Sano Makabat so Iyarawi

SAY mundo natan so mabetbet a pakapatnagan na espiritu na inkasebeg tan inkaruksa odino na tukso. Say toon ompaliis ed sakey a situasyon so kaslakan lan ipapasen a maletey odino payakot. Sikato ni ingen so naludlurey.

Balet, ipapalinew na Biblia a walaray panaon sano say itaynan so makabat tan inkakpel. Pian pekderan itan, antis ya imbaki nen Jesu-Kristo ed ministeryo iray babangatan to et oniay inkuan to ed sikara: “Sano usil-usilan da kayo ed saya a syudad, ombatik kayo ed sananey.” (Mateo 10:23) On, nepeg ya ompaliis iray babangatan nen Jesus ed saray manamasegsegang da. Agda nepeg so mangagamil na bengatlan singa say krusada, a mamilit ed arum a manpakomberte. Tarok da so mensahe na kareenan. (Mateo 10:11-14; Gawa 10:34-37) Kanian imbes a manpapetang, saray Kristiano so kaukolan ya ontaynan, ya arawian da so pansengegan na pakasyodotan. Diad onian paraan, apansiansia ra so malinis a konsiensia ontan met ed mablin relasyon da ed si Jehova.​—2 Corinto 4:1, 2.

Sakey a miduman alimbawa so naromog ed libro na Biblia ya Uliran. Sasaglawien na satan so sakey a tobonbalon laki, ya imbes ya onarawi ed pakatuksoan et tinmumbok ed sakey a balangkantis a “singa sakey a baka ya onla ed panagpateyan.” Say resulta? Kalamidad lapud nampadaeg ed tukso a nalalanor so mismon bilay to.​—Uliran 7:5-8, 21-23.

Panon to no nipaarap ka ed sakey a tukson seksual ya imoralidad odino arum ni ya antam lan peligro? Unong ed Salita na Dios, say manepeg a kiwas et say itaynan, say iyarawi a tampol ed situasyon.​—Uliran 4:14, 15; 1 Corinto 6:18; 2 Timoteo 2:22.