Saray atateng ya maong ya alimbawa et gagawaen da no antoy ibabangat da. Singa bilang, agmo nailaloan ya agmantila so anak mo no arengel ton imbagam ya, “Ibagam ta anggapo ak ed abung,” no walay agmo labay ya katongtongen ya linmad abung yo.

“Say maslak ya ibabaga ra et ‘Unor moy ibabagak pero agmo aaligen so gagawaen ko.’ Balet say ontan ya panagbangat et aliwan epektibo ed saray ugugaw. Singa ra espongha ya eesepen dan amin so ibabaga tan gagawaen tayo, tan ibaga da no dumay gagawaen tayo ed ibabangat tayo.”​—David.

PRINSIPYO ED BIBLIA: “Sika a mangipupulong na ‘Agka mantatakew,’ kasin mantatakew ka?”​—Roma 2:21.

Saray ugugaw tan anggan saray tinedyer la et mas baleg so impluensya na atateng da ed sikara nen say arum​—kaiba la iray kaedad da. Labay ton ibaga, sikayo so walad sankaabigan ya posisyon ya mangigiya ed ananak yo diad dugan dalan​—balet siempre, nepeg yon gawaen iray ibabangat yo.

“Nayarin maminlasus tayon uliten so ibabaga tayo pero agtayo amta no ondedengel so anak tayo, balet anggan say maminsan labat ya agtayo panggawa ed ibabaga tayo et naimano la na ugaw tan ibaga tod sika. Oobserbaan na ugugaw so amin ya gagawaen tayo, anggano iisipen tayon agda iimanoen iratan.”​—Nicole.

PRINSIPYO ED BIBLIA: “Say karunongan a manlalapud tagey . . . [et] agmansimpisimpitan.”​—Santiago 3:17.

Usisam so mismon estandartem. Anto ray babantayan mo? Panon so panagtratom ed asawam tan ananak mo? Anton klase na totoo iray kaarom? Kasin manonot ka ed arum? Labay ton ibaga, kasin say inkatoom so labay mon aligen na ananak mo?

“Agmi ibabangat nen asawak ed saray ananak mi iray estandarte ya agmi tutumboken.”​—Christine.

Onkerew na perdona no alingo ka. Amta la na ananak mo ya aliwa kan perpekto. No alingo ka tan ibagam so “sorry” ed asawam odino ed ananak mo, nibangat mo ray importantin leksion nipaakar ed inkamatua tan inkamapaabeba.

“Kaukolan ya narengel na ananak tayo ya aaminen tayon alingo tayo, tan kaukolan dan narengel so ikerew tayoy perdona lapud lingo tayo. No agtayo itan gawaen, napasalan dan iyamot iray lingo da.”​—Robin.