SAY EBAT NA BIBLIA
Irap na Bilay
Anggano wala ray mansasagpot pian nasolusyonan itan ya problema, siansia nin minilyon so totoon mairap-bilay diad interon mundo.
Panon a magmaliw ya maliket iray pobri?
NO ANTOY IBABAGA NA TOTOO
Iisipen na dakel a totoo ya magmaliw iran maliket tan kontento no onyaman ira, tan nibaga ran maaligwas ira depende ed karakel na kuarta ra. Saramay agmakaimwas ed irap na bilay et ag-akaaral odino abebay aral da, agda nasarag so manpatambal, tan ag-ira makakaawat na arum nin benepisyo. Kanian, singa anggapoy kanepegan dan magmaliw a maliket tan kontentod bilay.
NO ANTOY KUAN NA BIBLIA
Ibabangat na Biblia ya say tudtuan liket et ag-akadependid kipapasen ed bilay, noagta diad espiritualidad tan relasyon na sakey ed Manamalsa. Ibabaga na Biblia: “Maliket iramay manonot ed espiritual a pankaukolan da.” (Mateo 5:3) Anggan antoy kabibilay da, saramay manonot ed espiritual a pankaukolan da et aamtaen day panmoria na Dios, diad ontan et naaralan day katuaan a walad Biblia ya mangiter na tudtuan ligliwa tan deen na nonot. Atan so mangiter na tudtuan liket.
Saramay natatalosan tan uunoren day simbawa na Biblia et mas nasarag day irap na bilay. Singa bilang, bibilinen na Biblia iray totoo ya paliisan iray bisyo a singa say pansigarilyo tan alabas ya paninum. Sayang so kuarta ed saraya tan manresultad magastos ya panagpatambal.
Papasakbayan itayo met na Biblia ya makapuy so epekto na agum tan materyalismo. (Marcos 4:19; Efeso 5:3) Makatulong iratan ya simbawa pian agnasayang so kuarta ed panagsugal odino pian ag-ontubod puso so “panangaro ed kuarta,” ya ibabaga na Biblia a “lamot na amin a makaderal a bengatla.” (1 Timoteo 6:10) Oniay ipapasakbay na Biblia: “Anggano dakdakel so kayarian na sakey a too, ag-iratan makapangiter ed sikato na bilay.” (Lucas 12:15) No ontan sirin, agnasaliw na anggan panon karakel ya kuarta so bilay. Balet, no dengeley makabat ya simbaway Biblia, magmaliw ya makana so bilay tayo tan nalikna tayoy tudtuan liket.
Tua, saray mairap-bilay et kaukolan day mansagpot pian nawalaay naakan, kawes, tan panayaman, balet saramay aaralen day mankontento, manpopokus ed pamaliket ed Amalsa, tan manbibilay unong ed linawa to et nalikna ray liket. Manisia ran tua so sipan na Biblia ya “say bendisyon nen Jehova makapayaman; tan agmangarum na ermen.”
MAKATULONG YA TEKSTOD BIBLIA: “Maliket iramay manonot ed espiritual a pankaukolan da.”
—Mateo 5:3.
Naandi ni kasi irap na bilay?
NO ANTOY KUAN NA BIBLIA
Anggapoy agawaan na totoo pian nasolusyonay problemad irap na bilay, balet nasabi panaon, ekalen na Dios so panlalapuay problema
Magmaliw ya tuan paraiso so dalin, ya walay panayaman tan kanen na amin, tan anggapo lan balot so manirap. Diad libro na Biblia ya Isaias, insipan na Dios ya saray totoo to et “ipaalagey da naani so saray abung, tan manayam ira naani; et mantanem ira naani na saray ubas, tan mangan ira naani ed saray bunga ra. . . . Saray pinilik manliket ira naani a maando ed saray gawa na saray lima ra.” (Isaias 65:21, 22) Imbes ya mantalikarkar pian labat walay naakan, manliket lay amin ed “ponsian sankananaman iray kakanen” tan ed arum ni ran maabig a bengatlan iter nen Jehova.
AKIN YA IMPORTANTIN NONOTEN?
No nodnonotey sipan na Dios nipaakar ed mundon anggapo lay irap na bilay, napaseguroan iramay mairap so kipapasen da ya iyaansakit ira na Dios tan magano lan naandi paniirap da. Say pannodnonot ed satan ya ilalo et ontulong ed sakey ya naanosan iray mairap ya kipapasen natan.
MAKATULONG YA TEKSTOD BIBLIA: “Iyaagel to ray mairap-bilay ya ontatawag ed sikato. . . . Maabagey ed saray makapoy tan saray mairap-bilay; ilalaban toy bilay da ray walad pankaukolan.”
—Salmo 72:12, 13, Maung a Balita.
