Naspot a Bilay Aliwan Kugkugip!

Sakey a naspot a mundo​—antoy kabaliksan na satan ed sika? Isipen pay sosyedad na too ya anggapo lay krimen, panagabuso ed druga, eras, inkaduka, odino ag-inkahustisya. Panggayagaan na amin so ekselentin bunigas ed emosyon tan laman. Anggapo lay ermen ta anggan say patey et sigpot lan naekal. Kasin realistikon pampirawatan so ontan a mundo?

ANGGAMAN ag-ibabaliwala iray aligwas ed siensia tan teknolohiya, maslak a totoo so talagan agmanisian say inka-intelihenti odino kakabatan na too et makapangitarok na naspot a mundo a ditan et amin so manbilay lan mareen tan maliket. Diad biek a dapag, say tendensia na too et agniburi a labay ton paaligwasen iray bengatla tan ipetek iray ag-inkanaspot. Siempre, saray aliwan realistikon piugagep so agmakatulong ed saray andiay ayaman tan pobri, nisay mamenek itan ed agmakayari tan mansasakit a manpirawat a makainawa la ed paniirap da. Say naspot a mundo so agbasta niwala panamegley na inkadunong na too. Balet, anggaman ed peles a kaermenan tan kairapan, walaray mabiskeg a rason a panisiaan a say mundon inkuan mon naspot et tuan asingger la.

No isipen mo so nipaakar ed naspot a bilay, say impanbilay nen Jesu-Kristo so nanonotan mo. Aliwan si Jesus labat so naspot a toon nambilay ed kapiganman diad dalin. Nanggayagaan di Adan tan Eva, ya apalsa ed indengan na Dios, so naspot a bilay ed paraiso. Balet, abalang da iyan ekselentin kipapasen lapud impanrebeldi ra ed mangatatawen ya Ama ra. (Genesis 3:1-6) Anggaman ontan, impasen na Manamalsa ed nonot na totoo so pilalek a manbilay ya andi-anggaan. Paneknekan itan na Eclesiastes 3:11: “Ginawa to [Dios] so balang bengatla a marakep ed panaon to: ontan met impasen to so kaandoan ed puso ra, anggan ontan say too agto natontonan so gawa a ginawa na Dios a manlapu ed gapo angga ed sampot.”

Anggaman say ag-inkayadyari tan kasalanan so angitonton ed katooan ed bilay a “kaapaan” tan “inkaaripen ed kaugsan,” imanoen so makaligliwa iran balikas nen apostol Pablo: “Say maseseg a panpilalek na pinalsa aalagden to so kipatnag na saray anak na Dios. Ta say pinalsa impauleyan ed kaapaan, aliwan lapud panlabay to, noag say makalanor  so anguley ed sikato, ed ilalo. Pian say pinalsa a dili niliktar ed inkaaripen na kabulokan ya onloob ed kawayangan na gloria na saray anak na Dios.” (Roma 8:19-21) Ipapalinew na Biblia a saray probisyon na Dios parad pangipawil ed naspot a bilay na too so ginawa ton posibli panamegley nen Jesu-Kristo.​—Juan 3:16; 17:3.

Niarum ni ed sayan makapakelkelaw ya ilalo parad arapen, posibli ed sikatayon amin so onaligwas ed espiritual, a nipanengneng tayo so iyaaligwas tayo anggan natan la.

Panggunaetan so Pagmaliw a Makatunongan

Impasen nen Jesu-Kristo so pamaakaran na inkanaspot bilang importantin maong ta inkuanto ed dakel a totoo: “Naspot kayo komon a singa say mangatatawen ya Ama yo sikato so naspot.” (Mateo 5:48) Kasin iilaloan itayo nen Jesus a magmaliw ya andiay pakabalawan diad sayan peles a marelmeng a sistema? Andi. Talagan kaukolan tayon pambanikelan a bayuboan iray kualidad na inkamabunlok, panangasi, tan aro ed kaparan totoo, ingen mabetbet itayon onsaew ed panggaway duga. Onia so insulat ni ingen na sakey ed saray apostol nen Jesus: “No ikompesar tayo so saray kasalanan tayo, sikato matoor tan matunong a mamerdona na saray kasalanan tayo, tan linisan to itayo ed ganagana ya agnikatunongan. No kuan tayo ya ag-itayo nankasalanan, sikato so pagmaliwen tayon matila, tan say salita to andi ed sikatayo.”​—1 Juan 1:9, 10.

Anggaman kuan, naparakep tayoy paraan na panmoria tayo’d inkasikatayo tan pantrato ed arum, a paliisan so inkaalablabas. Siopa so makaromog na magmaong a totontonen parad pakagamor na balansi, makatunongan a personalidad nen say walan naromog ed Salita na Dios, say Biblia? Say pamayubo ed saray kualidad a singa say gayaga tan kabkaabigan so ontulong ed sikatayon makapitunosan ed arum diad pantratrabahoan, diad kapareha tayo, tan diad atateng odino ananak tayo. Onia so bilin nen apostol Pablo ed saray Kristiano: “Manggayaga kayo ed Katawan lawas: kuan ko lamet, Manggayaga kayo. Nakabatan komon na amin a totoo so kasungdoan yo.”​—Filipos 4:4, 5.

Saray Gungguna ed Pagmaliw a Makatunongan

Sano makatunongan ka ed saray iilaloan mo tan paliisan mo so perpeksionismo a makaderal tan manaeg ed inkasika, nagunggunaan moy inkasika ontan met ed arum. Say pikabat mo ed peteg a pagmaliwan mo et saglawien toy pagmaliw a realistiko tan makatunongan nipaakar ed labay mon gawaen. Tandaan, pinalsa itayo na Dios pian manbilay diad dalin tan pian anapen so kapenek ed makabaliksan a kimey a mangungguna ed sikatayo tan ed arum.​—Genesis 2:7-9.

No alablabas so kakaukolanen mo ed inkasika, akin ya ag-onasingger ed si Jehova diad pikakasi? Say pakagamor na pabor na Dios so pakainawaan mon maong. Kabat nen Jehova so inkagawa tayo tan say agtayo inkayadyari, kanian sikatoy aliwan agmakatunongan odino mairap a paliketen. Papaseguroan itayo na salmista: “Unong a say sake’ya ama abageyen to so saray anak to, ontan met nen Jehova abageyen to so saray ontakot ed sikato. Ta sikato kabat to so inkagawa tayo; sikato nanodnonotan to a sapok itayo.” (Salmo 103:13, 14) Alay pisalsalamat tayo ta pidedenengan na Dios so totoo ed ontan a mapangasin paraan! Amta toray limitasyon tayo, ingen nayarian tayoy magmaliw a mabli ed imaton to bilang inad-aron ananak.

 Imbes a gemtanen so perpeksionismo, agaylan mas makabat so pamayubo ed espiritual a pakatebek tan balansin panmoria! Sakey ni, makaseguro itayo ya anggapoy makaamper ed si Jehova ed pangisumpal toy gagala ton agwaten so katooan pian magmaliw ya ayadyari diad silong na Panariay Dios. Balet anto so kabaliksan na inkanaspot na too?

Say Naspot a Bilay so Magmaong nen say Perpeksionismo

Say inkanaspot et agto kabaliksan so pagmaliw a perfectionist. Seguradon saramay apribilihyoan a manayam ed Paraison dalin ed silong na Panariay Dios so agmakaukolan, mantunongtunongan iran indibidual. Sakey ed saray kakaukolanen parad pakaliktar ed baleg a kairapan et say impapuson panamabli ed dondon bagat, a singa impatnag na internasyonal a baleg ya ulop a deneskribe nen apostol Juan: “Say inkilaban ed Dios tayo a wala a manyurong ed trono, tan dia ed Kordero.” (Apocalipsis 7:9, 10, 14) Amin a makaliktar ed manasingger a baleg a kairapan so misalsalamat lapud ta mabulos ya inatey si Kristo parad sikara tan ed amin na saramay mangaagamil na pananisia ed sikato. Say maaron impangibagat to so angiletneg na basiyan parad pangitarok na magnayon a pakainawaan manlapud agda inkayadyari tan saray kakapuyan da.​—Juan 3:16; Roma 8:21, 22.

Anto so nengneng na naspot a bilay? Imbes a kompetensiaan tan sinisiblet ya ambisyon, say aro tan panangasi ed limog na totoo et pagmaliwen ton makana so pambilay, a naekal la so kapagaan tan kaandian na kompiyansa. Balet, agmakapasawa so naspot a bilay. Ag-ibabaga na Salitay Dios so amin a detalyi nipaakar ed Paraiso balet ta dedeskribien toy klase na bilay a nailaloan tayo: “Ipaalagey da naani so saray abung, tan manayam ira naani; et mantanem ira naani na saray ubas, tan mangan ira naani ed saray bunga ra. Sikara ag-ira naani mangipaalagey, et sananey so manayam; ag-ira naani mantanem et sananey naani mangan; ta singa saray agew na sakey a kiew ontan ira naani so saray agew na baley ko, et saray pinilik manliket ira naani a maando ed saray gawa na saray lima ra. Sikara ag-ira naani mankimey na maapa, ag-ira naani mananak a nipaakar ed kaderya.”​—Isaias 65:21-23.

Imbes a panumamengan no anton klase na panligliwaan, pasilidades na lakoan, teknolohiya, odino transportasyon so itarya na Panarian, ilitratom ed nonot mo so inkasika a manggagayaga ed kasumpalan na saray salitan: “Say lobo tan say kordero mandungo ra naani a mankabkab, et say leon mangan naani na dayami a singa say baka; et say dabok sikato naani kanen na uleg. Ag-ira naani manduksa, ag-ira met naani manderal ed amin a masanto a palandey ko, kuan nen Jehova.” (Isaias 65:25) Agaylan miduma so naspot a bilay manlapud naiimatonan mo natan! No sakey ka ed saraman so manepeg a manbilay ed satan a panaon, walaan ka na rason a manmatalek a say maaron mangatatawen ya Amam so walaan na interes ed sika tan ed pamilyam. “Manliga ka a dili met ed Jehova: et iter to ed sika so saray pirawat na pusom.”​—Salmo 37:4.

Aliwan kugkugip so naspot a bilay. Sigpot a nagawa so maaron gagala nen Jehova nipaakar ed katooan. Sika tan say pamilyam so nayarin nakaiba na saramay naagwat ed pagmaliw ya ayadyarin too tan manbilay ya ando lan ando ed balon mundo na Dios. Ipapasakbay na Biblia: “Say matunong tawiren to so dalin tan manayam diman lawas.”​—Salmo 37:29.

[Litrato ed pahina 6]

Napaaligwas tayoy paraan na panmoria tayo’d inkasikatayo tan ed arum, a paliisan so perpeksionismo odino inka-metikuloso

[Litrato ed pahina 7]

Akin ya agmo ilitrato ed kanonotan mo so inkasika a manggagayaga la ed mareen tan matunong iran kipapasen ed Paraiso?