Balet wala ray sanasawa ya aliway panguusar da ed gadyet da, kanian . . .

• naaapektoan na saratan so panaon ya saniba ira.

• mantratrabaho ira anggano agkailangan.

• natutukso iran agmanmatoor ed asawa ra.

PANAON YA SANIBA

Oniay imbaga nen Michael: “No maminsan, anggano saniba kami nen asawak, agto ak iimanoen. Busy ed cellphone to tan say ibabaga to, ‘Wala ni manayay kailangan kon i-check.’” Imbaga met nen Jonathan ya diad ontan iran situasyon et “saniba so sanasawa pero singa ra walad nandumaan a lugar.”

ISIPEN PA: Kasin lanang ya nadidisturboy pantotongtong yon sanasawa lapud tawag, text, odino notification diad cellphone mo?—EFESO 5:33.

TRABAHO

Wala ray diretso so trabaho da ta anggan anton oras et nayarin walay ontawag odino man-email ed sikara. Balet anggano aliwan ontan so trabaho na arum, siansia nin nauupot so oras dad trabaho. “Agko napigilan so sarilik ya agnengnengen iray tawag odino text ya parad trabahok anggano diad oras ya inyeskedyul ko pian nakaibay misis ko,” so inamin nen Lee. Oniay imbaga met nen Joy: “Dia ak ed abung mantratrabaho kanian ngalngali agko nataynanan iray kimey ko. Kaukolan koy mansagpot pian magmaliw a balanse.”

ISIPEN PA: Kasin dedengelen mon maong so asawam no walay ibabaga to ed sika?—LUCAS 8:18.

KATOORAN

Diad sakey a survey, naamtaan ya dakel ya sanasawa so mankokolkol lapud duda irad ipo-post na asawa ra ed social media. Inamin na 10 percent ed saramay kaibad survey ya iyaamot dad asawa ra iray in-post da.

No ontan sirin, say social media et singa lugar ya wala ray akaamot ya bomba ya delikado parad saray walaan na asawa ta mainomay da ditan so makalmo na karelasyon da. Kanian agtayo pankelawan ya imbaga na pigaran divorce lawyer ya say social media so rason no akin ya dakel so mansisian.

ISIPEN PA: Kasin walay iyaamot mod si asawam ya pitotongtongan mo ed cellphone mo?—PROVERBIO 4:23.

IYUNA IRAY IMPORTANTE

No say sakey et agto ipanaon so mangan, onkapuy so laman to. Ontan met, no say sakey et agto ipanaon ya nakaibay asawa to, onkapuy so relasyon dan dua.—Efeso 5:28, 29.

Pilien iray labay mon gawaen, odino isulat mo ray arum nin naisip mo pian agnaapektoan na gadyet so relasyon yon sanasawa.

• Saniban mangan anggan maminsan ed sanagew

• Man-eskedyul na oras ya ag-usaren so gadyet

• Mangipanaon na pan-date o espisyal ya oras ya saniba kami

• Erepen iray gadyet mi no labi, tan iyarawi ed dukolan

• Kada agew, iyarawi o erepen na 15 minuto iray gadyet pian makapantongtong

• Erepen so Internet ed apantongtongan ya oras