Proverbio 27:1-27
27 Agmo ilalastog so nipaakar ed ontumbok ya agew,Ta agmo amta no antoy nagawa ed* kada agew.+
2 Paulyan mon sananey a too* so mangirayew ed sika, aliwan say dilin sangim;Say arum,* aliwan say dilin bibil mo.+
3 Ambelat so bato tan buer,Balet say probleman iiter na makulangkulang et mas ambelat nen saratan.+
4 Maruksa so sanok tan singa delap so pasnok,Balet siopay makaanos ed panimon?+
5 Mas maong ni parungtalan a panametek nen say akaamot a panangaro.+
6 Saray sugat a ginawa na sakey a kaaro et katooran,+Balet say iyaangob na kabusol et mabetbet.*
7 Samay naksel la et agto labay* so puron dilo,Balet diad samay narasan,* anggan say ampait et masamit.
8 Singa siwit ya ontataynan ed ubong toSo sakey a too ya ontataynan ed ayaman to.
9 Say larak tan insenso et mamaliket ed puso;Ontan met so masamit a pankakaaro a resultay masimoon a pananimbawa.*+
10 Agmo tataynanan so kaarom odino say kaaro nen amam,Tan agka oonlad abung na agim diad panaon na paniirap mo;Mas maong ni sakey a toon walad asingger nen say agi a walad arawi.+
11 Ana’ko, magmaliw kan marunong tan paliket moy pusok,+Pian naebatan ko may mangakantiaw ed siak.+
12 Say marunong et ompapaliis no nanenengneng toy peligro,+Balet say andiay kakabatan et ondidiretso tan aanien to ray pansumpalan.*
13 Alam so kawes na sakey a too no insipan ton ebatan so utang na agkabat a too;Alam ed sikato so pinagkagarantiya no ginawa to itan parad dayon bii.*+
14 Sano makmaksil so boses na sakey a mamebendisyon ed kapara ton too diad kabkabuasan,Ipasen itan a panangisamba ed sikato.
15 Say makolkol* ya asawan bii et singa atep ya ag-ontunday panterter to no mamauran.+
16 Siopaman a makapatundad sikato et napatunda toy dagemTan naegnaan na kawanan a lima to so larak.
17 Singa say balatyang a patataremen toy balatyang,Ontan met so sakey a too a patataremen toy kaaro to.*+
18 Samay mangaasikasod kiew ya igos et mangan na bunga na satan,+Tan samay mangaasikaso ed katawan to et napagalangan.+
19 No panon a nanengneng ed danum so lupa na sakey,Nanengneng met ed sananey a too so puso na sakey a too.
20 Say Lubok tan say pasen na kadederal* et agbalot napepenek,+Anggan saray mata na too et agbalot napepenek.
21 No panon a say bangan panagdalisay et parad pilak tan say hurnoan et parad balitok,+Say sakey a too et nasusubok diad naaawat ton dayew.
22 Anggano bayoen mo na alo so sakey a makulangkulangA singa atemek ya ilik diad lasong,Say inkamakulangkulang to et agnaekal ed sikato.
23 Nepeg mon kabaten a maong so pulok mo.Asikasom a maong iray* karnerom,+
24 Ta say kayamanan et agmansiansia ya anggad angga,+Tan say korona et agmansiansia diad amin a henerasyon.
25 Saray birdin dika et naaandi tan ontutubo iray balon dika,Tan saray tanaman ed kapalandeyan et titiponen.
26 Saray malangwer tan kalakian a karnero et mangitatarya na kawes mo,Tan saray kalakian a kanding et mangitatarya na isaliw moy uma.
27 Tan walay magenap a gatas na kanding a parad sika,Parad sankaabungan mo, tan parad saray lingkor mon bibii.
Paimanod leksab
^ Literal, “iyanak na.”
^ Literal, “sakey ya estranghero.”
^ Literal, “Say dayo.”
^ Odino posiblin, “aliwan masimoon; aliwan mabulos.”
^ Literal, “igagatin to.”
^ Odino “narasan a kamarerwa.”
^ Odino “resultay pananimbawa na kamarerwa.”
^ Odino “dusa.”
^ Odino “dayo.”
^ Odino “malabir.”
^ Literal, “lupa na kaaro to.”
^ Odino “Sheol tan Abaddon.”
^ Odino “Iteen moy pusom ed saray; Imanom iray.”
