ISTORYA NEN DAMI

Nen unaan, singa labat simplin sakit na ulo so nalilikna nen Daddy. Balet linmoor itan, kanian anawag na ambulansya si Mommy’k. Nanonotan ko ya inala na saray paramedic si Daddy. Agko ilaloan ya aman la manayay sampot ya pakanengneng kod sikaton mabilay. Kayari taloy agew, inatey si Daddy lapud aneurysm. Anem taon ko ni labat ed saman.

Pigay taon ya tinetel koy sarilik ed impatey nen Daddy. No nanonotan ko imay impangala ed sikato na saray paramedic, itetepet kod sarilik: ‘Akin et akaalagey ak labat diman? Akin et anggapoy ginawak?’ No nanenengneng ko ray maedad la ya walay sakit da, iisipen ko, ‘Akin et mabilay ni ra pero si Daddy, inatey la?’ Tinulongan ak nen Mommy’k ya ibaga so naliliknak. Tan lapud Tasi nen Jehova kami, tutulongan kami na agagi mid kongregasyon.

Parad arum, say panermen et kayarin mismo na trahedya insan ka maka-recover, pero aliwan ontan ed siak. Say impanermen ko et nen tinedyer ak la.

Say advice ko ed saray kabataan ya inateyan na ateng, “Itongtong yod arum so nalilikna yo. No ibaga yon tampol itan, mas pankamaongan yo.”

Tua, mairap ed siak no wala ray importantin nagawad bilay ko ya agko kaibay Daddy’k. Pero makakatulong ed siak so promisa na Biblia ed Apocalipsis 21:4, ya ibabaga ton say Dios et magano lan “punasen to so amin a lua ed kamataan [tayo], tan anggapo lay patey, anggapo met lay panermen tan panakis tan panotot.”

ISTORYA NEN DERRICK

Pigara ed saray agko nalingwanan et say impaniba mi nen Daddy’k ya manbanwit tan man-camping diad kapalandeyan. Labalabay to ray palandey.

Medyo abayag ya walay sakit ed puso nen Daddy’k; nanonotan ko ya nen ugaw ak et aminsan o amiduak iran binisita ed ospital. Pero agko natatalosan ed saman ya grabe manayay sakit to. Nen siam taon ko, inatey si Daddy’k lapud sakit ed puso.

Nen inatey, nanakis ak lan nanakis. Pakaliknak et agak makaingas, tan agko labay so mitongtong ed arum. First time koy nanermen na onman, tan singa anggapo lay labay kon gawaen. Diad unaan et tinulongan ak na saray kabataan ed simbaan mi, pero tinmunda ira lanlamang. Ibabaga na saray totoo ed simbaan mi, “Oras la nen tatay mo,” “Sikatoy tinawag na Dios,” o “Sikatoy wala lad tawen natan.” Singa agak kontento  ed saraman ya komento da, pero anggapoy amtak ed ibabangat na Biblia tungkol ed inatey.

Insan inyaralan na Biblia na saray Tasi nen Jehova si Mommy’k, tan ag-abayag et akila kami met la nen kuyak. Naaralan mi kipapasen na saray inatey pati say balibalin promisa na Dios ya bilayen to lamet iray inatey. (Juan 5:28, 29) Balet say teksto ed Biblia ya talagan akatulong ed siak et amay Isaias 41:10, ya diman et imbaga na Dios: “Agka ontatakot, ta wala ak ed sika. Agka ompapaga, ta siak so Dios mo. Pabiskegen ta ka, on, tulongan ta ka.” Lapud amtak ya kaibak si Jehova, akatulong iyan maong ed siak nen maneermen ak tan anggad natan.

ISTORYA NEN JEANNIE

Nen pitoy taon ko, inatey si Mommy’k lapud cancer. Singa labat kugip iman ya agew. Nanonotan ko ya sikatoy inatey ed abung mi tan wadman so lakik tan baik. Kakkalmado irad saman. Say kinan mid pangdem et priton iknol. Pakaliknak et singa kalkalnan nababalintuag so interon bilay ko.

Diad saman—tan pigaran taon kayari to—say amtak et kailangan koy magmaliw ya matapang parad agik kanian pinukok koy liknaan ko. Anggad natan et walay tendensiak ya iyamot so paneermen ko, balet makapuy itan.

Nanonotan ko so panangaro tan suporta na saray Tasi nen Jehova ed kongregasyon mi. Anggano kakkagapo mi ni ya inmatendi ed saray aral diad Kingdom Hall, inturing da kamin singa abayag da lan kapamilya tan agda kami pinaulyanan. Singa agko nanonotan ya nanlutoy Daddy’k na kanen mid pangdem diad loob na sakey taon ta lanang ya walay akaparaan diad arap na puerta mi.

Sakey ya teksto ed Biblia ya agko nalingwanan et say Salmo 25:16, 17. Ditan et akikasi ed Dios so nansulat ed satan ya salmo: “Lingaw mo ak pa tan kasian mo ak, ta bukbukor ko tan anggapoy pakayarik. Dinmakel so pakakabelatay pusok; ibulos mo ak pa ed kapagaan ko.” Naiinawaan ak ta amtak ya agko bukbukor no maneermen ak. Wadtan so Dios. Diad tulong na Biblia, aka-move on ak tan akapanpokus ak ed saray positibo, singa say balibalin promisa na Biblia ya nabilay lamet iray inatey. Walay pag-asak ya nanengneng lamet si Mommy’k tan nakabat kon maong no perpekto lay laman tayo ed paraiso diad dalin.—2 Pedro 3:13.

Labay mo nin naamtaan iray arum ya balibalin ibabaga na Biblia parad saray maneermen? Man-download na libren kopya na publikasyon ya “Sano Naandi’d-bilay so Pinabli Yo.” Onlad www.isa4310.com/pag, tan nengnengen ed PUBLIKASYON > LIBRO TAN BROSYUR.