“Say antak nalmok lay toon parad siak. Kuan kod sarilik, ‘Aya so labay kon nakaiba legay bilay.’ Balet kayari duay bulan, im-break ko. Agak makapanisia ya mapmaples ya anampot so balibalin gapo!”—Anna. *

“Singa bagay kamin talaga. Alutolutod isip ko ya seguradon mankasal kami. Balet diad inlabas na panaon, anengneng kon nandumaan kamin maong. Naisip kon baleg a lingo no ituloy ko ni ’ya, kanian im-break ko.”—Elaine.

Asalim met la ’ya? Makatulong sirin iyan artikulo pian nasarag moy situasyon mo.

Ansakit so pan-break, anggano sika ni angi-break. “Aliwliway liknaan ko!” kuan na marikit ya si Sarah, ya aki-break ed boyfriend to kayari anem bulan. “Dati parte na bilay ko yan too, pati diad amin ya planok; insan biglan andi la. Kanian no makarengel ak na kansion ya paborito min dua, nanonotan ko ray maliket ya panaon ya sankaiba kami. No wala ak ed pasen ya labalabay min pasyaran, naeermenan ak ta agko la kaiba. Oniay naliliknak anggano siak ni angi-break!”

Anggano ansakit so pan-break, ompan atan so dugan gawaen. “Agmo labay ya sakitan may too,” kuan nen Elaine. “Balet antam ya nasakitan kayon dua no ituloy yo ni anta anggapo lanlamang so pansumpalan to.” Ontan met so alikna nen Sarah. “Parad siak, no agka maliket ed piiinaroan mo, ompan agka met maliket mo sanasawa ki la, kanian parad pankaabigan yoy man-break,” so kuan to.

Aliwa kan mauges a too no aki-break ka. Amin ya miinaroan et kaukolan a mandesisyon, balet aliwan amin et mandesisyon ya mankasal. Pero nibagan makabat nin siansia itan ya desisyon. Akin ey? On ta no walay naobserbaan mon seryoson kakapuyan na inarom odino sikan mismo, dugan desisyon so pan-break. Balet agto labay ya ibagan palpak ka lapud anggapo ki la. Sarag moy man-move on! Panon?

Amin mon asakitan ka. “Aliwa labat ya basta kaaro so abalang ko; abalang koy best friend ko,” so inamin nen Elaine ya abitlad gapo. No aki-break kad sakey ya talagan ka-close mo, normal labat ya manermen ka. Kuan na balolakin si Adam: “Lapud anampot so relasyon, talagan nasakitan ka anggano antam ya atan so duga.” Ompan naeksperiensyam met may agawad si Arin David ya akasulat ed Biblia. “Naleleteb na luak so danganan ko lapud panaakis ko,” so insulat to nen agaylay ermen to. (Salmo 6:6, Maung a Balita) No maminsan, say sankaepektiboan ya paraan pian naandi ermen et arap mo itan, agmo ibabatikan. No aminen mon asakitan ka, sakey la ’tan ya kupbang ed iyabig na abetag ya pusom.—Prinsipyod Biblia: Eclesiastes 3:1, 4.

Miulop kad saray totoon inaro da ka. Tua, nayarin aliwan mainomay. “Nen unaan, agko labay so makanengneng na too,” so inamin nen Anna ya abitlad gapo. “Kaukolan koy panaon pian maka-recover, makapanisip tan natalosan koy agawa.” Balet asabi panaon, anengneng lanlamang nen Anna ya makabat so piulop ed maapit ya kakaaro to pian manpabiskeg ed sikato. “Mas duga lay panagnonot ko natan,” so kuan to, “tan aliwa lan masyadon ansakit may impan-break mi.”—Prinsipyod Biblia: Uliran 17:17.

Komon ta akaaral kad agawa. Tepetan pay sarilim: ‘Kasin lapud sayan agawa et anengneng kon wala ni ray papaaligwasen ko? Antoy umanen ko no bilang miinaroan ak lamet?’ “Diad inlabas na panaon, mas natatalosan ko la may agawa,” so kuan na marikit ya si Marcia. “Balet, nanalagar ak ni anggad makapannonot ak lay duga tan agmagmaliw ya emosyonal.” Ontan met so imbaga nen Adam ya abitlad gapo. “Sakey taon ni pinalabas ko pian maka-recover ak. Tan mas andukey ni panaon ya inalagar ko pian makaaral ak ed agawad siak. Lapud saya dakel so naaralan kod sarilik, mamarikit, tan relasyon. Agla masyadon ansakit ed siak natan may impan-break mi.”

Ipikasim so mairap ya dadalanen mo. Ibabaga na Biblia ya ‘paabigen na Dios iramay abetag so puso ra, tan bedberen to ray sugat da.’ (Salmo 147:3) Tua ag-itayo ipipilian na Dios na kapareha, tan aliwan sikato met so natetel no agmakapantuloyan so saninaro, balet iyaansakit to ka. Ibagam labat ed sikato so naliliknam diad pikakasi.—Prinsipyod Biblia: 1 Pedro 5:7.