Isaias 46:1-13
46 Dinmakmomo si Bel,+ yinmuko si Nebo.
Saray imahen da et akalugan ed ayayep, ed ayayep a panagkimey,+A singa bagahe a sasakbaten na saray naksawan lan ayayep.
2 Onyuko tan ondakmomo ran dua;Agda niliktar iray akalugan,*Tan nibantak iran mismo* ed arum a dalin.
3 “Dengel mo ak, O sankaabungan nen Jacob, tan amin yon nakekeraan ed sankaabungan na Israel,+Sikayo ran tutulongan ko manlapu lad inkiyanak yo, tan aawiten ko sanen wala kayo nid eges.+
4 Anggad itatken yo et agak manguman;+Anggad magmaliw lan ubanan so ulo yo et mantultuloy ta kayon tulongan.
Singa ginawak la, awiten tan tulongan tan iliktar ta kayo.+
5 Siopay pangikomparaan odino pangiyaligan yod siak,+Ta pian manparpara kami?+
6 Wala ray alablabas so ipapaway dan balitok ed supot da;Manisimbang ira na pilak diad simbangan.
Manguupa ra na latero, tan gagawaen to itan a sakey a dios.+
Insan ontalimukor ira, on, dayewen da itan.*+
7 Sakbaten da itan;+Awiten da tan iyan dad pasen to, tan mansiansia labat ditan.
Ag-itan makaalis ed kawalaan to.+
Pampikasian da itan, balet ag-onebat;Ag-itan makapangiliktar ed siopaman a nagogonigon.+
8 Nodnonot yo iya, tan manpakpel kayo.
Ipapuso yo iya, sikayo ran makasalanan.
9 Nodnonot yo iray apalabas* a bengatla nensaman,A siak so Dios,* tan anggapo lay arum.
Siak so Dios, tan anggapoy miparad siak.+
10 Diad gapo ni labat et ipapasakbay ko lay pansumpalan,Tan nensaman ni et ipapasakbay ko la ray agni agawa.+
Inkuan kon, ‘Say desisyon ko* et agmanguman,+Tan gawaen ko so antokaman a panliketan ko.’+
11 Tawagen ko so sakey a managsibar a manok manlapud bubutayan na agew,*+Say laki a manlapud arawin dalin a manumpal ed desisyon ko.*+
Sinalitak iya, tan gawaen ko met.
Inggagalak iya, tan sumpalen ko met.+
12 Dengel yo ak, sikayo ran walaay anawet* a puso,Sikayo ran arawrawi ed inkatunong.
13 Inyasingger ko lay inkatunong ko;Aliwa itan ya arawrawi,Tan agnaatrasado so panangiliktar ko.+
Iliktar ko so Sion, tan iter koy karakpan ko ed Israel.”+
Paimanod leksab
^ Salanti, saray idolo ya akalugan ed ayayep.
^ Odino “so kamarerwa ra.”
^ Literal, “ondakmomo rad satan.”
^ Literal, “akauna.”
^ Odino “Makapanyari a Dios.”
^ Odino “gagalak; simbawak.”
^ Odino “bukig.”
^ Odino “gagalak; simbawak.”
^ Literal, “makapanyari.”
