Isaias 40:1-31
40 “Ligliwa yo, ligliwa yoy totook,” so inkuan na Dios yo.+
2 “Mansalita kayo ed puso na* Jerusalem,Tan iyabawag yod sikato ya asumpal lay paskaran a panaglingkor to,Abayaran lay kasalanan to.+
Sigpot a kasimbangan* so naawat tod lima nen Jehova parad amin a kasalanan to.”+
3 Walay onkekelyaw diad kalawakan:
“Linisan* yo so dalanen nen Jehova!+
Manggawa kayoy maptek a dalan+ diad desierto a parad Dios tayo.+
4 Patagey yoy amin a lawak,Tan paabeba yoy amin a palandey tan pukdol.
Plastado yoy atibtibagkol a dalin,Tan pagmaliw yon patar a lawak so nikutkutlaong a dalin.+
5 Niparungtal naani so gloria nen Jehova,+Tan nanengneng itan na amin a totoo,*+Ta si Jehova a mismo so nansalita.”
6 Dengel mo! Walay mangibabaga: “Kelyaw ka!”
Tan walay mangitepet: “Antoy ikelyaw ko?”
“Amin a totoo* et singa birdin dika.
Amin a matoor a panangaro ra et singa rosas ed uma.+
7 Amagaan so birdin dika,Alenes so rosas,+Lapud asiplogan na mismon linawa* nen Jehova.+
On, saray totoo et singa labat birdin dika.
8 Amagaan so birdin dika,Alenes so rosas,Balet say salita na Dios tayo et mansiansia ya anggad angga.”+
9 Tatdang kad atagey a palandey,Sikan bii a mangipapasabi na maong a balita parad Sion.+
Ikasil mon maong so boses mo,Sikan bii a mangipapasabi na maong a balita parad Jerusalem.
Ikasil mo, agka ontatakot.
Iyabawag mod saray syudad na Juda: “Nia so Dios yo.”+
10 Say Soberanon Katawan a Jehova et onsabin walaay pakayari,Tan say taklay to et manuley parad sikato.+
Walad sikato so tumang to,
Tan walad arapan to so upa ya ibayar to.+
11 Asikasoen* toy pulok to a singa sakey a managpastol.+
Tiponen to iray kordero diad panamegley na taklay to,Tan awiten to ra diad pagew to.
Maalwar ton iwanwan iramay manpapasuso.+
12 Siopa lay akasukat ed danum na dayat ed panamegley na lima to+Tan angalay sukat na katawenan ed panamegley na sankarangan na lima to?*
Siopa lay akapangikarga ed dabok na dalin diad panagsukatan,+Odino animbang ed belat na kapalandeyanPati say kapukdolan?
13 Siopa lay akasukat* ed espiritu nen Jehova,Tan siopay makapangibangat ed sikato bilang mananimbawa to?+
14 Siopay kinonsulta to pian sikatoy nawalaay pakatalos,Odino angibangat ed sikato ed basbas na inkahustisya,Odino angiter ed sikato na pikakabat,
Odino angipanengneng ed sikato na dalan na tuan pakatalos?+
15 Saray nasyon et singa sankatedter a danum ed timba,
Tan ipapasen to ran singa dabok ed saray simbangan.+Agwaten to iray isla a singa labat dabok.
16 Anggan say Lebanon et agmagenap a pansunglor ed apoy,*Tan anggan saray atap ya ayep ditan et agmagenap bilang apay a popoolan.
17 Amin a nasyon et singa anggapo ed arapan to;+Ipapasen to ran singa labat anggapo, singa anggapoy kakanaan.+
18 Siopay pangikomparaan yod Dios?+
Antoy nibaga yon kaparpara to?+
19 Say marunong a komikimey et nanggaway idolo,Say latero et binalkot to itan na balitok,+Tan inggawaan to na saray pilak a kuwintas.
20 Sikatoy amili na kiew ya iter to,+Sakey a kiew ya agnabulok.
Inyanapan to itan na sakey a marunong a komikimeyPian manggaway sakey ya inukit ya imahen ya agnatumba.+
21 Agyo ta amta?
Agyo ta nadngelan?
Agta nibaga ed sikayo manlapu lad gapo?
Agyo ta atalosan manlapu lad inkiletneg na dalin?+
22 Walay Dios a manaayam diad tagey na malimpek* a dalin,+Tan singa labat duron iray manaayam ditan,
Ibibilkag to so katawenan a singa labat maimpis ya abel,Tan ibubuskag to iratan a singa toldan panayaman,+
23 Eekalen tod pakayari iray atagey ya opisyal,Tan gagawaen ton anggapoy kakanaan iray ukom* diad dalin.
24 Aganggano ni ran nitanem,Aganggano ni ran nisibwag,Agni linmamot so sengeg da ed dalin,Et asiplogan tan amagaan la ra,Tan singa ra dayami ya itikyab na dagem.+
25 “Siopay pangikomparaan yod siak pian makapipara ak ed sikato?” so inkuan na Masanton Dios.
26 “Tangay kayo pad tawen tan nengneng yo.
Siopay amalsa ed sarayan bengatla?+
Samay mangidadaulo ed armada na saray bibitewen unong ed bilang da;Tatawagen to ran amin ed kangaranan da.+
Lapud mabisbiskeg ya enerhiya to tan makapadinayew a pakayari to,+Anggapo ed saratan so nababalang.
27 Akin ya ibabagam, O Jacob, tan iyaabawag mo, O Israel,‘Agnanenengneng nen Jehova so dadalanen ko,Tan anggapoy hustisya a naawat kod Dios’?+
28 Agyo ta naamtaan? Agyo ta nadngelan?
Si Jehova, say Manamalsa na interon dalin, et Dios ed anggad angga.+
Sikatoy agbalot nakesawan odino onkapuy.+
Agnasarag ya usisaen* so pakatalos to.+
29 Iikdan toy pakayari iray naksawan,
Tan pakakasilen ton maong iramay andiay biskeg.*+
30 Onkesaw tan onkapuy iray ugugaw a lalaki,Tan naparukol tan natumba iray kalangweran a lalaki,
31 Balet ombiskeg iramay maniilalo ed si Jehova.
Ontikyab iran singa walaay payak na agila.+
Ombatik ira tan ag-ira onkapuy;Manakar ira tan ag-ira nakesawan.”+
Paimanod leksab
^ Odino “Mansalita kayoy makaligliwa ed.”
^ Odino “Doble.”
^ Odino “Iparaan.”
^ Literal, “amin a laman.”
^ Literal, “Amin a laman.”
^ Odino “espiritu.”
^ Odino “Pastolan.”
^ Say sukat manlapud nguro na tangan anggad kiking sano ibuskag so lima. Nengnengen so Apendise B14.
^ Odino posiblin, “akatebek.”
^ Odino “agmakapawala na magenap a kiew a pansunglor.”
^ Odino “tibukel.”
^ Odino “iray manuley.”
^ Odino “Agnatukor.”
^ Odino “mabiskeg ya enerhiya.”
