No labay mon nakabat so sakey ya too, seguro say unonan itepet mo et “Antoy ngaran mo?” No itepet mo met itan ed Dios, anto kasi iyebat to?

“Siak si Jehova. Saya so ngaran ko.”​—Isaias 42:8.

Sayan ngaran et importante ed Dios a mismo. Anggapo so angiter na ngaran na Dios; sikaton mismo so nampili na ngaran to. Imbaga nen Jehova: “Saya so ngaran ko ed andi-anggaan, tan saya so pakanodnonotan ed siak diad amin a henerasyon.” (Exodo 3:15) Diad Biblia, say ngaran na Dios et mas mabetbet ya nabasa nen say anggan anton titulo to ya singa say Makapanyarin-amin, Ama, Katawan, odino Dios, tan mas mabetbet met nen say arum ya ngaran a singa say Abraham, Moises, David, odino Jesus. Sakey ni, labay nen Jehova ya naamtaan na totoo so ngaran to. Ibabaga na Biblia: “Komon ta naamtaan na totoo a say ngaran mo et Jehova, a sika labat so Sankatagyan ed interon dalin.”—Salmo 83:18.

Sayan ngaran et importante ed si Jesus. Diad samay pikakasi ya tatawagen ya Ama Mi odino Pikakasi na Katawan, imbangat nen Jesus iray papatumbok to ya oniay ipikasi dad Dios: “Napasanto komon so ngaran mo.” (Mateo 6:9) Anggan si Jesus et impikasi tod Dios: “Ama, igloriam so ngaran mo.” (Juan 12:28) Manuna ed bilay nen Jesus so pangigloria ed ngaran na Dios, kanian oniay impikasi to: “Impakabat kod sikara so ngaran mo tan ipakabat ko itan.”—Juan 17:26.

Sayan ngaran et importante ed saramay kabat day Dios. Amta na saray totoo na Dios nensaman ya say proteksion tan kiliktar da et mikonektaan ed espisyal ya ngaran na Dios. “Say ngaran nen Jehova et sakey a mabiskeg a tori. Ditan ombabatik so matunong  tan naproprotektaan.” (Proverbio 18:10) “Balang sakey ya ontatawag ed ngaran nen Jehova et niliktar.” (Joel 2:32) Ipapanengneng na Biblia ya saray manlilingkor ed Dios et nabidbir ira lapud ngaran to. “Ta manakar so amin a totoo ed ngaran na dios da, balet manakar itayo ed ngaran nen Jehova a Dios tayo ed anggad angga.”—Miqueas 4:5; Gawa 15:14.

Sayan ngaran labat so makapangipabidbir ed Dios. Ibabaga na dakel ya scholar na Biblia ya say kabaliksan na ngaran ya Jehova et “Pagmamaliwen To.” Impaamta nen Jehova a Dios so kabaliksan na ngaran to nen oniay impandeskribe tod sarili to nen katongtong toy Moises: “Magmaliw Ak No Antoy Pilien Kon Pagmaliwan.” (Exodo 3:14) Aglabat sirin ipapaamta na ngaran na Dios ya sikato so Amalsa ed amin a bengatla. Ipapanengneng met na ngaran to so abilidad to ya sarag ton pagmaliwen so sarili to, odino saray pinalsa to, ed antokaman a nakaukolan pian nasumpal so gagala to. Anggaman wala ray titulo na Dios ya mandeskribe ed posisyon, autoridad, odino pakayari to, say ngaran to labat ya Jehova so makapangipabidbir ed inka-Dios to tan no anto ray sarag ton pagmaliwan.

Ipapaamta na sayan ngaran ya interesado so Dios ed sikatayo. Nanengneng tayod kabaliksan na ngaran na Dios ya tuloytuloy ton aasikasoen iray pinalsa to, kaiba itayo. Sakey ni, labay na Dios ya sikatoy nakabat tayo ta impaamta toy ngaran to ed sikatayo. Diad tua, abayag to lan impaamta so ngaran to antis tayo nin itepet itan. Malinew sirin ya aglabay na Dios ya isipen tayon sikatoy sakey ya misteryo tan arawrawi. Imbes, labay ton naamtaan tayo ya sikatoy talagan wala tan sarag tayoy makaasingger ed sikato.—Salmo 73:28.

No uusaren tayoy ngaran na Dios, ipapanengneng tayo ya sikatoy labay tayon nakaaro. Alimbawa, nayarin imbagam ed sakey ya labay mon nakaaro ya tawagen to ka lad ngaran mo. Panon to balet no agto ka labay ya tawagen ed ngaran mo? Ompan isipen mo ya agto kan talaga labay ya nakaaro. Ontan met ed Dios. Impaamta la nen Jehova so ngaran to ed totoo, tan imbaga to ya usaren tayo itan. No usaren tayoy ngaran na Dios, ipapanengneng tayod si Jehova ya labay tayon nakaaro. Diad tua, “saramay mandadalepdep [odino, “mamapabli,” paimanod leksab] ed ngaran to” et iimanoen to!​—Malaquias 3:16.

Say unonan gawaen pian nakabat tayo so Dios et amtaen so ngaran to. Balet aliwan satan labat. Kaukolan tayo met ya amtaen no anto ray kualidad to.