Anto so Tombok Parad Itatalona?

DUARAN maseet a kalangweran a lalaki so sistematikon mangipaparaan ed sakey a luluganan a nikadumay itsura to parad importantin panangi-testing. Bigbigla, intekkiab na maksil a dagem so lupok ya aparato, niyalimbusabos ed tagey, insan alal-laltog ya apattak. Dismayadon akatanyareg ya agmakasel iraman a lalaki. Say inap-apiger dan impasyan trabaho ra so alinglingkay a nagmaliw a nambabalangkangan a tabla tan metal.

Parad di Orville tan Wilbur Wright, say agawa ed saman ya agew na Oktubre 1900 et aliwan pilpilimeron makapadismayan insaew ed panasali ran makatuop na luluganan a makatekkiab ed dagem. Akapangusar la ra na pigaran taon tan dakel a kuarta ed panag-eksperimento.

Balet, diad kaunoran et atumangan so panag-anos da. Nen Disyembre 17, 1903, diad Kitty Hawk, North Carolina, E.U.A., apatekkiab na sanagin Wright so de-motor a prototype a tinmekkiab ed loob na 12 segundo​—aganggano no ikompara ed saray panagpatekkiab natan, balet ta abayag lan tuloy itan ya inkaumanan na mundo ed ando lan ando!

Say itatalona ed maslak iran sagpot so mandedependin tuloy ed maanos a panagpursigi. Balanglan satan so pangikabisado ed balon lenguahe, panaral na anapan, odino anggan say pamayubo ed pikakaaro, maslak iran bengatlan walay kablian so nagagawaan diad panamegley labat na tuloytuloy a sagpot. Onia so inkuan na autor a si Charles Templeton: “Maminsiam ed kada samplora, say itatalona so direktan misiglaotan ed sakey a bengatla: inkaseet.” Inkuan na kolumnistan si Leonard Pitts, Jr.: “Pantotongtongan tayo so nipaakar ed abilidad, bibidbiren tayo so itatalona, balet mabetbet a tuloy ya ibabaliwala tayo so sankaimportantian iran bengatla. Say inkaseet tan dakel iran insaew. Say andukey ya oras a panagtrabaho.”

Pepekderan iya na abayag lan imbaga na Biblia: “Say lima na makuli manegna naani panuley.” (Uliran 12:24) Say inkakuli et kabaliksan toy inkamaanos tayo ed saray sagpot tayo. Saya so nakaukolan no labay tayon nagawaan so denesidi tayon gawaen. Anto so inkamaanos? Panon itayon magmaliw a maanos ed pangemtan tayo’d saray kalat tayo, tan diad anto so nepeg a panseetan tayo? Sarayan tepet so naebatan ed ontumbok ya artikulo.

[Picture Credit Line ed pahina 3]

U.S. National Archives photo