Proverbio 14:1-35
14 Say biin peteg a marunong et ipapaalagey toy abung to,+Balet say biin makulangkulang et igegeba to itan diad saray mismon lima to.
2 Samay manaakar ed kaptekan et ontatakot ed si Jehova,Balet samay mapalikdo* iray kurang to et mamubusol ed Sikato.
3 Say mapaatagey a panagsalita na makulangkulang et singa lewet,Balet say bibil na saray marunong so manprotekta ed sikara.
4 No anggapoy baka et malinis so kuwadra,Balet say biskeg na kalakian a baka et mamapawala na dakel ya ani.
5 Say napanmatalkan a testigo et agmantila,Balet say palson testigo et puro katilaan so ibabaga to.+
6 Say mabalaw et manaanap na karunongan tan agmakaromog,Balet say kakabatan et mainomay labat a nagamoran na samay walaan na pakatalos.+
7 Arawian moy toon makulangkulang,Ta agmo naromog so kakabatan ed bibil to.+
8 Lapud karunongan et natatalosan na makabat a too so dalan ya aarapen to,Balet saray andiay kalakal et napapalikdo* ed inkamakulangkulang da.+
9 Saray makulangkulang et eelek-elekan da labat so pankakasalanan,*+Balet diad limog na saray maptek et walay mabulos a pikakareenan.*
10 Amta na puso so paneermen to,*Tan anggapoy arum a makalikna ed liket a nalilikna to.
11 Say abung na mauges et naderal,+Balet say tolda na matunong et lalon ombaleg.
12 Walay dalan a singa duga ed pakanengneng na too,+Balet say sampot to et ompugtad ipapatey.+
13 Anggano oneelek so sakey, nayarin nasasakitan so puso to,Tan say panliliket et nayarin mansumpal ed ermen.
14 Samay benger so puso to et anien to ray resulta na kagagawa to,+Balet say maong a too et natutumangan lapud gagawaen to.+
15 Say toon anggapoy amta to* et manisia ed kada salita,Balet samay makabat et dadalepdepen toy kada gawaen to.+
16 Samay marunong et maalwar tan aarawian toy kaugsan,Balet samay makulangkulang et palpalaran* tan sobray kompiyansa to.
17 Samay magangganon manpasnok et onkikiwas a makulangkulang,+Balet say toon pannononotan to ray bengabengatla* et bubusolen.
18 Samay anggapoy amta to* et tawiren toy inkamakulangkulang,Balet saray makabat et nakoronaan na kakabatan.+
19 Saray mauges a totoo et ondakmomo diad arap na maong a too,Tan say marelmeng et ontuek diad saray puerta na matunong.
20 Samay mairap-bilay et bubusolen na anggan saray kakaabay to,+Balet samay mayaman et dakel so kakaaro to.+
21 Samay mamubusol ed kaabay to et mankakasalanan,Balet siopaman a mangipapatnag na panangabagey ed saray pakaskasi et maliket.+
22 Agta saramay manplaplanoy kalokoan et nibalang?
Balet saramay determinadon manggaway maong et makaawat na matoor a panangaro tan katooran.+
23 Walay nagunggona ed kada kimey a pansasagpotan,Balet say angangga labat ed salita et mansumpal ed kairapan.+
24 Say korona na saray marunong et say kayamanan da;Balet say gagawaen na saray makulangkulang et mansumpal ed nagkalalon inkamakulangkulang.+
25 Say matuan testigo et mangililiktar na saray bilay,*Balet say managpalikdo et puro katilaan so ibabaga to.
26 Say takot ed si Jehova et mangiter ed sakey a too na baleg a talek,+Tan magmaliw itan a salimbengan na saray ananak to.+
27 Say takot ed si Jehova et subol na bilay,Pian iyarawi so sakey ed saray patit na ipapatey.
28 Say dakel a totoo et kirayewan na sakey ya ari,+Balet say manuley ya anggapoy uuleyan to et aderal la.
29 Say toon matantan a manpasnok et walaan na aralem a pakatebek,+Balet say toon agmakankaanos et ipapatnag toy inkamakulangkulang to.+
30 Say kalmadon puso et mangiiter na bilay* ed laman,Balet say imon et pakabulokan na saray pukel.+
31 Say manasaol ed pakaskasi et iinsultoen toy Manamalsa to,+Balet siopaman a mangipapatnag na panangabagey ed mairap-bilay et mangiglogloria ed Sikato.+
32 Say mauges et niyabeba lapud dilin kaugsan to,Balet say matunong et makaromog na salimbengan lapud integridad to.+
33 Say karunongan et mareereen a manaayam ed puso na toon makatalos,+Balet diad limog na saray makulangkulang et kaukolan itan a manpakabat.
34 Say inkatunong so mangiyaatagey ed sakey a nasyon,+Balet say kasalanan et kabandayan na totoo.
35 Say ari et naliliketan ed lingkor ya onkikiwas a makabat,+Balet sikatoy onsasanok ed samay onkikiwas a makapabaing.+
Paimanod leksab
^ Odino “pikewet.”
^ Odino posiblin, “saray andiay kalakal et napapalikdo ray arum.”
^ Odino “pipupulangan.”
^ Odino “walay kaabigay-linawa.”
^ Odino “paneermen na kamarerwa to.”
^ Odino “andiay kakabatan.”
^ Odino “mapaspasnok.”
^ Odino “say toon uusaren toy abilidad ton mannonot.”
^ Odino “andiay kakabatan.”
^ Odino “saray kamarerwa.”
^ Odino “kasil.”
