IBABAGA NA ARUM YA ANDI. Say pangusar na Biblia bilang pinagka-giya ed bilay et inkompara na sakey ya doktor diad pangusar na 1920’s ya libro ed pambangat na chemistry ed eskuelaan. Wala ni ingen so toon agmanrerespeto ed Biblia ya nantepet no kasin usaren moy manual na daan tan agla onggaganan computer pian naamtaan mo no panon ya usaren so sankabaloan ya computer. Singa da ibabagan say Biblia et karaanan la kanian agla mausar.

Akin et usaren tayo ni itan ya dagdaan ya giya anta moderno tan high-tech lay mundo natan? Diad tua, dakdakel lay website tan blog ya pakanengnengan na nanduruman advice tan giya ed bilay. Diad saray programa ed TV et amayamay so bilin ya manlalapud saray matatalinon psychologist, eksperto, tan autor. Tan diad saray bookstore et dakdakel so ilalakon libro ya makatulong kuno ed bilay tan nagmaliw la itan ya baleg a negosyo.

Diad saratan ya amin a sankabaloan ya impormasyon natan, akin et usaren tayo ni Biblia​—sakey a libron akompleto manga 2,000 taon lay apalabas? Duga kasi so ibabaga na arum ya no usaren tayo itan ya dagdaan ya libro bilang pinagka-giya et singa tayo manguusar na karaanan ya libro ed chemistry odino manual na computer? Diad tua, aliwan duga itan ya panagkatunongan. Mapmaples ya manguuman so science tan teknolohiya, pero kasin manguuman so pankaukolan na too? Andi, ta labay nin siansia ya naamtaan na totoo so kabaliksan na bilay tan no panon ya naliknay liket tan seguridad, napansiansiay maong ya relasyon ed pamilya, tan nawalaan na maong iran kakaaro.

Anggano dagdaan lay Biblia, nabasa ditan so tungkol ed saratan ya pankaukolan na too tan arum ni. Tan ibabagan mismo na Biblia ya impuyan itan na Amalsa. Mangiiter itan na panangiwanwan ed bilay tayo tan iparaan to tayo ed anggan anton subok. (2 Timoteo 3:16, 17) Ibabaga met na satan ya saray simbawa to et ag-onkupas—ya agbalot ondaan iray bilin to! Oniay inkuan na Biblia: “Say salita na Dios et mabilay.”​—Hebreo 4:12.

Kasin tua iratan ya ibabaga na Biblia? Kasin karaanan la itan, odino talagan mausa-usar tan makanakana itan ed amin ya libro kanian nibagan “mabilay”? Say gagala na sayan edisyon na Say Panagbantayan, say unona ed saray serye na espisyal ya isyu, et pian tulongan kan naamtaan iray ebat ed saratan ya tepet.