Bayuboan so Inkamaapit ed si Jehova

ONIAY insulat nen babangatan a Santiago: “Singger kayo ed Dios, et sikato so onsingger naani ed sikayo.” (Santiago 4:8) Tan inkanta met na salmistan David: “Say pikakaaro ed Jehova wala ed saray ontakot ed sikato.” (Salmo 25:14) Malinew, labay nen Jehova a Dios a nawalaan tayo na maapit a relasyon ed sikato. Ingen, aliwan amin a mandadayew ed Dios tan ontutulok ed saray ganggan to et napaapit la ed sikato.

Komusta ka balet ey? Walaan ka ta na maapit a personal a relasyon ed Dios? Anggapoy duaruwa, a labay moy lalon onapit ed sikato. Panon tayon nabayuboan so inkamaapit ed Dios? Antoy kabaliksan na saya ed sikatayo? Say komatlon kapitulo na libro na Biblia ya Uliran so mangiiter na saray ebat.

Mangipatnag na Maaron-Kaabigan tan Inkamatua

Ginapoan nen Arin Solomon na kadaanan ya Israel so komatlon kapitulo na Uliran ed oniaran salita: “Ana’ ko, agmo lingwanan so tunong ko; say pusom ingen unoren to komon so saray ganggan ko: Ta say karukey na saray agew, tan saray taon na bilay, tan kareenan, niarum ira ed sika.” (Uliran 3:1, 2) Lapud si Solomon so nansulat diad panangipuyan na Dios, sayan inaaman simbawa so diad tua et manlalapu’d si Jehova a Dios tan para ed sikatayo. Dia et nasisimbawa itayo a manpasakop ed saray panonot na Dios​—say ganggan, odino bangat to, tan ed saray pananontonan to a nikurit la ed Biblia. No gawaen tayo iya, “say karukey na saray agew, tan saray taon na bilay, niarum ira” ed sikatayo. On, anggan natan et napanggayagaan tayo lay bilay a walaay deen tan napaliisan iray gegemtan a pakapeligroan na masakbay lan ipatey tayo a kaslakan lan nasasagmak na saray managgaway kaugsan. Sakey ni, sarag tayon nodnonoten so ilalon magnayon a bilay diad sakey a mareen a balon mundo.​—Uliran 1:24-31; 2:21, 22.

Bilang katuloyan et kuan nen Solomon: “Say abig na linawa (“maaron-kaabigan,” NW) tan katooran agda ka komon ikaindan; ibaklaw mo ra ed tenger mo; isulat mo ra ed tapi na pusom: Dia ed ontan makaromog ka na pamalangkap tan maong a pakatalos dia ed pakanengneng na Dios tan too.”​—Uliran 3:3, 4.

Say orihinal a lenguahen salita parad “maaron-kaabigan” so kasandin patalos na “matoor ya aro” tan kakaukolanen toy inkamatoor, pikakasakey, tan katooran. Kasin determinado itayon mansiansian maapit ed si Jehova antokamay nagawa? Kasin ipapanengneng tayo so maaron-kaabigan ed saray relasyon tayo ed saray kapananisiaan? Kasin pankikimeyan tayo so pansiansian maapit ed sikara? Diad agew-agew a pidedeneng tayo ed sikara, kasin pansiasiansiaen tayo so ‘tunong na abig na linawa ed dila tayo’ anggaman mairap iray kipapasen?​—Uliran 31:26.

Lapud daakan ed maaron-kaabigan, si Jehova so ‘akaparaan a mamerdona.’ (Salmo 86:5) No nagbabawi itayo la ed saray apalabas a kasalanan tayo tan natan et ipepetek tayo lay kurang tayo, napapaseguroan itayo ya onsabi so “saray panaon na painawa” manlapud si Jehova. (Gawa 3:19) Agta nepeg tayon aligen so Dios tayo diad pamerdona ed arum ed saray impakaluksoan da?​—Mateo 6:14, 15.

Si Jehova so “Dios na katuaan,” tan kaliktan toy ‘inkamatua’ ed saramay onapit ed sikato. (Salmo 31:5) Makapanilalo tayo ta a si Jehova  et magmaliw a Kaaro tayo no duaray estandarte tayo ed panagbilay, a duma so kakikiwas tayo sano kalimog iray Kristiano tan duma met sano agtayo ira kalimog​—singa ed “saray matitila a totoo” ya iyaamot da no anton klase ira na totoo? (Salmo 26:4) Agaylan kakulangkulangan itan, ta “anggapo so bengatlan pinalsa ya agnipanengneng ed arap” nen Jehova!​—Hebreos 4:13.

Say maaron-kaabigan tan inkamatua so nepeg a pablien a singa mabmablin kulintas ya ‘akabaklaw ed tenger tayo,’ ta ontutulong iratan ed sikatayon ‘naromog so palangkap dia ed pakanengneng na Dios tan too.’ Agtayo lambengat kaukolan ya ipanengneng irayan kualidad noagta nakaukolan met ya iyukit iratan ed ‘tapi na puso tayo,’ a pagmaliwen iratan a manunan kabiangan na personalidad tayo.

Bayuboan so Sigpot a Panmatalek ed si Jehova

Intuloy ni na makabat ya ari: “Manmatale’ ka ed Jehova ed simoon a pusom, tan agka onsaral ed tapew na dili a pakatalos mo: Dia ed saray amin a dalan mo sikato so bidbiren mo, et sikato itonton to so saray basbas mo.”​—Uliran 3:5, 6.

Si Jehova so maseguron makanepegan na sigpot a panagmatalek tayo. Bilang say Manamalsa, sikato so “mabiskeg ed pakayari” tan say Lapuan na ‘kabaleg a tuloy na biskeg ed pakapanyari.’ (Isaias 40:26, 29) Nayarian ton sumpalen ya amin so ginagala to. Siempre, say mismon ngaran to et literal a mankabaliksan na “Pagmaliwen To,” tan paeleten toy kompiyansa tayo ed pakayari ton tooren so insipan to! Say katuaan ya ‘agnayarin mantila so Dios’ et pagmaliwen ton sikatoy mismon pinagka-uliran ed katuaan. (Hebreos 6:18) Say sankamanunaan a kualidad to et say aro. (1 Juan 4:8) Sikato so “matunong ed saray amin a walwalna to, tan mapalangkap ed saray amin a kagagawa to.” (Salmo 145:17) No agtayo napanmatalekan so Dios, siopa ni so panmatalekan tayo? Siempre, pian nabayuboan so panmatalek ed sikato, kaukolan tayon ‘tawayan tan nanengneng a si Jehova so maong’ diad pangiyaplika’d naaralan tayo manlapud Biblia diad personal a kabibilay tayo tan diad panmolimoli ed maabig a papawalaen na satan.​—Salmo 34:8.

Panon tayon ‘naimano si Jehova ed amin a dalan tayo’? Oniay kuan na apuyanan a salmista: “Umamengen ko so amin a kimey mo, tan mandalepdep ak ed saray gawagawam.” (Salmo 77:12) Lapud say Dios et agnanengneng, say pandalepdep ed saray alay abig a kimey tan pidedeneng to ed totoo to so importanti pian nabayuboay inkamaapit ed sikato.

Say pikakasi so importanti met a dalan pian naimano si Jehova. Lawas ya ontatawag si Arin David ed si Jehova diad “agew-agew.” (Salmo 86:3) Mabetbet a nampikasi si David a sanlabi, a singa sanen sikatoy nagmaliw a takas diad kalawakan. (Salmo 63:6, 7) “Onkerew kayo ed espiritu ed amin a nengneng na pikakasi,” so insimbawa nen apostol Pablo. (Efeso 6:18) Kaunongan kabetbet so panagpikasi tayo? Kasin panliliketan tayo so personal ya impapuson pitatalosan ed Dios? Sano nipaarap ed mairap iran situasyon, kasin mikakasi itayon patulongan ed sikato? Kasin sipipikasin papaigiya itayo ed sikato sakbay tayon manggawa na saray importantin desisyon? Saray impapuson pikakasi tayo ed si Jehova et pagmaliwen to itayon malugor ed sikato. Tan walaan itayo na panamaseguron talinengen toy pikakasi tayo tan ‘itonton toray basbas tayo.’

Agaylan kakulangkulangan so ‘isaral ed dilin pakatalos tayo’ odino diad saray bantog a totoo na sayan mundo anta sarag tayon sigpot a napankompiyansaan si Jehova! “Agka komon makabat dia ed saray dili a matam,” kuan nen Solomon. Diad kasunian, sikatoy manisimbawa ya: “Ontakot ka ed Jehova, tan onarawi ka ed mauges; sikato naani kasil ed puseg mo, tan utek ed saray pukel mo.” (Uliran 3:7, 8) Say mabunigas a takot ompan agnapaliket so Dios so nepeg a mangontrol ed amin a kiwas, kaisipan, tan emosyon tayo. Say ontan a mapagalang a takot so mangaamper ed sikatayon manggawa na mauges tan makapaabig tan makaligliwa ed espiritual.

Iter Moy Sankaabigan Mo ed si Jehova

Diad anton arum a dalan ya onapit itayo ed Dios? “Igalang mo si Jehova a pati kayarian mo, tan pati saray manunaan a bunga na amin a munat mo,” so panamilin na ari. (Uliran 3:9) Say pangigalang ed si Jehova et kabaliksan ton sikatoy derlengen tan itandoro ed lapag diad panginabang tan mapublikon pibibiang ed kiproklama na ngaran to. Saray ankablin bengatla a pakagalangan tayo ed si Jehova et diad pangusar tayo na  panaon, abilidad, biskeg, tan materyal a kaykayarian tayo. Nepeg a saraya et saray unonan bunga tayo​—say sankaabigan tayo. Agta say panangusar tayo ed personal a kaykayarian tayo et pakapatnagan ed desisyon tayon ‘anapen nin unona so panarian to, tan say inkatunong na Dios’?​—Mateo 6:33.

Say pamagalang ed si Jehova tekep na ankablin kaykayarian tayo so natumangan. “Dia ed ontan saray kamalir mo napano ed inkadaakan,” so ipapaseguro nen Solomon, “tan saray alakan mo manleppua ira ed balo ya alak.” (Uliran 3:10) Anggaman say espiritual ya iyaaligwas et agmankabaliksan na iyaaligwas ed materyal a mismo, say mabunlok a pangusar ed saray kayarian tayo pian nagalang si Jehova so mangitatarok na mayaman a bendision. Say pananumpal ed linawa na Dios so mananustuni a “tagano” parad si Jesus. (Juan 4:34) Ontan met, say pakapibiang ed panagpulong tan panaggaway-babangatan a mangigloria ed si Jehova so manustuni met ed sikatayo. No mansiansia itayo ed ontan a kimey, saray panangisimpenan tayo na espiritual a suplay so napanopano. Say gayaga tayo a mangisisimbolo ed balon alak et manleppua.

Agtayo ta met manilalo ed si Jehova tan manpikasi ed sikato parad inkagenap na materyal a tagano parad kada agew? (Mateo 6:11) Amin a kayarian tayo, so diad tua et manlalapud maaron mangatatawen ya Ama tayo. Si Jehova so mangitarok na kaaruman a bendision unong ed laknab na pakakausar tayo ed ankablin bengabengatla parad kirayewan to.​—1 Corinto 4:7.

Padisiplina ed si Jehova

Diad impakaimano ed kaimportantian na disiplina ed iyapit ed si Jehova, sisimbawaen itayo na ari na Israel: “Anako, agmo mudmoraen so pananusa nen Jehova; agka met onsawa ed panamaat to. Ta say aroen nen Jehova baaten to, singa sakey ya ama a manliket ed anak.”​—Uliran 3:11, 12.

Balet, nayarin mairap tayon awaten so disiplina. “Anggapo so pananusa natan a singa sengeg na liket, noag ingen kaermenan,” insulat nen apostol Pablo, “balet kayari to mangiter na bunga a mareen na katunongan ed saray nailuam la lapu ed sikato.” (Hebreos 12:11) Say panamaat tan disiplina so importantin kabiangan na kibangat a mamaapit ed sikatayo ed Dios. Say panametek a manlalapud si Jehova​—balanglan naawat itan manlapud atateng, diad panamegley na Kristianon kongregasyon, odino diad pandalepdep ed Kasulatan kaleganay personal a panagaral tayo ​—so pakapatnagay panangaro to ed sikatayo. Makabat itayo no awaten itan.

Ombemben a Malet ed Kakabatan tan Pakatebek

Insan, idadanet nen Solomon so kaimportantian na kakabatan tan pakatebek diad pamayubo na maapit a relasyon ed Dios. Iyaabawag to: “Mapalar so too a makaromog na kakabatan, tan say too a makagamor na pakatalos. Ta say pakagamor ed sikato magmaong nen say pakagamor ed pilak, tan say pinabangan ed sikato magmaong nen say dalisay a balitok. . . . Sikato so sakey a kiew na bilay ed saray ompeket ed sikato: tan mapalar so balang sakey a mamemben ed sikato.”​—Uliran 3:13-18.

Diad pangipanonot ed sikatayo na inkipatnag na kakabatan tan pakatebek ed makapakelkelaw iran kimey ed palsa nen Jehova, kuan na ari: “Si Jehova ed panamegley na kakabatan impaalagey to so dalin; ed panamegley na pakatalos inletneg to so saray tawen. . . . Anako, ag-ira komon onarawi ed saray matam: yatol mo so aralem a kakabatan tan kalakal: Dia ed ontan sikara naani bilay ed kamarerwam, tan palabo ed tenger mo.”​—Uliran 3:19-22.

Say kakabatan tan pakatebek so maridios a kualidades. Agtayo lambengat kaukolan a bayuboan iratan noagta bembenan a malet iratan diad agbalot pamaulyan ed mapeleng a panagaral tayo na Kasulatan tan diad panangiyaplika ed naaaralan tayo. “Diad ontan manakar ka dia ed dalan mo a mataletalek,” intuloy ni nen Solomon, “tan say salim agnaani nigapol.” Inyarum to: “Sano ondukol ka, agka naani antakot: on, ondukol ka naani, tan say ugip mo sikato naani masamit.”​—Uliran 3:23, 24.

On, makapanakar itayo tekep na inkaligen tan makaugip a walaay deen na nonot legan a tatalaranan tayo so singa matakew ya isasabi na agew a “biglan kaderal” na marelmeng a mundo nen Satanas. (1 Tesalonica 5:2, 3; 1 Juan 5:19) Anggan diad paganigani lan baleg a kairapan et nawalaan tayo na sayan panamaseguro: “Agka antakot ed bigla a takot, anggan ed kabagbag na marelmeng, sano sikato so onsabi: Ta si Jehova sikato naani panmatalkan mo, tan yagel to so salim a manlapu ed kaerel to.”​—Uliran 3:25, 26; Mateo 24:21.

Gawaey Maong

“Agmo abalaen so maong ed saray kanepegan to,” isisimbawa nen Solomon, “sano wala ed pakayari na limam so panggawa.” (Uliran 3:27) Say panggawa na maong ed arum et lalanoren toy mabunlok a pangusar ed saray kayarian tayo diad biang da, tan dakel so aspekto na saya. Balet agta say panulong ed arum pian nawalaan na maapit a relasyon ed tuan Dios so sankaabigan a bengatlan nagawaan tayo parad sikara legan na sayan “panaon na anggaan”? (Daniel 12:4, NW) Kanian, saraya la sirin so agew a pangipanengneng na seseg ed pangipulong na Panarian tan panggaway-babangatan a kimey.​—Mateo 28:19, 20.

Idadatak met na makabat ya ari so pigaran agamil ya arawian, diad pangibagan: “Agmo ikuan ed kaabay mo, Onlaka, tan ompawil ka, tan nabuas mangiter ak; sano wala ed sika ed abay mo. Agmo nonoten so mauges a sumpa ed kaabay mo, no nengnengnengen mo a manayam a matalek ed abay mo. Agka mikolkol ed too ya andi sengeg, no anggapo so mauges a ginawa to ed sika. Agmo sibletan so too a mapasoot, tan agmo pilien so anggan anto ed saray dalan to.”​—Uliran 3:28-31.

Diad panegek ed rason parad konseho to, kuan nen Solomon: “Ta say marumsis sikato so sakey a kadimla nen Jehova; balet say pikakaaro to wala ed maptek. Say ayew nen Jehova wala ed abung na marelmeng; balet bendisionan to so panag-ayaman na saray maptek. Petepeteg a sikato ludlureyen to so saray managludlurey; balet mangiter na palabo ed mapaabeba. Say makabat tawiren to so gloria; balet say baing sikato so kitageyan na saray maatiw.”​—Uliran 3:32-35.

Ta pian napanggayagaan tayo so inkamaapit ed si Jehova, nepeg ya agtayo mamabrika na masilib tan makapasakit iran pakana. (Uliran 6:16-19) Dia lambengat ed panggawa tayo na maptek ed imaton na Dios a nagamoran tayo so panangabobon tan panamendision to. Naawat tayo met so agpinirawat a galang sano naimano na arum a sikatayoy onkikiwas unong ed madibinon kakabatan. Ipulisay tayo sirin iray masilib a dalan na sayan marelmeng tan marawal a mundo. On, gegemtanen tayo so maptek a kurso tan bayuboan so inkamaapit ed si Jehova!

[Saray litrato ed pahina 25]

“Igalang mo si Jehova a pati kayarian mo”