Aliwan mainomay ed sanasawa no baleg la ray ananak da tan anggapo la rad pudir da. Lapud bukor da lay atilak, singa ompawil irad dati ya aralen da lamet so ugali na sakey tan sakey. “Dakel so kliyentek ya agda amtan ipawil so maapit ya relasyon dad asawa da,” so kuan na family expert ya si M. Gary Neuman. “Lapud anggapo lay kaiba dan anak da, ngalngali anggapo lay pantongtongan [na atateng].” *

Kasin ontan so situasyon yon sanasawa? No on, walay nagawaan yo pian ompawil so datin ulopan yo. Pero amtaen tayo ni ray pigaran rason no akin ya singa inmarawi lay liknaan yod sakey tan sakey.

Dakel a taon ya saray ananak yo so kawalaay atension yo. Lapud agda labay ya napaulyan iray ananak da, prayuridad na dakel ya atateng iray pankaukolan na ananak da nen say relasyon dan sanasawa. Kanian, mas apasal irad papel da bilang tatay tan nanay balet napaulyan day komunikasyon da bilang asawan laki tan asawan bii​—tan lalon napatnagan iya no anggapo la ray ananak. “Nen kaiba mi ni ray ugugaw, anggan panon et makakapan-iba kami nen asawak,” so kuan na bii ya 59 lay taon to. Pero nen anggapo lad abung iray ananak da, imbaga to ya, “mandumaan lay prayuridad mid bilay.” Aminsan ni ingen et imbaga tod asawa to, “Onsasawa ak lad sika.”

Wala ray sanasawa ya ag-akaparaan ed sayan pananguman. “Nalilikna na dakel ya sanasawa ya singa lamet ira balon kasal,” so kuan na libron Empty Nesting. Lapud iisipen da ya mandumaan iray labay, gawaen da lay labay dan gawaen, kanian singa labat ira roommate aliwan sanasawa.

 Anggaman ontan, walay nagawaan yo pian naiwasan yo iratan tan na-enjoy yo ni ingen iyan balon chapter na bilay yo. Makatulong so Biblia. Amtaen tayo no panon.

Magmaliw ya realistiko. Oniay ibabaga na Biblia tungkol ed saray anak no baleg la ra: “Taynan na laki so ama tan ina to.” (Genesis 2:24) Bilang ateng, sika so angipasal ed saray anak mo pian magmaliw iran responsable. No ontan so kanonotan mo, mas proud ka no onsabi panaon ya mansarili la ra.​—Prinsipyo ed Biblia: Marcos 10:7.

Siempre, ateng ka nin siansia na saray anak mo. Balet natan, nayarin onkerew labat ira na advice pero agla ra akadepende ed sika. Kanian anggano maapit kad saray anak mo, say manunan ikdan mo la na atension et si asawam. *​—Prinsipyo ed Biblia: Mateo 19:6.

Ibalikas moy naliliknam. Ibagam ed si asawam no antoy epekto ed sika na sayan pananguman, tan dengel mo no ibalikas toy nalilikna to. Magmaliw ya maanos tan makatalos. Ompan agtampol ya ompawil so datin ulopan yo, balet seguradon maabig so resulta no pansagpotan yo.​—Prinsipyo ed Biblia: 1 Corinto 13:4.

Mannonot na saray balon gawaen yo. Pantongtongan iray labay yon gawaen ya saniba odino saray labay yon salien. Lapud apabaleg yo la ray ananak yo, dakel lay eksperiensya tan karunongan yo. Maabig no usaren yo iratan pian tulongan so arum.​—Prinsipyo ed Biblia: Job 12:12.

Nonot yoy impansipanan yo. Isip yo ray ugalin agustoan yod sakey tan sakey. Pantongtongan yoy apalabas tan saray subok ya alagpasan yo. Na-realize yo ya marakep iyan balon chapter na bilay yo. Diad tua, no mantulongan kayo, mas ondakep so ulopan yon sanasawa tan mas onelet so aroan yo.