SAY panagtasar na lapis ya itsuray barko ya walad lima nen Jordan et singa ordinaryo labat. Balet sakey iya ed saray talagan importante ed sikato. Imbaga nen Jordan, “Inter iya na maedad lan kaaro na pamilya mi ya si laki Russell nen ugaw ak ni.” Nen inatey si Russell, naamtaan nen Jordan ya baleg so nitulong nen Russell ed saray ateng nen Jordan tan say laki to legan na mairap iran panaon. “Natan lapud mas akabat koy laki Russell,” so imbaga nen Jordan, “lalon mabmabli ed siak iyan melag ya regalo to.”

Singa nanengneng tayod sayan eksperiensya nen Jordan, say sakey ya regalo et nayarin daiset o anggapo so kana to ed pakanengneng na arum. Balet parad sakey ya maapresyan too, nayarin talagan importante tan agnabayaran itan. Oniay ibabaga na Biblia nipaakar ed sakey ya mabmablin regalo: “Ontan lay panangaro na Dios ed mundo ya inter to so bogbogtong ya Anak to, pian kada sakey a mangipapanengneng na pananisia ed sikato et agnaderal noagta nawalaan na bilay ya andi-anggaan.”—Juan 3:16.

Sakey ya regalon makapangiter na bilay ya andi-anggaan! Wala ni kasi makapipara ed saya? Nayarin ag-amta na arum so kablian na satan ya regalo, balet parad saray tuan Kristiano et “mabmabli” itan. (Salmo 49:8; 1 Pedro 1:18, 19) Akin balet et inter na Dios so bilay na Anak to bilang regalo ed mundo?

Impaliwawa nen apostol Pablo so rason diad sarayan salita: “Panamegley na sakey a too et linmoob ed mundo so kasalanan, tan say patey ed panamegley na kasalanan, ontan met a say patey et kinmayat ed amin a totoo.” (Roma 5:12) Say inmunan too, si Adan, et nankasalanan lapud ginagala toy ag-inmunor ed Dios, kanian patey so dusa ed sikato. Lapud si Adan, ompapatey so amin ya ananak to—amin ya totoo ed mundo.

 “Say bayar na kasalanan et patey, balet say regalon iiter na Dios et say bilay ya andi-anggaan diad panamegley nen Kristo Jesus a Katawan tayo.” (Roma 6:23) Pian nibulos so totoo ed ipapatey, imbaki na Dios ed dalin so Anak to, si Jesu-Kristo, pian iter toy perpekton bilay to parad totoo. Panamegley na satan ya sakripisyo, ya kabkabat ya “dondon,” amin ya mangipapanengneng na pananisia ed si Jesus et nawalaan na bilay ya andi-anggaan.—Roma 3:24.

Ontan met, oniay imbaga nen Pablo nipaakar ed amin ya bendisyon ya iiter na Dios ed saray mandadayew ed sikato panamegley nen Jesu-Kristo: “Salamat ed Dios lapud regalo to ya agbalot nadeskribe ed karakep.” (2 Corinto 9:15) On, say dondon et talagan makapadinayew kanian mairap ya ideskribe ed paraan a talagan natalosan na too. Balet diad amin ya regalon inter na Dios ed totoo, akin et say dondon so sanka-espisyalan? Akin et nibaga tayo ya satan a regalo na Dios et anggapoy kapara to? * Panon mon nipanengneng so pisasalamat mod satan? Imbitaan mi kan basaen iray ebat na Biblia ed saratan ya tepet diad onsublay ya duaran artikulo.