1-2. (a) Akin et imbaga nen apostol Pablo ya say aro so “sankaimportantian” ed amin ya kualidad? (b) Anto ran tepet so ebatan tayo ed sayan artikulo?

 NEN sinulatan nen apostol Pablo iray agagi ed Corinto tungkol ed pananisia, ilalo, tan aro, imbaga to ya “say sankaimportantian ed saraya et say aro.” (1 Cor. 13:13) Akin et ontan so imbaga nen Pablo? On ta no balon mundo la, agtayo la kaukolan so pananisia ta agawa la iray sipan na Dios. Agtayo met la kaukolan iratan ya ilaloan o talaranan ta asumpal lan amin. Pero say panangaro et permanente tan anggapoy sampot to. Tuloytuloy tayon aroen si Jehova tan say kapara tayon too. Diad tua, lalon onelet so panangaro tayod sikara diad anggad angga.

² No panangaro sirin so sankaimportantian ed amin ya kualidad, maabig no pantongtongan tayo itan. Walay taloran tepet ya ebatan tayo ed sayan artikulo. Unona, akin et kaukolan tayon aroen so sakey tan sakey? Komadua, panon tayon naipanengneng ya inar-aro tayo ray agagi? Tan komatlo, antoy gawaen tayo pian mas ombiskeg so panangaro tayo ed sakey tan sakey?

3. Anto ray rason akin et kailangan tayon aroen so sakey tan sakey?

³ Akin et importante ya manaaroan tayo? Say sakey ya rason et lapud panangaro so pakanengnengan ya sikatayo so tuan Kristiano. Oniay imbaga nen Jesus ed saray apostol to: “Diad saya et naamtaan na amin a sikayo iray disipulok ​—no manaaroan kayo.” (Juan 13:35) Sakey ni, kailangan so panangaro pian mansiansia so pankakasakey tayo. Imbaga nen Pablo ya say aro so “perpekton bedber na pankakasakey.” (Col. 3:14) Pero wala ni sakey ya importantin rason no akin ya manaaroan tayo. Oniay insulat nen apostol Juan: “Siopaman a mangaaro ed Dios et nepeg ya aroen to met so agi to.” (1 Juan 4:21) On, no inaro tayo ray agagi tayo, patunay itan ya inaro tayoy Dios.

4-5. Akin ya say panangaro tayo ed Dios et walay koneksion to ed panangaro tayo ed saray agagi? Mangiter na ilustrasyon.

⁴ Mankonektaan so panangaro tayo ed Dios tan panangaro tayo ed saray agagi. Pian natalosan tayo itan, isip mo pa no panon ya mankonektaan so puso tan say arum ya parte na laman tayo. Singa bilang, pian walay ideya na doktor ed kondisyon na puso tayo, say sakey ya i-check to et say peles na pulso tayo. Antoy naaralan tayod satan tungkol ed panangaro?

⁵ Say panangaro tayo ed saray agagi so sakey ed saray pakasukatan o pakanengnengan no kasin mabiskeg so panangaro tayod Dios. Kanian no nalikas mo ya singa ombebetel lay panangarom ed agagi, ompan sintomas itan ya ombebetel met lay panangarom ed Dios. Diad kabaliktaran balet, no lanang kan manggagawa na paraan pian naipaliknam ed saray agagi ya inar-arom ira, labay ton ibaga, inar-arom met so Dios.

6. Akin et agtayo dapat ibabaliwala no nalilikas tayon ombebetel lay panangaro tayo ed saray agagi? (1 Juan 4:7-9, 11)

⁶ No nalilikas mon ombebetel lay panangarom ed saray agagi, agmo komon itan ibabaliwala. Akin ey? On ta labay ton ibaga, napepeligro lay relasyon mo ed si Jehova. Seryoso itan kanian oniay impanonot nen apostol Juan ed sikatayo: “Say agmangaaro ed agi to a nanenengneng to et agto nayarian ya aroen so Dios ya agto nanenengneng.” (1 Juan 4:20) On, tandaan tayo ya no agtayo inaro iray agagi tayo, nabalang tayoy pabor nen Jehova.​—Basaen so 1 Juan 4:7-9, 11.

7-8. Anto ray paraan pian naipalikna tayo ed saray agagi ya inar-aro tayo ra?

⁷ Diad Biblia, aminpigapiga ya ingganggan iray Kristiano ya “manaaroan” ira. (Juan 15:​12, 17; Roma 13:8; 1 Tes. 4:9; 1 Ped. 1:22; 1 Juan 4:11) Pero di ba, say panangaro et emosyon ya walad puso tayo, tan anggapo tay too ya nabasa to no antoy walad puso tayo. Anto sirin so gawaen tayo pian nalikna na arum ya inar-aro tayo ra? Ipanengneng tayo itan diad salita tan gawa.

⁸ Walay nanduruman paraan ya ibabaga na Biblia pian naipalikna tayoy panangaro. Niay pigaran alimbawa: “Mansalita kayoy tua ed balang sakey.” (Zac. 8:16) “Pansiansia yoy kareenan ed balang sakey.” (Mar. 9:50) “Idaulo yo so pangipanengneng na galang ed sakey tan sakey.” (Roma 12:10) “Awat yo so sakey tan sakey.” (Roma 15:7) “Itultuloy yon itepel . . . tan mabulos a perdonaen so sakey tan sakey.” (Col. 3:13) “Itultuloy yon sakbaten so ambelat ya awit na balang sakey.” (Gal. 6:2) “Itultuloy yon ligliwaen so sakey tan sakey.” (1 Tes. 4:18) “Itultuloy yon . . . pabiskegen so sakey tan sakey.” (1 Tes. 5:11) “Ipikasi yo so balang sakey.”​—Sant. 5:16.

9. No liligliwaen tayo iray agagi, akin et patunay itan ya inar-aro tayo ra? (Nengnengen met so litrato.)

⁹ Diad saramay abitla ed parapo 8, manpokus tayo pa ed samay imbaga nen Pablo  ya: “Itultuloy yon ligliwaen so sakey tan sakey.” No liligliwaen tayo iray agagi, akin et patunay itan ya inar-aro tayo ra? Base ed sakey ya reperensya, say kahulugan na Griegon salita ya in-translate ya “ligliwaen” et “iyabay ed sakey ya too ya ondadalan ed mair-irap ya subok ta labay mon pasesegen.” Kanian no liligliwaen tayo so sakey ya agi ya onkakapuy so liknaan to, singa tayo tutulongan ya onalagey lamet pian makapantultuloy ya manakar ed dalan ya paarap ed bilay. Kada no ipalikna tayo ed sakey ya brother o sister ya agto bukbukor tan walay malasakit tayod sikato, patunay itan ya tua so panangaro tayo.​—2 Cor. 7:6, 7, 13.

10. Akin et importante so panangasi pian naligliwa tayo ray agagi?

¹⁰ Mankonektaan so panangasi tan pangiter na ligliwa. Akin et nibaga tayo itan? On ta no say sakey et makasi, labalabay ton ligliwaen iramay ondadalan ed irap tan subok, tan walan-walay gawaen to pian nainawaan ira. Importante sirin ya makasi tayo, ta atan so manpakilos ed sikatayo ya ligliwaen so arum. Ontan ya ontan si Aman Jehova. Imbaga nen Pablo ya si Jehova so “Ama na maaron panangasi tan say Dios na amin a ligliwa.” (2 Cor. 1:3) Si Jehova so Ama o Subol na maaron panangasi ta manleppua so panangasi to ed saray totoo. Lapud makasin Dios si Aman Jehova, seseguradoen to ya naligliwa to tayo “diad amin a subok a dadalanen tayo.” (2 Cor. 1:4) No panon ya say malinis ya danum ya nanlapud subol et mangiter na inawa ed sakey ya apaet, si Jehova et mangiiter met na inawa tan ligliwa ed saramay ondadalan ed subok. Panon tayon naalig si Jehova? Kaukolan tayon aralen ya ipanengneng iray ugali ya konektado ed panangasi. Anto iratan ya ugali?

11. Base ed Colosas 3:12 tan 1 Pedro 3:8, anto ni ran ugali so kaukolan pian agtayo onsawan aroen tan ligliwaen iray agagi tayo?

¹¹ Antoy makatulong pian ‘itultuloy tayon ligliwaen’ tan aroen so sakey tan sakey diad kada agew tan agtayo onsawan mananap na paraan pian naligliwa tayo so arum? Kaukolan tayon aralen ya ipanengneng iray balibalin ugali, singa say kaabigan, pililikna, tan panamabli ed agagi. (Basaen so Colosas 3:12; 1 Pedro 3:8.) No walad sikatayo iratan ya ugali, natural lad sikatayo ya imalasakit iray agagi, tan agtayo makareen anggad agtayo ira naligliwa o napaseseg. Marakep no saratan ya ugali et parte la na inkatoo tayo, ta say kuan nen Jesus: “No anto so walad puso, satan so ibabalikas na sangi. Say maong a too et mangipapaway na maong iran bengatla manlapud maong a kayamanan to.” (Mat. 12:34, 35) On, no mabulos tayon liligliwaen iray agagi tayo, patunay itan ya inar-aro tayo ra.

12. (a) Antoy kaukolan tayon panalwaran? (b) Anton tepet so pantongtongan tayo?

¹² Siempre, labay tayon amin ya “itultuloy [ya] aroen so sakey tan sakey.” (1 Juan 4:7) Pero agtayo lilingwanan imay warning nen Jesus ya “ombetel so panangaro na karaklan a totoo.” (Mat. 24:12) Tua, aliwan saray tuan Kristiano so tutukoyen nen Jesus. Pero kaukolan tayo nin siansiay manalwar, ta ompan naimpluensyaan itayo na ugali na saray totoo ed sayan mundo. Maslak ya totoo natan et sarili da labat so inaro da tan anggapoy pibabali dad arum. Kanian usisaen tayoy sarili tayo. Pantongtongan tayo sirin iyan tepet: Antoy sakey ya pakanengnengan ya ampetapetang o mabisbiskeg so panangaro tayo ed saray agagi?

13. Panon ya nasubok so panangaro tayod saray agagi?

 ¹³ Say sakey ya pakanengnengan no kasin mabiskeg so panangaro tayo ed saray agagi et no antoy reaksion tayo no walay onlesan mairap ya situasyon. (2 Cor. 8:8) Imbaga nen apostol Pedro so sakey ed saratan ya situasyon. Kuan to: “Manuna ed amin, nawalaan kayo komon na aralem a panangaro ed sakey tan sakey, lapud sasakoban na aro so dakel a kasalanan.” (1 Ped. 4:8) On, nasubok so panangaro tayo ed saray agagi no nasakitan da tayo tan no nanengneng tayoy lingo o kakapuyan da.

14. Base ed 1 Pedro 4:8, anton klase na panangaro so ipanengneng tayo? Mangiter na ilustrasyon.

¹⁴ Nengnengen tayo pan maong imay imbaga nen Pedro. Imbaga to ya nawalaan tayo komon na “aralem a panangaro.” Say literal ya kahulugan to may salitan “aralem” ya inusar nen Pedro et “apinat.” Imbaga met nen Pedro ya say ontan ya klase na panangaro et sakoban toy kasalanan. Pian natalosan tayoy labay ya ibaga nen Pedro, imanoen pa iyan ilustrasyon: No walay lamisaan tayo ya dakdakel so gasgas o mantsa to, apisan tayo itan na tela ya sarag ton sakoban so amin ya  gasgas tan mantsa. Ontan met so gawaen tayo ed saray lingo tan kakapuyan na saray agagi. Say panangaro tayo ed sikara et singa stretchable ya tela. No pinaten tayoy panangaro tayo, aliwa labat ya sakey o duaran kasalanan so sarag tayon sakoban o perdonaen, noagta “dakel a kasalanan.”

15. No mabiskeg so panangaro tayo ed saray agagi, antoy sarag tayon gawaen? (Colosas 3:13)

¹⁵ Aminen tayo ya no maminsan et aliwan mainomay so mamerdona. Pero no mabiskeg so panangaro tayo ed saray agagi, mabulos tayo ran perdonaen anggano mairap. (Basaen so Colosas 3:13.) Kanian no walay akasakit ed sika tan mabulos mon pinerdona, labay ton ibaga, mabiskeg so panangarom ed saray agagi tan labay mon napaliket si Aman Jehova. Anto ni makatulong pian nitepel tayoy lingo na arum tan naperdona tayo ra?

16-17. Anto ni makatulong pian naitepel tayoy lingo na arum? Mangiter na ilustrasyon. (Nengnengen met so litrato.)

¹⁶ Imbes ya manpokus ka ed saray lingo na agagi, saray maong ya ugali da so pampokusan mo. Imanoen iyan ilustrasyon. Isip mo pa ya wala kad gathering kaiba iray agagi. Malikeliket kayo tan antis kayon mansisian, nampa-picture kayo. Diad cellphone mo et angala ka na taloran shot pian walay pampilian. Pero apansin mo ya walay shot ya akasibangot imay sakey ya brother. Antoy gawaen  mo ey? Seguradon i-delete mo la itan, ta wala met ni duara ya marakep so inkaala to tan akaimis kayon amin.

¹⁷ Saray nagagawa ed bilay tayo kaiba iray agagi et singa saratan ya litrato. Di ba, masaya tayo no kaiba tayo ray agagi? Panon to balet no asakitan ka ed imbaga o ginawa na sakey ya brother o sister, antoy gawaen mo? Imbes ya atan ya lanang so sankanonot mo, mas marakep no palabasen mo la itan tan lingwanan mo la. Ekal mo la o “i-delete” mo la itan ed memoryam. (Pro. 19:11; Efe. 4:32) Labay ton ibaga, itepel mo lay lingo na agim. Sabagay, seguradon mas dakel so maliket ya pinagsamahan yo—aman la so nonot mo.

18. Anto ray manunan punto ya tinalakay tayo ed sayan artikulo?

¹⁸ Akin et importante ya pabiskegen tayoy panangaro tayo ed sakey tan sakey? Singa tinalakay tayo, no inaro tayo ray agagi, patunay itan ya inaro tayoy Jehova. Antoy gawaen tayo pian naipanengneng tayoy panangaro tayo ed saray agagi? Say sakey ya paraan et no ligliwaen tayo ra. No makasi tayo ya singa si Jehova, napakilos tayon “itultuloy [ya] ligliwaen so sakey tan sakey.” Antoy gawaen tayo pian mansiansian mabiskeg so aroan tayo? Mabulos tayon manpeperdonaan.

19. Akin et kakkaukolan tayon ipanengneng so panangaro natan?

¹⁹ Akin et kakkaukolan tayo natan ya pabiskegen so panangaro tayo ed sakey tan sakey? Oniay imbaga nen Pedro ya rason: “Asingger lay anggaan na amin a bengatla. Kanian, . . . nawalaan kayo komon na aralem a panangaro ed sakey tan sakey.” (1 Ped. 4:7, 8) Legan ya manasingger so anggaan, antoy iilaloan tayon nagawa? Oniay imbaga nen Jesus: “Busolen kayo na amin a nasyon lapud ngaran ko.” (Mat. 24:9) Pian makapanmatoor tayo anggano busolen itayo na mundo, dapat walay pankakasakey tayo. No mabiskeg so aroan tayo, agan balot nabuyak nen Satanas so pankakasakey tayo. Akin ey? On ta say aro so “perpekton bedber na pankakasakey”!​—Col. 3:14; Fil. 2:1, 2.