Walay makapaliket ya mensahe nen Jehova ed si Ezequiel ya impromisa ton pankasakeyen so nasyon na Israel kayari ran makapawil ed Insipan a Dalin. Satan ya mensahe et mangipapasakbay met ed pankakasakey na totoo na Dios ya nagawa legan na kaunoran iran agew.

Imbaga nen Jehova ed propeta ton si Ezequiel ya sulatan to so duaran bislak. Say isulat tod samay sakey ya bislak, “Parad Juda tan saray totoo na Israel a kaiba to,” tan diad samay sakey, “Parad Jose, say bislak na Efraim, tan say interon sankaabungan na Israel a kaiba to.” Say duaran bislak et magmaliw ya “saksakey” ed lima nen Ezequiel.—Eze. 37:15-17.

 Anto so irerepresenta na “Efraim”? Say unonan ari na samploran-tribu a panarian diad norte, si Jeroboam, et nanlapud tribu na Efraim, ya nagmaliw a manunaan ya tribu. (Deu. 33:13, 17; 1 Ara. 11:26) Sayan tribu et nanlapud anak nen Jose ya si Efraim. (Num. 1:32, 33) Si Jose et akaawat na espisyal a bendisyon manlapud ama ton si Jacob. Kanian duga labat ya say bislak ya mangirerepresenta ed samploran-tribu a panarian et natawag ya “bislak na Efraim.” Nen insulat nen Ezequiel so propesiya nipaakar ed duaran bislak, say panarian na Israel ed norte et abayag lan walad sakop na saray Asiryano manlapu ni nen 740 B.C.E. (2 Ara. 17:6) Kanian diad saman ya panaon et dakdakel ya Israelita so nitaytayak ed interon Empiryo na Babilonia, ya sinmalat ed Empiryo na Asirya.

Nen 607 B.C.E., say duaran-tribu a panarian diad abalaten tan siopaman ya nayarin atilak ed panarian ed norte so inawit ya bihag ed Babilonia. Saray ari ya nanlapud pamilya nen Juda so nanuley ed sayan duaran tribu, tan kaulop da iray saserdote, ta saraya et nanlingkor diad templo ed Jerusalem. (2 Awa. 11:13, 14; 34:30) Kanian duga labat ya say duaran-tribu a panarian so irerepresenta na bislak ya “parad Juda.”

Kapigan pinan-iba iyan duaran simbolikon bislak? Agawa iya nen pinmawil ed Jerusalem iray Israelita pian ipaalagey lamet so templo nen 537 B.C.E. Saramay mangirerepresenta ed duaran-tribu a panarian tan samploran-tribu a panarian et bansag ya pinmawil manlapud inkibantak da. Diad saman et agla naapag iray Israelita. (Eze. 37:21, 22) Sikaray nankakasakey lamet ya nandayew ed si Jehova. Sayan pankakasakey et impasakbay met la nen propetan Isaias tan Jeremias.—Isa. 11:12, 13; Jer. 31:1, 6, 31.

Anton importantin katuaan nipaakar ed dugan panagdayew so ipapabitar na sayan propesiya? Saya: Pagmaliwen nen Jehova ya “saksakey” iray mandadayew ed sikato. (Eze. 37:18, 19) Kasin sayan sipan ya pankakasakey et nagagawa ed panaon tayo? On. Sayan propesiya et unonan asumpal nen 1919 sanen kalkalnan naorganisa tan nankakasakey lamet iray totoo na Dios. Ag-agawaan nen Satanas so plano to ya permanentin buyaken ira.

Diad saman a panaon, karaklan ed saramay akikasakey et walaan na ilalon nakaiba nen Jesus diad tawen bilang arari tan saserdote. (Apo. 20:6) Sikara imay simbolikon bislak a parad Juda. Balet diad inlabas na panaon, dinmakel lan dinmakel iray walaan na ilalon manbilay diad dalin ya akiulop ed sarayan espiritual ya Judio. (Zac. 8:23) Sikara imay simbolikon bislak a parad Jose, tan ag-ira magmaliw ya arari a kaiba nen Kristo.

Sayan duaran grupo et saniban manlilingkor natan ed si Jehova bilang totoo to ya uuleyan na sakey ya Ari, si Jesu-Kristo, a sikato may tutukoyen ed propesiyan “si David a lingkor ko.” (Eze. 37:24, 25) Impikasi nen Jesus ya amin a papatumbok to et ‘magmaliw a saksakey, a singa say Ama et akikasakey ed sikato tan sikato et akikasakey ed Ama to.’ * (Juan 17:20, 21) Impasakbay met nen Jesus ya say melag a pulok na saray alanaan ya papatumbok to tan say ‘arum a karnero’ to et “magmaliw iran sakey a pulok.” Amin da et walaay “sakey a managpastol.” (Juan 10:16) Saratan ya imbaga nen Jesus et balibalin deskripsion ed pankakasakey na saray mandadayew ed si Jehova natan antokaman so ilalo ra diad arapen!