegurado. Kasin saman a magangganan bii so kanayon nen Abraham? Tan kasin marikit ni? Kanian say lingkor so nansiansian “ag-oneseesel, a panlikna to no ginawa nen Jehova so akar to a mapalar odino andi.”​—Bersikulo 16, 21.

10. Akin ya inkuan na say lingkor nen Abraham ya impatnag nen Jehova so maaron-kaabigan ed katawan to?

¹⁰ Kayarin tuloy na satan, impabidbir na marikit so inkasikato bilang say ‘anak nen Batuel a laki ya anak nen Melca, ya angiyanak ed Nacor [agi nen Abraham].’ (Genesis 11:26; 24:24) Diad saman a bekta et amoria na lingkor ya inebatan nen Jehova so pikakasi to. Lapud nikelkelawan, sikatoy dinmakmomo tan inkuanto: “Nagalang si Jehova, a Dios nen katawan ko ya Abraham, ya agto inekal so maaro ya abig na linawa to tan say katuaan to ed katawan ko: no nipaakar ed siak, say Dios imbasbas toak ed akar ko ya angga ed abung na agagi nen katawan ko.” (Bersikulo 27) Diad impangitaryay Dios na panangigiya, impatnag To so maaron-kaabigan ed katawan na lingkor, a si Abraham.

Say Maaron-Kaabigan na Dios so Mangitarok na Pakainawaan tan Proteksion

11, 12. (a) Kaleganan na antoran subok a naeksperiensya nen Jose so maaron-kaabigan nen Jehova? (b) Panon a nipatnag so maaron-kaabigan na Dios ed biang nen Jose?

¹¹ Ontumbok et konsideraen tayo so Genesis  kapitulo 39. Akasentro itan ed apo ed pueg nen Abraham, si Jose, a nilako ed inkaaripen diad Ehipto. Anggaman kuan, “si Jehova so kaulop-ulop nen Jose.” (Gen 39 Bersikulo 1, 2) Diad tua, anggan say Ehipsion katawan nen Jose, a si Potipar, so angikuan ya inulop nen Jehova si Jose. (Gen 39 Bersikulo 3) Balet, nipaarap si Jose ed pirmin subok! Sikato so palson inakusaan na impamasoot ed asawa nen Potifar kanian sikato so impangaw. (Bersikulo 7-20) Diad “panangipukokan” a “saray salisali to apasakitan na saray grilios: sikato niyan nensaman ed golonggolong a balatyang.”​—Genesis 40:15; Salmo 105:18.

¹² Anto so agawa legan na satan a makapasubok ya eksperiensya? “Akiulop-ulop si Jehova ed Jose, tan impatnag to so abig na linawa ed sikato.” (Gen 39 Bersikulo 21a) Say sakey a kiwas na maaron-kaabigan so angigapo ed nantutumbokan ya agawa, a diad saginonor et nansumpal ed pakainawaan manlapud saray gonigon a naeksperiensya nen Jose. Si Jose so inikdan nen Jehova na “lugor ed mata na saman so bantay na pangawan.” (Bersikulo 21b) Kanian, say opisyal so angipabtang ed si Jose na responsablin posisyon. (Gen 39 Bersikulo 22) Insan, akabat nen Jose so toon angitarok ed sikato ed saginonor diad imano nen Faraon, say manuley ed Ehipto. (Genesis 40:1-4, 9-15; 41:9-14) Bilang resulta, inyatagey na ari so posisyon nen Jose bilang say komaduan manuley diad Ehipto, a nansumpal ed impakagawa toy manangisalbay-bilay a kimey diad dalin na Ehipto a dinapoan na eras. (Genesis 41:37-55)  Ginmapo so impanirap nen Jose sanen 17 años to tan binmayag na masulok a 12 a taon! (Genesis 37:2, 4; 41:46) Balet kaleganan na amin na saraman a taon na gonigon tan impanirap, impatnag nen Jehova a Dios so maaron-kaabigan ed si Jose diad impangilegyas ed sikato manlapud sigpot a pakadesyang tan diad impangisalba ed sikato parad apribilehyoan a betang ed gagala na Dios.

Say Maaron-Kaabigan na Dios so Agbalot Onsaew

13. (a) Antoran balikas na maaron-kaabigan nen Jehova so naromog ed Salmo 136:? (b) Anton petepeteg so maaron-kaabigan?

¹³ Aminpigan impatnag nen Jehova so maaron-kaabigan to ed saray Israelita bilang totoo. Indalatdat na Salmo 136 a lapud maaron-kaabigan to, impagamor to ed sikara so kililiktar (Sal 136 Bersikulo 10-15), panangigiya (Sal 136 Bersikulo 16), tan proteksion. (Sal 136 Bersikulo 17-20) Impatnag met na Dios so maaron-kaabigan to ed saray indibidual. Nipapatnag na sakey a too so maaron-kaabigan to ed kapara ton totoo diad mabulos iran gawa a mamenek ed importantin pankaukolan. Nipaakar ed maaron-kaabigan, oniay inkuan na sakey a reperensya na Biblia: “Sakey itan a kiwas a mamapasiansia odino mangiyaalibansa na bilay. Satan so isasalet diad biang na sakey a maniirap odino nagogonigon.” Deneskribe itan na sakey ya iskolar bilang say “aro a nipapatnag ed kiwas.”

14, 15. Akin a makaseguro itayo a si Lot et naabobonan a lingkor na Dios?

¹⁴ Saray salaysay na Genesis ya inusisa tayo so mangipanengneng ed sikatayo ya agbalot onsaew si Jehova a mangipatnag na maaron-kaabigan ed saramay mangaaro ed sikato. Si Lot, Abraham, tan Jose so nambilay ed nanduruman kipapasen tan nidunget ed nanduruman subok. Ag-ira ayadyari, balet sikaray naabobonan a lingkor nen Jehova, tan mankaukolan ira na tulong to. Naligliwa itayo diad pakaamtan ipapatnag na maaron mangatatawen ya Ama tayo so maaron-kaabigan ed saratan ya indibidual.

¹⁵ Walaray agmakabat a desisyon nen Lot a nansumpal ed impanirap. (Genesis 13:12, 13; 14:11, 12) Ingen, impatnag to met iray nakomendaan a kalidad. Sanen sinmabi ed Sodoma so duaran anghel na Dios, pinarawes ira nen Lot. (Genesis 19:1-3) Tekep na pananisia a pinasakbayan to iray manugang to nipaakar ed asingger lan kaderal na Sodoma. (Genesis 19:14) Say panmoria na Dios ed si Lot so naromog ed 2 Pedro 2:7-9, ya onia so nabasa tayo: “Inlaban [nen Jehova] si matunong a Lot, nen apaermen a tuloy na sankaugsan ya impanbilay na saray mauges a totoo. (Ta saya a matunong a too, a nanayam ed limog da ya diad impakanengneng to tan impakadngel to, apadpaermen ya agew-agew so matunong a kamarerwa to lapu ed kagagawa na saraman a mangaruksa): Amta na Katawan so pangiliktar to ed saray masantos ed katukso.” On, si Lot et matunong a too, tan ipapabitar na salita dia a sikato so toon walaay maridios a debosyon. Singa sikato, panggagayagaan tayo so maaron-kaabigan na  Dios legan tayon aagamilen so ‘amin a masantos a panagbilay tan kasimpitan.’​—2 Pedro 3:11, 12.

16. Diad anton maabig iran termino so impanukoy na Biblia ed si Abraham tan si Jose?

¹⁶ Say salaysay ed Genesis kapitulo 24 so malinew a mangipapatnag ed maapit a relasyon nen Abraham ed si Jehova. Idadalatdat na unonan bersikulo Ge 24:1 a “say Dios pinapalar toy Abraham ed amin a bengabengatla.” Si Jehova so tinawag na lingkor nen Abraham bilang “Dios nen katawan ko ya Abraham.” (Ge 24 Bersikulo 12, 27) Tan inkuan nen babangatan a Santiago a si Abraham so “apatunong” tan “ningaran a kaaro na Dios.” (Santiago 2:21-23) Ontan met a tuloy ed si Jose. Say maapit a siglaotan ed baetan nen Jehova tan si Jose so nidanet ed interon kapitulo 39 na Genesis. (Gen 39 Bersikulo 2, 3, 21, 23) Niarum ni, oniay inkuan nen babangatan ya Esteban nipaakar ed si Jose: ‘Say Dios wala ed sikato.’​—Gawa 7:9.

17. Anto so naaralan tayo ed saray alimbawa di Lot, Abraham, tan Jose?

¹⁷ Unong ed kinonsidera tayo labat, saray makaeksperiensya ed maaron-kaabigan na Dios et saramay totoon walaay maong a relasyon ed si Jehova a Dios tan nanlingkor parad gagala na Dios diad nanduruman dalan. Nidunget ira ed saray babeng ya agda natalonaan a bukor. Niiyan ed kapeligroan so kisalba na bilay nen Lot, say pantultuloy na linya na pamilya nen Abraham, tan say panalimbeng ed betang nen Jose. Si Jehova lambengat so makapenek ed saray pankaukolan na sarayan maridios a lalaki, tan ontan so ginawa to diad insalet to tekep na saray gawa na maaron-kaabigan. Ta pian naeksperiensya tayo so maaron-kaabigan nen Jehova a Dios ed ando lan ando, nepeg a walaan itayo met na maapit a siglaotan ed sikato, tan nepeg itayon mantultuloy a manggawa ed linawa to.​—Esdras 7:28; Salmo 18:50.

Apaboran Iray Lingkor na Dios

18. Anto so ipapabitar na nanduruman teksto ed Biblia nipaakar ed maaron-kaabigan nen Jehova?

¹⁸ Say maaron-kaabigan nen Jehova so ‘amano ed dalin,’ tan agaylay pisalsalamat tayo ed sayan kalidad na Dios! (Salmo 119:64) Sikatayo so sigpot-puson onkiwas unong ed kansion na salmista: “O komon ta saray totoo et idayew da si Jehova lapu ed abig na linawa to, tan lapu ed makapakelkelaw ira a gawa to ed saray anak na totoo!” (Salmo 107:8, 15, 21, 31) Manliket itayo ta ipapatnag nen Jehova so maaron-kaabigan to ed saray naabobonan a lingkor to​—balanglan indibidual odino grupo. Diad pikakasi, si Jehova so tinawag nen propeta Daniel bilang say “Katawan [tuan Dios], say baleg tan tatakotan a Dios, a mangawalo na sipan tan maaro ya abig na linawa [“maaron-kaabigan,” NW] ed saray mangaro ed sikato tan mangunor ed saray ganggan to.” (Daniel 9:4) Nampikasi si Arin David: “O ipatuloy mo so maaro ya abig na linawam ed saray mikabat ed sika.” (Salmo 36:10) Agaylay pisalsalamat tayo ta ipapatnag nen Jehova so maaron-kaabigan to ed saray lingkor to!​—1 Arari 8:23; 1 Awaran 17:13.

19. Diad ontumbok ya artikulo, antoran tepet so konsideraen tayo?

¹⁹ On, sikatayo so apaboran bilang totoo nen Jehova! Niarum ni ed pakakagunggonaan tayo ed aro na Dios a nipatnag ed katooan diad inkalapagan, panggagayagaan tayo so nikaduma iran bendisyon a manreresulta ed maaron-kaabigan, odino matoor ya aro na mangatatawen ya Ama tayo. (Juan 3:16) Nagkalalo la ed panaon na pankaukolan a nagunggonaan itayo ed sayan ankablin kalidad nen Jehova. (Salmo 36:7) Balet panon tayon naalig so maaron-kaabigan nen Jehova a Dios? Kasin ipapatnag tayo bilang indibidual iyan makatantandan kalidad? Saraya tan saray misiglaotan a tepet so konsideraen ed ontumbok ya artikulo.

Kasin Natandaan Yo?

• Anto so sananey a Makasulatan a patalos ed “maaron-kaabigan”?

• Panon a miduma so maaron-kaabigan diad aro tan katooran?

• Diad antoran paraan ya impatnag nen Jehova so maaron-kaabigan to ed si Lot, Abraham, tan Jose?

• Anton panamaseguro so nagamoran tayo manlapud saray apalabas a panangipatnag nen Jehova ed maaron-kaabigan to?

[Tepetepet Parad Panagaral]

[Litrato ed pahina 13]

Amta yo kasi no panoy impangipatnag na Dios ed maaron-kaabigan to ed si Lot?

[Saray litrato ed pahina 15]

Diad maaron-kaabigan to, inwanwan nen Jehova so lingkor nen Abraham

[Saray litrato ed pahina 16]

Imbalikas nen Jehova so maaron-kaabigan to diad impanalimbeng ed si Jose