Kapitulo 11

Akin ya Inabuloyan na Dios So Karelmengan?

1. (a) Anto so kipapasen na dalin natan? (b) Anto so reklamo na arum a totoo?

 INERMAN a lingawan mo ed mundo, wala so krimen, gulaan tan gulo. Mabetbet a saray inosente so maniirap. Arum a totoo so manetel ed Dios. Nayarin ikuan da: ‘No wala so Dios, akin ya aabuloyan to so amin na sarayan makapakebbiew a bengatlan nagawa?’

2. (a) Siopa so manggagawa na karelmengan? (b) Panon so nayarin pakaamper ed ontan lan irap ed dalin?

² Ingen siopa so manggawa ed sarayan marelmeng a bengatla ed arum? Saray totoo, aliwan Dios. Kinondena na Dios so marelmeng a gawa. Diad tua, dakel ed saray irap ed dalin so naamper komon no tuloken na totoo so ganggan na Dios. Ginanggan to itayo a mangaro. Insebel toy panagpatey, panagtakew, pilalawanan, inkaagum, panagbuanges tan arum niran gawan mauges a pansesengegan na irap na too. (Roma 13:9; Efeso 5:3, 18) Ginawa na Dios si Adan tan Eva a tekep na makapakelaw ya utek tan laman tan tekep na pakayarin manggayagan nagnap ed bilay. Agto ran balot labay odino saray anak da a manirap odino nagonigon.

3. (a) Siopa so responsabli ed karelmengan? (b) Antoy mangipanengneng ya ayarian komon nen Adan tan Eva a sumpaen iray pananukso nen Satanas?

³ Si Satanas a Diablo so angigapo na karelmengan ed dalin. Balet si Adan tan Eva so natetel met. Sikara so aliwan maletey a tuloy ya agda nayarian a sumpaen so Diablo sanen tinukso tora. Imbaga ra komon ed si Satanas ya “onarawi,’’ a singa ginawa nen ayadyarin toon Jesus ed saginonor. (Mateo 4:10) Balet agda ginawa so ontan. Bilang nansumpalan, nagmaliw iran ag-ayadyari. Amin ya anak da, pati sikatayo, so anawir na satan ya ag-inkayadyari, ya angitarok ed sakit, kaermenan tan patey. (Roma 5:12) Balet akin ya inabuloyan na Dios so panirap a mantultuloy?

4. Anto so ontulong ed sikatayon mantalos a say sakey a maaron Dios so temporaryon mangaabuloy ed karelmengan?

⁴ Nayarin diad ununa et isipen na sakey a toon anggapo so rason a tuloy ed Dios diad pangabuloy ed amin ya irap na too ed inlabas na saray siglo. Ingen, kasin manepeg so pangibaga na ontan? Agta saray  atateng a tuan inaro daray anak da so mangiyabuloy ed sikaran managmak na ansakit ya operasyon pian napetek so arum a problema? On, say pangiyabuloy ed temporaryon panirap so mabetbet a nanggawan posibli ed saray anak a manggayaga na magmaong a bunigas na bilay diad saginonor. Anton kaabigan so agawa diad impangiyabuloy na Dios ed karelmengan?

IMPORTANTIN SALISALAN YA AREGLOEN

5. (a) Panoy impanumlang nen Satanas ed Dios? (b) Anto so insipan nen Satanas ed si Eva?

⁵ Say impanrebelde ed Dios diad tanamanan na Eden so amatalindeg na importantin salisalan odino suppiat. Nakaukolan tayon usisaen itan ta pian natalosan no akin ya inabuloyan na Dios so karelmengan. Imbaga nen Jehova ed si Adan ya agmangakan ed sakey a kiew ed tanamanan. No si Adan so mangan, anto so nagawa? Kuan na Dios: “Peteg ya ompatey ka.’’ (Genesis 2:17) Anggaman kuan, eksakton imbaga nen Satanas so kasuniyan. Inkuanto’d si Eva ya asawa nen Adan, a mamudbor tan mangan ed insebel a bunga na kiew. “Sika so peteg ya ag-ompatey,’’ kuan nen Satanas. Diad tua, inkuanto ni ed si Eva: “Ta kabat na Dios a diad mismon agew a pangan mo ed satan saray matam so nalukasan tan magmaliw kan singa Dios, a kabat mo so maong tan mauges.”​—Genesis 3:1-5.

6. (a) Akin a tinmunganga si Eva ed Dios? (b) Anto so kabaliksan na pangan ed insebel a bunga?

 ⁶ Sinumlang nen Eva so Dios tan angan. Akin? Sinisia nen Eva si Satanas. Inisip ton sinisiblet a nagunggunaan diad itunganga to ed Dios. Inkatunongan to a sikato odino si Adan so agnakaukolan ya onebat ed Dios. Agda la nakaukolan so ontuek ed saray ganggan to. Sarag da lan desidien ed inkasikara no anto so “maong’’ tan no anto so “mauges.’’ Akinunong si Adan ed si Eva tan angan met. Sasalaysayen to so orihinal a kasalanan na too ed Dios, kuan na sakey a paimanod-leksab na The New Jerusalem Bible: “Sikato so pakayari na pandesidi ed inkasikato ed no anto so maong tan no anto so mauges tan diad ikiwas a tukoy ed satan, pangibabagan nagnap ya independente ed moral . . . Say inmunan kasalanan so panangataki ed inkasoberano na Dios.’’ Salanti, sikato so sakey a panangataki ed kanepegan na Dios a sikato so sigpot a manuley na too odino superyor.

7. (a) Anton salisalan so apalesa diad intunganga na too? (b) Anto ran tepet so nakaukolan a naebatan nipapaakar ed sayan salisalan?

⁷ Sirin diad impangan ed insebel a bunga, insian nen Adan tan Eva so inkasikara diad leksab na pananguley na Dios. Nankurang la ra ed dilin inkasikara, a ginawa ra so “maong’’ odino “mauges’’ unong ed dilin desisyon da. Kanian say importantin salisalan o suppiat ya apalesa so: Kasin say Dios so walaan na kanepegan a magmaliw a sigpot a manuley ed katooan? Diad arum a salita, kasin si Jehova so Sakey a mandesidi ed no anto so maong odino mauges a para ed totoo? Kasin sikato so Sakey a mangibaga ed no anto so suston kondukta tan no anto so makapuy? Odino sarag na too kasin gawaen so magmaong a kimey na panguley ed inkasikato? Siopan dalan na pananguley  so sankaabigan? Kasin sarag na totoo diad leksab na agnanengneng a pananguley nen Satanas, so manuley a maaligwas ya anggapo so panangiwanwan nen Jehova? Odino kasin nakaukolan so panangiwanwan na Dios ta pian mangiletneg na sakey a matunong a gobiernon mangitarok na magnayon a kareenan diad dalin? Amin na saratan a tepet so apalesa ed sayan panangataki ed inkasoberano na Dios, diad kanepegan ton sikato lambengat so mogmo tan sigpot a manuley na katooan.

8. Akin ya agdineral a tampol nen Jehova iray rebelde?

⁸ Siempre, diad saman ya impanrebelde et sarag nen Jehova a dineral la komon so taloran rebelde. Anggapoy suppiat a sikato so mabibiskeg nen si Satanas odino si Adan tan Eva. Balet say paneral to’d sikara so agmangareglo ed saray bengatla diad sankaabigan a paraan. Alimbawa, agto naebatan so tepet no kasin maaligwas a sarag na totoon uleyan so inkasikara ya anggapo so tulong na Dios. Kanian inabuloyan nen Jehova so panaon a pangareglo ed importantin salisalan ya apalesa.

PANANGAREGLO ED SALISALAN

9, 10. Antoray nansumpalan diad panasali na toon uleyan so inkasikato ya anggapo so panangiwanwan na Dios?

⁹ Natan diad inlabas na panaon, anto so resulta? Bueno, anto so nibagam? Kasin say linmabas ya 6,000 taon na awaran so angipanengneng a maaligwas so totoo diad impanguley ed inkasikara ya anggapo so panangiwanwan na Dios? Kasin nitarya na totoo so maabig a gobierno diad pakabendisyonan tan liket na amin? Odino kasin say kuritan na awaran so mangipanengneng a saray salita nen propeta Jeremias so susto: “Agkayarian na too so panakar to ya anggan say pangiwanwan ed kundang to’’?​—Jeremias 10:23.

¹⁰ Diad amin ya awaran amin a nengneng na gobierno so asubok la, balet anggapo so akapangitarok na kaligenan tan liket ed amin na saraman so manbibilay ed silong na uley da. Nayarin ituro na arum a totoo so pakanengnengan na aligwas. Balet kasin makapansalita so sakey a too na tuan aligwas sano say bekang tan pana so sinandian na bomba atomika, tan sano say mundo natan so wala ed baleg a kapapagaan ed sananey a sankamundoan a bakal? Anton nengneng na aligwas itan sano say too so akagatin ed bulan balet agmakapambilay a mankakasakey ed kareenan diad dalin? Anton kaabigan itan ed totoo so pangipaalagey na kaabungan a nankarga na amin a modernon nengneng na kagawaan sano saray pamilyan manaayam  ditan et abuybuyak ed saray gulo? Kasin saray panggugulo ed saray kalye, say panagderal na kayarian tan bilay tan say kasmak a kaugsan so pankinonan? Andin balot! Balet saraya so bunga na panasali na totoon panguley ed inkasikara ya impuera so Dios.​—Uliran 19:3.

11. Sirin, mapatnag, anto so nakaukolan na totoo?

¹¹ Say ebidensya so malinew ed amin. Saray sagpot na toon manuley ed inkasikato ya independente ed Dios so makapasinagem a sinmaew. Nansumpal ed baleg ya irap na too. “Inuleyan na too so too ed kasakitan to,’’ so paliwawa na Biblia. (Eclesiastes 8:9) Malinlinew, nakaukolan na totoo so panangiwanwan na Dios diad panguley to’d saray kurang na bilay da. Unong a pinalsa na Dios so too a mankaukolan na tagano tan danum, ontan met a say too so agawan mankaukolan na panulok ed saray ganggan na Dios. No ipulisay na too so ganggan na Dios, sikatoy nidunget ed kaguloan, unong a singa  sikato so seguradon manirap no ipulisay to so pankaukolan na laman ed tagano tan danum.​—Uliran 3:5, 6.

AKIN YA ONTAN LAN KABAYAG?

12. Akin ya inabuloyan na Dios so ontan lan kabayag na panaon a pangareglo ed salisalan?

¹² Anggaman kuan, nayarin itepet na sakey a too, ‘Akin ya inabuloyan na Dios so ontan lan inkabayag na panaon, ngalngalin 6,000 taon la natan, diad pangareglo ed sayan salisalan? Agta makapnek lan naareglo komon nensaman?’ Andin peteg. No say Dios so kinmiwas la nensaman, nagawa so pamakasalanan a saray totoo so agnaikdan na magenap a panaon diad panubok. Balet singa inkagawa, awalaan so totoo na dakel a panaon a manibukel na sakey a gobiernon mamenek ed pankaukolan na amin ya uuleyan to, ontan met a ginawa to so sientipikon impakalmo ed saman so ontulong diad aligwas na amin. Diad inlabas na saray siglo sinali na totoo so ngalngalin amin a nengneng na gobierno. Tan say aligwas da ed lawak na siensia so makapakelaw. Say atom so agawaan da lan mausar tan akapambiahe ra ed bulan. Balet anto so resulta? Kasin angitarok na engranden balon sistema diad kabendisyonan na katooan?

13. (a) Anggaman ed amin a sientipikon aligwas na too, anto so kipapasen natan? (b) Anto so malinlinew a paneknekan na saya?

¹³ Arawin ontan! Imbes, mas lalon wala so kaermenan tan gonigon ed dalin nen say nensaman. Diad tua, say krimen, polusyon, bakal, inkagba na pamilya tan arum iran problema so akarateng ed ontan lan kapeligroan a sinisia na saray sientista a say mismon kiwawala na too so niiyan ed kaatapan. On, diad ngalngalin 6,000 taon ya eksperiensia ed dilin-uley na too, tan kayari na impakadampot ed pantok na sientipikon “aligwas,’’ aarapen natan na katooan so kaderal-ton-dili! Agaylan malinew a saray totoo et agda nayarian a matalonan uleyan so inkasikara ya anggapo so Dios! Nisay makapanreklamo natan so anggan siopa ya ag-inyabuloy na Dios so magenap a panaon a pangareglo ed sayan salisalan.

14. Akin a sikatayo so nepeg a napaseseg diad pangusisa ed sananey nin importantin salisalan a pinatalindeg nen Satanas?

¹⁴ Seguradon say Dios so walaan na maabig a rason diad pangiyaabuloy to’d totoo diad silong na uley nen Satanas a pawalaen so karelmengan ed abayaglan panaon. Diad impanrebelde to pinalesa nen Satanas so sananey a salisalan a mankaukolan met na panaon diad kaareglo. Sakey a pangusisa ed sayan salisalan so mangiter na malaknab a tulong diad pakatalos tayo ed no akin ya inabuloyan na Dios so karelmengan. Sika so nagkalautlan interesado ed sayan salisalan lapud sika so personal a nalalanor.

[Tepetepet Parad Panagaral]

[Litrato ed pahina 100]

Diad maabig a rason, abuloyan na ateng so inad-aro ton anak ya ondalan ed ansakit ya operasyon. Say Dios met so walaan na maabig a rason diad temporaryon panangabuloy to ed totoo a manirap

[Litrato ed pahina 101]

Imbeneg nen Adan tan Eva, diad impangan ed insebel a bunga, so pananguley na Dios. Sikara so ginmapon nanggawa ed saray dilin desisyon da no nipaakar ed maong o mauges

[Saray litrato ed pahina 103]

Unong a say too so apalsan mankaukolan a mangan na tagano tan oninum na danum, sikato met so apalsa a mankaukolan ed panangiwanwan na Dios