SEKSION 1
Patulongan ed Dios Pian Maliket so Panangasawa Yo
“Samay amalsa ed sikara diad gapo et ginawa to ran laki tan bii.”—Mateo 19:4
Si Jehova a a Dios so angasal ed sankaunaan ya laki tan bii. Ibabaga na Biblia ya ginawa toy sankaunaan a bii “insan inyakar to ed laki.” Diad liket nen Adan et nibaga to: “Saya so pukel na saray pukepukel ko, tan laman na laman ko.” (Genesis 2:22, 23) Agmanguuman si Jehova, anggad natan et labay to nin magmaliw a maliket iray sanasawa.
No mangasawa o miasawa ka, ompan say antam et naynay lan maliket so bilay. Balet diad tua, anggan saray sanasawan maar-aro ed balang sakey et ondalan ya ondalan ed problema. (1 Corinto 7:28) Diad sayan brosyur, nabasam iray prinsipyod Biblia ya no tumboken mo et mamaliket ed sikayon sanasawa tan ed pamilyam.—Salmo 19:8-11.
1 AWAT MOY PAPEL YA INTER NA DIOS ED SIKA
NO ANTOY KUAN NA BIBLIA: Say asawan laki so ulo na pamilya.—Efeso 5:23.
No sakey kan asawan laki, iilaloan nen Jehova ya asikasoen moy asawam. (1 Pedro 3:7) Sikatoy ginawa na Dios ya katulongan mo tan labay ton igalang tan aroen mo. (Genesis 2:18) Kaukolan mon ar-aroen so asawam tan akaparaan kan mangiyunad pankaabigan to.—Efeso 5:25-29.
No sakey kan asawan bii, iilaloan nen Jehova ya respetoen mon maong so asawam tan tulongan mon nagawaay papel to. (1 Corinto 11:3; Efeso 5:33) Suportaan mo ray desisyon to tan mikoopera kad sikato. (Colosas 3:18) No gawaen mo ’tan, maganggana kad pakanengneng na asawam tan nen Jehova.—1 Pedro 3:1-6.
NO ANTOY NAYARIM A GAWAEN:
-
Tepetan moy asawam no antoy gawaen mo pian magmaliw kan mas maong ya asawa. Dengel kan maong, tan gawam so anggaay nayarian mon naparakep ni ugalim
-
Araley manpasensya. Kaukolay panaon pian naaralan yon paliketey balang sakey
2 AG-IBABALIWALAY NALILIKNA NA ASAWAM
NO ANTOY KUAN NA BIBLIA: Iyansakit moy asawam. (Filipos 2:3, 4) Pablim so asawam, tan tandaan ya labay nen Jehova a “mauyamo ed amin” iray totoo to. (2 Timoteo 2:24) ‘Saray salitan agla ninonot et singa ra espadan makasugat, balet makapaabig iray salitan napnoy kakabatan.’ Kanian pilim iray ibagam. (Probirbio 12:18, Maung a Balita) Tulongan ka na espiritu nen Jehova ya mansalitan magalang tan maaro.—Galacia 5:22, 23; Colosas 4:6.
NO ANTOY NAYARIM A GAWAEN:
-
Antis yon pantongtongan iray seryoson bengatla, ipikasim ya mansiansia ka komon a kalmado tan aliwan saradoy isip
-
Apipiger moy ibagam tan pangibagam
3 ISIP MON MANKA-TEAM KAYO
NO ANTOY KUAN NA BIBLIA: No mangasawa o miasawa ka, ‘saksakey kayo lan laman.’ (Mateo 19:5) Balet siansia nin duara kayon indibidual ya nayarin mandumaay opinyon. Kanian kaukolan yon aralen ya manparehoy isip tan liknaan yo. (Filipos 2:2) Kaukolan kayon mankasakey no mandedesisyon. Ibabaga na Biblia ya: “No walay pantotongtong, nasumpal iray plano.” (Uliran 20:18, NW) Onkonsulta kayod Biblia sano manggagaway importante iran desisyon.—Uliran 8:32, 33.
NO ANTOY NAYARIM A GAWAEN:
-
Ipaamta ed asawam so naliliknam, aliwa labat ya saray impormasyon odino opinyon
-
Antis kan mitarato ed arum, ikonsultam nid asawam
a Ipapaamta na Biblia ya say ngaran na Dios et Jehova.
Ompan Nagustoan Mo Met
SAY PANAG-BANTAYAN
Asawan Lalaki—Gawaen ya Maligen so Abung Yo
Nayarin mainawa ed pinansyal so sakey a pamilya balet ta aliwan mainawa ed mas importantin bengatla.
EBAT ED SARAY TEPET ED BIBLIA
Kasin Makatulong so Biblia Pian Magmaliw ya Maliket so Pamilyak?
Saray makabat ya bilin base ed Biblia et minilyon lan lalaki tan bibii so atulongan to pian magmaliw ya maliket so pamilya da.
