• “Pakaliknak et singa manbibii si asawak.”

• “Abebbeba tan pap-pangit so pakanengneng kod sarilik. Singa anggapo lay kuentak.”

• “Ambelbelat ed liknaan ta anggapoy napangibagaan ko.”

• “Singa anggapoy pibabali nen Jehova ed siak.”

Komento iraya na asawan bibii ya say mister da et onnenengneng ed pornograpiya. Talagan ansakisakit itan ed asawan bii. No pigaran bulan o taon la itan ya iyaamot na mister to, ompan agto lan balot pantiwalaan. Oniay imbaga na sakey ya asawan bii, “Kuan kod sarilik, ‘Singa aliwa lan saya may laki ya akiasawaan ko. Anto ni kasi arum ya iyaamot tod siak?’”

Imparaan iyan artikulo parad saray asawan bibii ya say mister da et onnenengneng ed pornograpiya. a Nabasa dia iray prinsipyo ed Biblia ya makatulong pian onlemew so liknaan to, nalikna toy suporta nen Jehova, ondeen so nonot to, tan mansiansian mabiskeg ed espiritual. b

Tua, agmo kontrolado so gagawaen na mister mo. Pero wala ray sarag mon gawaen pian nabawasan so belat na liknaan mo tan ondeen so nonot mo. Nia ray pigara:

Agmo tetetelen so sarilim. Ompan isipen na asawan bii ya kasalanan to ya onnenengneng ed pornograpiya so asawa to. Singa bilang, pakalikna nen Alice c et singa walay kulang ed sikato. Naisip to, ‘Akin kasi et mas labay nen asawak so onnengneng ed arum ya bii?’ Say arum balet ya bibii et nakokonsiensia ra ed reaksion da ta singa pababalegen da laingen so problema. Oniay imbaga nen Daniella: “Pakaliknak et kontrabida ak, tan lapud petang na ulok et agko napigilan so pasnok ko ed gagawaen to.”

No ontan so naliliknam, tandaan mo ya agka tetetelen nen Jehova ed kasalanan nen asawam. Oniay nabasa ed Santiago 1:14: “Nasusubok so kada sakey sano sikatoy nasagyat tan natangguyor na dilin pilalek to.” (Roma 14:12; Fil. 2:12) Diad tua, papablien nen Jehova so katooran mo.—2 Awa. 16:9.

 Tandaan mo met ya no onnenengneng so asawam ed pornograpiya, agto labay ya ibagan makapuy kan bii tan kinmulang ka bilang asawa. Ibabaga na saray eksperto ya no say sakey et onnengneng ed pornograpiya, wala ray seksual ya pilalek to ya agan balot napenek na anggan siopan bii.

Kontrol moy isip mo. Manlapu nen naamtaan nen Catherine ya onnenengneng ed pornograpiya so mister to, lanang to lan pansususpetsaan. Onia met so imbaga nen Francesca: “Aburido ak la no agko amtay kulaan nen asawak. Sanagew ya agak makareen.” Inamin na arum ya bibii ya agaylay pakababaing da no wadtan iray agagi ya makaamta ed gagawaen na mister da. Ibabaga met na arum ya mas maong lan sarilien day problema da ta anggapo met lanlamang kunoy makatalos ed dadalanen da.

Natural met labat no ontan so naliknam. Pero no agmo labanan irayan liknaan, ag-ondeen so nonot mo. Mas marakep no pabiskeg moy espiritualidad mo tan say relasyon mod si Jehova, ta atan so mangiter ed sika na biskeg pian nakayam so situasyon mo.—Sal. 62:2; Efe. 6:10.

Makatulong met no basaen tan dalepdepen mo iray bibii ed Biblia ya aproblema met pero nampikasi irad si Jehova tan kinerew day tulong to. Agmet lanang ya eekalen nen Jehova so problema na saray lingkor to, pero iikdan to ray deen na nonot. Singa bilang, isip mo pay Hana. “Agaylay ermen [to]” lapud problema rad pamilya. Pero kayari na ‘andukey ya impanpikasi tod si Jehova,’ dinmeen so nonot to anggano agto ni amta no panon ya nasolusyonan so problema to.—1 Sam. 1:10, 12, 18; 2 Cor. 1:3, 4.

Manpatulong ka met ed saray elder. Ibabaga na Biblia ya singa ra “amotan ed dagem, [tan] pansaniban no bagyo.” (Isa. 32:2) Ompan walay i-suggest da ya maespiritual ya sister ya napangibagaan moy liknaan mo tan napabiskeg to ka.—Pro. 17:17.

Kasin walay nagawaan mo pian natulongan moy asawam ya itunda so bisyo to? Posible. Pian nasolusyonan so problema, ibabaga na Biblia ya “mas maong ni duara nen say sakey.” (Ecl. 4:9-12) Base ed impan-research na saray eksperto, nalmoan da ya no teamwork so sanasawa, mas baleg so posibilidad ya naekal na asawan laki so adiksion tod pornograpiya tan napapawil toy tiwala na misis to.

 Siempre, akadepende ed si asawam no talagan desidido ya itunda so bisyo to. Kasin lanang ton ipipikasi ed si Jehova ya nalabanan to komoy mauges ya pilalek to tan nampatulong la ed saray elder? (2 Cor. 4:7; Sant. 5:14, 15) Kasin manggagawa na paraan pian makaarawi ed tukso? Singa bilang, kasin iistriktoan toy sarili to ed panguusar toy gadyet tan iiwasan to iray situasyon ya natukson onnengneng ed pornograpiya? (Pro. 27:12) Kasin akaparaan ya ibagad sika so amin ya gagawaen to tan mabulos ya manpatulong ed sika? No on so ebat to, sinyales itan ya natulongan mo sirin.

Imanoen so alimbawa na sanasawan si Felicia tan Ethan. Ugaw ni Ethan et naadik lad pornograpiya. Nantongtongan dan dua ya agkomon nababaingan si Ethan ya ibagad si Felicia no natutukson onnengneng ed pornograpiya. Oniay imbaga nen Ethan: “Anggapoy iyaamot kod si asawak. Lanang to ak ya kukumustaen tan papanonotan pian agak natukson manggaway aliwa. Tutulongan to ak pian nakontrol koy pani-Internet ko.” Siempre, nasasakitan si Felicia no natutuksoy Ethan ya onnengneng ed pornograpiya. Oniay kuan nen Felicia: “No pampasnokan ko tan pinunuyan koy naliliknak, agko laingen natulongan ya naitunday bisyo to. Pero no mahinahon kamin mantongtong, mas determinado ya labanan so bisyo to pian agto nasakitay liknaan ko.”

On, baleg so nitulong na komunikasyon pian nitunda na asawan laki so bisyo to tan napapawil to lamet so tiwala nen misis to. Siempre, no ibaga na asawan laki ed misis to iray kakapuyan ya lalabanan to, no anto ray gagawaen to, tan no iner so kulaan to, agpanhinalaan nen misis to ta amta ton anggapoy iyaamot to.

Kasin pakaliknam et sarag mo met ya gawaen imay ginawa nen Felicia? No on, marakep sirin no basaen tan pantongtongan yon sanasawa iyan artikulo. Nepeg ya tandaan nen mister mo ya say goal to et itunda toy bisyo to tan napapawil to lamet so tiwalam. Dapat agto sintien no labay mon pantongtongan yo so problema to tan no antoy epekto tod sika, tan kailangan ton talosan so naliliknam. Sika balet ey, antoy goal mo? Kailangan mon suportaan so pani-effort to ya itunday bisyo to tan ikdan moy tsansa ya napapawil to lamet so tiwalam. Man-research kayon dua pian natalosan yo no akin ya wala ray natutukson onnengneng ed pornograpiya tan no panon ya naitunda itan ya bisyo. d

No iisipen mo ya mansumpal lanlamang ed kolkolan  so pantongtong yo, ompan mas marakep no mangipila kayoy elder ed pantongtong yo. Amay komportable kayod sikato tan natulongan to kayon mantongtong ya mareen. Tandaan mo ya anggano naitunda la nen asawam so bisyo to, ompan ag-ompawil ya tampol so tiwalam ed sikato. Agka komon onsusuko. Say pampokusan mo et no anto la ray inaligwasan na relasyon yon sanasawa, anggano angkekelag labat iratan. Anosan yo labat, ta diad ilabas na panaon, ombiskeg lanlamang so relasyon yo.—Ecl. 7:8; 1 Cor. 13:4.

Panon to no nitunda la na mister mo so bisyo to, pero apawil to lamet? Labay to kasin ibaga, agton talaga labay so manguman tan anggapo lay pag-asa to? Andi met. No say sakey et naadik lad pornograpiya, ompan legay bilay to lan labanan so tukso. Anggano pigaran taon to lan nitunda itan, posiblin napawil to lamet. Pian agto la itan napawil-pawil, kaukolan ya tuloytuloy ton istriktoan so sarili to anggano singa nakal to la. (Pro. 28:14; Mat. 5:29; 1 Cor. 10:12) Kailangan ton “itultuloy a pasimbaloen so paraan na panagnonot [to]” tan ‘busolen toy kaugsan’—kaiba lay pornograpiya tan arum nin marutak ya kagagawa, singa say masturbasyon. (Efe. 4:23; Sal. 97:10; Roma 12:9) No nanenengneng moy mister mo ya mani-effort pian nagawaan to iraya, labay ton ibaga sirin, wala ni pag-asa ton manguman. e

Panon to balet no talagan aglabay na mister mo ya itunday bisyo to? Natural labat ya nasakitan tan makapasnok ka, tan naliknam ya agto ka la inaro. Antoy gawaen mo balet pian ondeen so nonot mo? Ipalimam lan amin ed si Jehova. (1 Ped. 5:7) Lanang kan man-personal study, manpikasi, tan mandalepdep pian lalon ombiskeg so relasyon mod si Jehova. No gawaen mo itan, lalo to met ya iyapit so liknaan tod sika. Ibabaga na Isaias 57:15 ya manaayam si Jehova kaiba na “saramay napapairap tan niyabeba,” ta labay to ran pabiskegen. Gawam so anggaay nayarian mon manmatoor tan unor moy Jehova. Manpatulong kad saray elder. Tan agka komon nanaekalan na pag-asa ya manguman lanlamang so asawam.—Roma 2:4; 2 Ped. 3:9.