Unona ed Saray Taga Corinto 7:1-16
7 Kanian, inad-arok ya agagi, lapud walad sikatayo irayan sipan,+ linisan tayoy sarili tayo ed amin a karutakan na laman tan espiritu+ pian magmaliw itayon lalon masanto legan tayon tatakotan so Dios.
2 Ilugaran yo kami ed kapusoan yo.+ Anggapoy siopaman a nanggawaan mi mauges, anggapoy siopaman a dineral mi, anggapoy siopaman ya inanamot mi.+
3 Agko ibabaga iya pian kondenaen kayo. Ta imbagak la nensaman a wala kayod kapusoan mi pian sankakaiba tayon ompatey tan manbilay.
4 Bulobulos ak a mansalita ed sikayo. Ipapasirayew ta kayon maong. Naliligliwa ak a maong; tan pinasyay liket ko diad amin a paniirap mi.+
5 Diad tua, sanen sinmabi kami ed Macedonia,+ agkami nainawaan noag ingen nantultuloy kamin nanirap ed amin a paraan—wala ray panlalaban ed paway, wala ray pakakatakotan ed loob.
6 Balet say Dios, a manliligliwa ed saramay naaandiay ilalo,+ et niligliwa to kami diad imbisita* nen Tito;
7 tan aliwa labat a diad imbisita to, noagta diad panamegley met na ligliwan naawat to lapud sikayo, sanen imbalita tod sikami so pakakailiw yod siak, say pinasyan paneermen yo, tan say masimoon a panangiyansakit yo* ed siak; kanian lalon aliketan ak.
8 Ta anggano apaermen ta kayo ed sulat ko,+ agko itan pagbabawian. Anggano diad unona et nagbabawian ko itan (lapud apaermen ta kayo ed sulat ko, balet ta agano labat),
9 natan et naliliketan ak, aliwan lapud nanermen kayo, noagta lapud say impanermen yo so amakiwas ed sikayon magbabawi. Ta say impanermen yo et unong ed linawa na Dios, kanian agkayo apasakitan lapud sikami.
10 Ta say panermen unong ed linawa na Dios et manresultad pagbabawi, a mangitonton ed kililiktar, a saya et agpagbabawian;+ balet say panermen unong ed mundo et manresultad ipapatey.
11 Ta nengneng yoy alay abig a resulta ed sikayo na impanermen yo unong ed linawa na Dios: say pinasyan inkagunaet yo, say panlilinis yod sarili yo, say isasanok yod gawan mauges, say takot yod Dios, say masimoon a pampipirawat yo, say inkaseseg yo, say pangipepetek yod gawan mauges.+ Diad sarayan amin a bengatla et impatnag yon malinis* kayo.
12 Anggaman sinulatan ta kayo, agko itan ginawa parad samay nanggawa na mauges+ odino parad samay nanggawaan na mauges, noagta pian say inkagunaet yon ondengel ed sikami et napatnagan ed sikayo tan diad arapan na Dios.
13 Satan so rason ya aligliwa kami.
Balet agkami labat aligliwa noagta mas lalon aliketan kami lapud liket nen Tito, ta nainawaan so espiritu to lapud sikayon amin.
14 Ta no impasirayew ta kayo ed sikato, agak aturingan; tan no panon a tuan amin so imbaga mid sikayo, tua met so impasirayew mid si Tito.
15 Ontan met, lalon onaaralem so masimoon a panamabli tod sikayo sano nanononotan toy katutulok yon amin,+ say marespeton impangawat yod sikato.
16 Naliliketan ak ta diad amin a gagawaen yo et napanmatalkan ta kayo.*
Paimanod leksab
^ Literal, “kiwawala.”
^ Literal, “say seseg yo.”
^ Odino “masimpit; andiay kasalanan.”
^ Odino posiblin, “makapanpakpel ak a maong lapud sikayo.”
