Amos 5:1-27
5 “O sankaabungan na Israel, dengel yo iyan salita bilang kansion a tagleey* ya ibagak ed sikayo:
2 ‘Atumba lay birhen, say Israel;Sikatoy agla makabangon.
Sikatoy pinaulyanan ed dilin dalin to;Anggapoy mangipaalagey ed sikato.’
3 “Ta oniay inkuan na Soberanon Katawan a Jehova:
‘Sanlasus labat so nakerad samay syudad a walaay sanlibon miguerra;Tan samplora labat so nakerad samay walaay sanlasus a miguerra, ta ontan so nagawa ed sankaabungan na Israel.’+
4 “Ta oniay inkuan nen Jehova ed sankaabungan na Israel:
‘Anap yo ak tan mantultuloy kayon manbilay.+
5 Agyo aanapen so Bethel,+Agkayo oonla ed Gilgal+ tan agkayo ondadalan ed Beer-sheba,+Ta seguradon nibantak ed arum a dalin so Gilgal,+Tan magmaliw ya andi-kakanaan* so Bethel.
6 Anap yoy Jehova, tan mantultuloy kayon manbilay,+Pian sikatoy ag-ondalang a singa apoy ed sankaabungan nen Jose,Tan napoolan so Bethel ya anggapoy makapangerep.
7 Impagmaliw yon ahenho* so inkahustisya,Tan imbantak yo so inkatunong.+
8 Samay amalsa na konstelasyon a Kima* tan konstelasyon a Kesil,*+Samay pagmamaliwen ton kabuasan so makapal a bilunget,Samay pagmamaliwen ton ambilunget a singa labi so agew,+Samay manatawag ed saray danum na dayat+Pian ikalbo to iratan ed tapew na dalin—Jehova so ngaran to.
9 Iyakar to so biglan kadederal ed saray mabiskeg,Tan naderal iray apadiran a pasen.
10 Kabusol da iramay manangipetek a walad puerta na syudad,Tan makapadimla ed sikara iramay mansasalita na katuaan.+
11 Lapud kekerewan yo na abang* so mairap-bilay parad dalin a dadalusan to,Tan aalaen yoy ilik to bilang buis,+Agkayo la manayam ed saray impaalagey yon abung a gawad tinabas a bato+Tan agkayo la oninum na alak manlapud saray intanem yon maabig a klase na kaubasan.+
12 Ta amtak no panon karakel so impanrebelde yo*Tan no panon kabaleg iray kasalanan yo—Papairapen yo ray matunong,Mangaawat kayoy pasuksok,Tan agyo iiter so kanepegan na mairap-bilay diad puerta na syudad.+
13 Kanian diad satan a panaon, ondeen iramay walaan na aralem a pakatalos,Ta panaon itan na kadederal.+
14 Anap yoy kamaongan, tan aliwan say kaugsan,+Pian mantultuloy kayon manbilay.+
Diad ontan et nayarin niwalad sikayo si Jehova a Dios na saray armada,A singa ibabaga yo.+
15 Busol yoy kaugsan, tan aro yoy kamaongan,+Ipatnag yoy inkahustisya diad puerta na syudad.+
Nayarin kasian nen Jehova a Dios na saray armadaIramay akera ed Jose.’+
16 “Kanian oniay inkuan nen Jehova a Dios na saray armada, si Jehova:
‘Walay nagawan panugaog ed amin a plaza,Tan ibaga rad amin a karsada: “Agayla!”
Tawagen da ray dumaralus pian manermenTan saramay uupaan ya onakis.’
17 ‘Tan walay nagawan panugaog ed amin a kaubasan;+Ta ondalan ak ed kawalaan yo,’ so inkuan nen Jehova.
18 ‘Pakaskasi la iramay manpipirawat ed agew nen Jehova!+
Anto sirin so kabaliksan na agew nen Jehova parad sikayo?+
Satan et kabilungetan, aliwan liwawa.+
19 Singa itan sakey a toon ibabatikan toy leon, balet sinabat na sakey ya oso,Tan kaloob tod abung to tan impeket toy lima tod padir, sikatoy kinetket na uleg.
20 Agta say agew nen Jehova et kabilungetan, tan aliwan liwawa;Agta makapal a bilunget, tan aliwan kasnagan?
21 Kabusol ko, makapadimla ed siak iray piesta yo,+Tan agko panliketan so angob na saray sagradon pantitipon yo.
22 Anggan ibagat yod siak iray interon apay yon popoolan tan saray apay yon regalo,Agko panliketan iratan;+Tan agak naliketan ya onnengneng ed saray matataban ayayep bilang bagat yon pandurungoan.+
23 Agyo ipaparengel ed siak iray maingal a pangakansion yo;Tan agko komon narengel so togtog na saray nandeles ya instrumento yo.+
24 Onagus komon so inkahustisya a singa danum,+Tan say inkatunong a singa kulos ya agnaekatan.
25 Kasin inyakaran yo ak na saray bagat tan apay a regaloLegan a wala kayod kalawakan diad loob na 40 taon, O sankaabungan na Israel?+
26 No nibantak kayod arum a dalin, awiten yoy Sakut ya ari yo tan si Kaiwan,*Saray imahen yo, say bitewen a dios yo a ginawa yo parad sarili yo,
27 Tan ibantak ta kayod dalin a lampas nid Damasco,’+ so inkuan na samay sakey a say ngaran to et Jehova a Dios na saray armada.”+
Paimanod leksab
^ Odino “kansion parad paneermen.”
^ Odino posiblin, “sakey a bengatlan misteryo.”
^ Odino “ampait.”
^ Nayarin tutukoyen na saya so konstelasyon ya Orion.
^ Nayarin tutukoyen na saya so bibitewen a Pleyades diad konstelasyon a Taurus.
^ Odino “buis.”
^ Odino “so ginawa yon krimen.”
^ Sarayan dirios et nayarin manutukoy ed planetan Saturn, a dadayewen bilang dios.
