Nen inatey lay Jesus, walay mayaman ya lakin say ngaran to et Jose ya linmad si Pilato tan impatanir to ya alaen toy bangkay nen Jesus. Binalkot nen Jose so bangkay nen Jesus na marakep ya klase na abel ya walay pampabalingit to, insan inyan to ed balon ponponan. Insan impasaraan to itan na baleg ya bato. Imbaga na saray manunan saserdote ed si Pilato: ‘Ompan saray arum ya disipulo nen Jesus et alaen day bangkay to insan da ibaga ya binmilay lamet.’ Kanian imbaga nen Pilato ed sikara: ‘Segurado yon ag-itan nalukasan tan mangiyan kayoy guardia.’

Kayari taloran agew, wala ray bibii ya asaksakbay ya linma diman ed ponponan tan asabian da ya nitulin imay bato. Nen linmoob ira, walay anghel diman tan imbaga tod saray bibii: ‘Agkayo natatakot. Mabilay lamet si Jesus. La kayo tan ibaga yod saray disipulo to ya minengneng irad sikato diad Galilea.’

Nanapura si Maria Magdalena ya linmad si Pedro tan Juan. Imbaga tod sikara: ‘Walay angalad bangkay nen Jesus!’ Batik si Pedro tan Juan diman ed ponponan. Nen anengneng da ya anggapoy karga to, sinmempet la ra.

Kapawil nen Maria ed ponponan, walay anengneng ton duaran anghel diad loob tan imbaga tod sikara: ‘Agko amtay anginan dad Katawan ko.’ Insan walay laki ya anengneng nen Maria ya say amta to et hardinero, kanian imbaga to: ‘Ibagam ed siak no iner so anginan mod sikato.’ Balet nen imbaga to may laki ya “Maria!” abirbir to ya si Jesus iman. Imbaga nen Maria: “Managbangat!” tan binembenan toy Jesus. Imbaga nen Jesus ed sikato: ‘La kad saray agagik tan ibagam ya anengneng mo ak.’ Batik ya tampol si Maria tan imbaga tod saray disipulo ya anengneng toy Jesus.

Diad saman lanlamang ya agew, walay manaakar ya duaran disipulo ya nanlapud Jerusalem tan paonla rad Emaus. Walay laki ya akiulop ed sikara tan tinepet to no antoy pantotongtongan da. Imbaga da: ‘Agmo sirin abalitaan? Taloran agew lay linmabas nen impapatey na saray manunan saserdote si Jesus. Balet natan, wala ray bibiin mangibabalita ya mabilay si Jesus!’ Tinepet na laki: ‘Akin,  agkayo manisia ed saray propeta? Imbaga ra ya say Kristo et ompatey balet nabilay lamet.’ Insan to impaliwawa ed sikara so Kasulatan. Kasabi dad Emaus, imbaga na saray disipulo ed samay laki ya ontuloy nid sikara. Nen mandem la ra, inala to so tinapay insan nampikasi. Abirbir na saray disipulo ya si Jesus iman. Insan biglan agda la anengneng.

Nanapuran pinmawil so duaran disipulo diad abung ed Jerusalem ya kawalaan na saray apostol tan inistorya day agawa. Legan iran walad loob na abung, nampanengneng si Jesus ed sikaran amin. Nen unona, agmakapanisia iray apostol ya si Jesus iman. Kanian imbaga tod sikara: ‘Nengneng yo yay limak; diwit yo. Nisulat ya say Kristo et ompatey balet nabilay lamet.’