Kasin Antam La?
Akin et wala ray sundalo nen Arin David ya aliwan Israelita?
WALA ray sundalo nen David ya aliwan Israelita, singa si Zelek ya Ammonita, si Urias ya Heteo, tan si Itma ya Moabita. a (1 Awa. 11:39, 41, 46) Wala met iray sundalo to ya “Kereteo, Peleteo, tan saray Gitita.” (2 Sam. 15:18) Saray Kereteo tan Peleteo et posiblin kanayon na saray Filisteo. (Eze. 25:16) Tan saray Gitita et nanlapud syudad na Gat, ya teritorya na saray Filisteo.—Jos. 13:2, 3; 1 Sam. 6:17, 18.
Akin et inala ira nen David ya sundalo to anggano aliwa ran Israelita? Matalek si David ya matoor irad sikato, tan lalo la ed si Jehova. Singa bilang, oniay imbaga na The New Interpreter’s Dictionary of the Bible tungkol ed saray Kereteo tan Peleteo: “Nanmatoor irad si David diad sankairapan iran panaon na uley to.” Nen “agla tinmumbok ed si David so amin a lalaki ed Israel” tan say tinumbok da la et amay “managgaway gulo a say ngaran to et Sheba,” agtinaynan na saray Kereteo tan Peleteo si David. Tinmulong ni ra ingen pian ontunda la so panrerebelde nen Sheba. (2 Sam. 20:1, 2, 7) Nen sinali nen Adonias ya anak nen Arin David ya samsamen so trono, nanmatoor lamet ed si David iray Kereteo tan Peleteo. Tinmulong ira pian say naideklaran ari et si Solomon, say pinili nen Jehova ya onsublay ya ari.—1 Ara. 1:24-27, 38, 39.
Say sakey ni ya talagan nanmatoor ed si David et si Ittai ya Gitita. Nen nanrebelde so anak nen David ya si Absalom tan inimpluensyaan to ray arum ya Israelita ya manrebelde met, sinuportaan nen Ittai tan saray 600 ya sundalo to si Arin David. Nen unaan, imbaga nen David ed si Ittai ya ag-obligadon iyagel so ari ta sikatoy sakey ya dayo. Balet oniay imbaga nen Ittai: “Unong a mabilay si Jehova tan unong a mabilay so katawan kon ari, inerman so kawalaan na ari, balanglan parad bilay odino patey, diman met so kawalaan na lingkor mo!”—2 Sam. 15:6, 18-21.
Matoor si Ittai ed si David, say nilaan ya ari nen Jehova
Anggano dayo iray Kereteo, Peleteo, tan saray Gitita, bibirbiren da ya si Jehova so tuan Dios tan baleg so respeto ra ed sikato. Tan baleg met so respeto ra ed si David bilang ari ya nilanaan nen Jehova. Seguradon misatsalamat si David ta wala ray onian lalaki ya matoor ya sinmuporta ed sikato!
a Base ed ganggan na Dios ya nabasa ed Deuteronomio 23:3-6, agnayarin onloob ed kongregasyon na Israel iray Ammonita tan Moabita. Mapatnag balet ya sayan ganggan et ontutukoy ed pagmaliw ya legal ya membro na bansan Israel. Pero agto labay ya ibagan agnayarin miulop iray dayo ed saray Israelita tan agto met labay ya ibagan ag-ira nayarin manayam diad Israel. Nengnengen so Kaunawaan sa Kasulatan, Tomo 1, p. 114.
