Iner so Akapapegan na Kaligenan Mo?

Diad sakey a melag a baryo ed Sagur Aprika, nampatanir so malangwer nin Josué ed pamilya tan kakaaro to. * Insan sinmipot ya amaarap ed baleg a syudad pian mananap na pinansyal a seguridad. Balet, agni abayagan diman, say ilalo to so onkukuyep sanen namomoria ton say syudad et aliwa manayan pasen a mainomay so onyaman.

LAPUD mair-irap toy onadapta ed bilay diad syudad, si Josué so naaandian lay ilalo. Say baleg a syudad so arawin tuloy ed inisip ton pagmaliwan na satan. Kaleganan to et pipirawaten nen Josué ya onsempet la’d pamilya tan kakaaro to, diad pobren baryo a tinaynan to. Balet natatakot ompan sikatoy ludlureyen na arum ed saray kabaryoan to. Onia so panaaburidoan to: ‘Ibaga ra a siak so sinmaew lapud agko ayarian diad syudad.’

Say lalo nin pakakadetdetan to et say nayarin pakadismaya na atateng to. Sikaray maniilalo ed sikato parad pinansyal a suporta. Legan ton tatalonaan iyan pakakadetdetan ed liknaan, nilooban nen Josué so abeban klase na trabaho a mankimey na andukey ya oras tan melmelag so almo to no ikompara ed samay kukugkugipen to. Sikatoy nakekesawan lapud sobran panagkimey. Tan diad ilalabas na kada simba et ondaraiset so nakekeraan a panaon to la parad Kristiano iran aktibidad, a pinabpabli ton tuloy. Sikatoy maer-ermen tan begtebegtew lapud arawi so kawalaan to pian naliknay panangaro na pamilya tan kakaaro to. Apaneknekan ton say syudad so ag-akapangiter ed sikato na seguridad a pampirpirawatan to.

Anggaman mandurumay kangaranan tan paspasen, say maermen ya eksperiensya nen Josué so mabetbet a nagagawa. Aliwan lapud ta sinononot si Josué ed dili ton pankaabigan diad pilalek ton onalis​—sikato so manaanap lambengat na kaligenan. Diad pakamoria to et magmaong iray pansumpalan to diad syudad nen say diad melag a baryo to. Siempre, no maminsan et nayarin napaaligwas na sakey a too so kipapasen to ed materyal, balet ag-itan mankabaliksan na peteg kaligenan. Peteg ya agtinmua itan ed biang nen Josué, tan maseguron ontan met ed kaslakan ed arum ya anali met ed satan. Lapud saya et sikatayoy manumameng, ‘Anto so kaligenan?’

Manduruma so pakatalos na nanduruman totoo ed kaligenan. Inkuan na sakey a diksionaryo a say kaligenan et “kawayangan manlapud kapeligroan” odino “kawayangan manlapud takot odino kapagaan.” Moriaen na maslak a totoo ya anggapo natan so sigpot a “kawayangan manlapud kapeligroan.” Sikara lay napenek basta nalikna ran maligen ira, anggaman naliliktob ira na saray makapasesgan kipapasen.

Komusta ka balet? Iner ka maniilalo parad kaligenan? Kasin naromog itan diad syudad ya aliwan diad baryo, a singa inisip nen Josué? Odino kasin diad kuarta, inerman odino panon man so pakagamor mo ed satan? Kasin satan so nayarin diad pampirawat a nawalaay atagtagey a posisyon? Inerman so panisiaan mon akapapegan na kaligenan mo, kaunongay pambayag na satan a kaligenan ed sika tan ed pamilyam?

Konsideraen tayo so taloran paraan a panaanap na dakel ya indibidual ed kaligenan​—heograpikon lugar; kuarta; posisyon, odino kipapasen. Insan usisaen tayo no iner akapapeg so puro tan permanentin kaligenan.

[Paimano ed Leksab]