SI Don, a sakey ed saray Tasi nen Jehova diad Canada, et talagan panggugunaetan toy mitongtong ed saray totoon manaayam ed karsada. Oniay imbaga to nipaakar ed sakey ed sarayan totoo: “Walay sakey a laki a say ngaran to et Peter, ya manaayam labat ed gilig na dalan. Sikato lay sankarutakan ya toon anengneng ko ditan. Makapadimla tan amta toy gawaen to pian arawian na totoo. Agton balot labay ya awaten so tulong na arum.” Balet diad nanduruman panaon ed loob na masulok ya 14 a taon et maan-anos si Don ya angipanengneng na kaabigan ed sayan too.

Sakey ya agew, intepet nen Peter ed si Don: “Akin et panaabalaan mo ak ni? Akin et imamalasakit mo ak anta agak la pibabalian na arum?” Mataktikan angusar si Don na taloran teksto pian sabien so puso nen Peter. Unona, tinepetan toy Peter no amta to ya walay ngaran na Dios tan impabasa tod sikato so Biblia diad Salmo 83:18. Insan, pian ipanengneng nen Don no akin ya imamalasakit toy Peter, impabasa to so Roma 10:13, 14, ya mangibabagan “balang sakey ya ontatawag ed ngaran nen Jehova et niliktar.” Kayari to et binasa nen Don so Mateo 9:36, insan to met impabasa ed si Peter. Oniay ibabaga na satan: “Sanen anengneng [nen Jesus] iray totoo, akasian to ra, lapud singa ra kinatatan tan pinaulyanan a karnero ya andiay managpastol.” Akaakis si Peter, insan tinepet to: “Sakey ak ed sarayan karnero?”

Ginmapon manguman si Peter. Nanames, kinatlian toy balbas to, tan nampales na marakep a kawes ya inter nen Don. Manlapud saman et naynay lan malinis so itsura nen Peter.

Walay diary nen Peter. Diad bandad gapo na diary to, puro negatibo tan maermen so isusulat to, balet saray agano nin insulat to et duma la. Oniay nabasa ed sakey ya insulat to: “Naamtaan kod sayan agew so ngaran na Dios. Natan no manpipikasi ak, diad si Jehova la. Balibalin naamtaan so ngaran to. Imbaga nen Don ya sarag kon magmaliw ya Kaaro si Jehova, tan  wadtan ya lanang pian ondengel ed siak, anggan kapigan tan anggan antoy nagawa.”

Say sampot ya insulat nen Peter et parad atsi to tan agi ton laki. Oniay insulat to:

“Aliwliway liknaan ko natan. Masiken ak lan talaga. Balet anggan saya lay sampot ya agew ko, amtak ya nanengneng ko lamet so kaarok [si Don] diad Paraiso. Legan yon babasaen ’ya, anggapo ak la. Balet no walay nanengneng yon sakey a laki diad ponpon ko a singa duma ed saray wadman, mitongtong kayod sikato, tan ipangasi yon basaen iyan melag ya asul a libro [say tutukoyen to et say libron uusaren ed panag-aral na Biblia ya “The Truth That Leads to Eternal Life” ya inter ed sikato pigay taon lay apalabas]. * Ibabaga to dia ya nanengneng ko lamet so kaarok diad Paraiso. Talagan panisiaan ko ’ya. Say maaron agi yo, Peter.”

Kayari ponpon, imbaga nen Ummi ya atsi nen Peter: “Manga duay taon lay apalabas, kinatongtong ak nen Peter. Diad dakel a taon, singa diad saman ko labat naimano a maliket. Inmimis ni ingen.” Imbaga tod si Don: “Basaen ko may libro, ta antokaman ya akatenyeg ed puso na agik et seguradon espisyal.” Inmabuloy met si Ummi ya sikatoy iyaralan na sakey ed saray Tasi nen Jehova ya usaren day mas balon libro ya Anto so Peteg ya Ibabangat na Biblia?

Sarag tayo met so ag-onnengneng ed itsura, ipanengneng so tuan aro, tan mananos ed amin a klase na totoo. (1 Tim. 2:3, 4) No gawaen tayo itan, nayarin napakiwas tayo iray totoo ya singa si Peter, ya anggaman aliwan marakep so itsura da ed pakanengneng na too, maong balet so puso ra. Amta tayo a say Dios ya “onnenengneng ed puso” et patuboen toy katuaan ed totoon walaan na dugan kipapasen na puso.—1 Sam. 16:7; Juan 6:44.