Manalibandos ira tan mapmaples iran ombabatik! No basaen moy salaysay na Biblia tungkol ed sarayan apatiran mabisbiskeg ya kabayo tan saray akakabayo ed sikara, talagan maaksion! Say unonan kabayo et amputi—ya say akalugan et makapanyari tan balon ari. Say ontutumbok ed sikato et ambalbalanga, tan say akalugan et ekalen toy kareenan ed interon mundo. Insan nitan lay komatlo, ya andekereket tan say akalugan et walay awit ton simbangan. Legan ya ombabatik, walay boses ya mangibabando na makapaermen a mensahe ya walay onsabin eras. Say komapat et pusisaw, pakapatnagan ya walay sakit tan arum ni ran pansengegay ipatey, lapud Patey so ngaran na akalugan ed satan. Tan manumtumbok so Lubok ya ponponan na inaatey, tan agaylay karakel so nabiktima to!—Apocalipsis 6:1-8.

“Natatakot ak nen first time kon abasa so apatiran akalugan ed kabayo. Feeling ko, anggaan lay mundo pero agak ni ready kanian agak makaligtas.”—Crystal.

“Pankelawan ko may apatiran akalugan ed kabayon nandurumay kolor da. Nen naamtaan koy kabaliksan na satan, diman ko atalosan no akin ya onman so itsura da.”—Ed.

Kasin aliknam met so alikna nen Crystal tungkol ed apatiran akakabayo ya nabasad Apocalipsis? Odino singa onman ed si Ed so aliknam? Sayan eksayting ya ibatik na saraman ya akakabayo et sakey ed saray kabkabat ya eksena ed Apocalipsis, say sampot ya libro na Biblia. Diad tua, baleg so nitulong ed sika na saya no natalosan mo. Akin? Impromisa na Dios ya naliknam so tuan liket no basaen, aralen, tan unoren mo ray akasulat ed sayan libro na propesiya.—Apocalipsis 1:1-3.

Anggano wala ray natatakot ed propesiya tungkol ed apatiran akakabayo, ag-itan insulat pian taktakoten ka. Diad tua, lapud satan ya propesiya, minilyon lan totoo so awalaan na mabiskeg a pananisia tan balibalin ilalo ed arapen. Posiblin niwala met itan ed sika! Ituloy mon basaen so ontumbok ya artikulo.