Tua o Tila

1.   No dakel so kakaarom, agka lan balot makaliknay ermen.

2.   No active ka ed social media, agka lan balot makaliknay ermen.

3.   No text ka lan text, agka lan balot makaliknay ermen.

4.   No manggawa kay kamaongan ed arum, agka lan balot makaliknay ermen.

 Akin ey?

•   Aliwan purkit dakel so kakaarom et agka lan balot makaliknay ermen.

   “Concern ak ed saray friends ko, pero no maminsan et singa anggapoy pibabali dad siak. Mas lalo kan naermenan no dakel ya tuay kakaarom pero singa anggapoy malasakit dad sika tan singa agda ka kailangan.”​—Anne.

•   Aliwan purkit active ka ed social media et agka lan balot makaliknay ermen.

   “Wala ray mikakaaro ed arum ya singa labat ira mankokolekta na figurine. Pero di ba, anggano panoen moy kuartom na saray aka-display ya figurine, aga nipalikna na saratan ya inaro da ka? No ataptapew labat so pankakaaro yo, saray friends mo ed online et singa ra labat aka-display ya figurine.”​—Elaine.

•   Aliwan purkit text ka lan text et agka lan balot makaliknay ermen.

   “No maermen ka, iche-check moy phone mo no walay nan-text ed sika. Kanian no anengneng mon anggapoy nan-text, lalo ka labat ya naermenan!”​—Serena.

•   Aliwan purkit manggagawa kay kamaongan ed arum et agka lan balot makaliknay ermen.

   “Galante tan maomaong ak ed saray kakaarok, pero aliwa ran ontan ed siak. Aliwan say manko-complain ak, pero mankelaw ak labat no akin et aliwan onman so panagtrato da ed siak.”​—Richard.

 Importantin tandaan: Say ermen et akadepende ed nononoten na sakey. “Manlalapu itan ya mismo ed sika, aliwan diad arum a too,” so imbaga na kabataan ya si Jeanette.

 Antoy gawaen mo no say pakaliknam et anggapoy friends mo tan maer-ermen ka?

Aral moy nawalaan na tiwala ed sarilim.

 “No insecure ka ed arum, ompan naermenan ka laingen. Nairapan kan mikaaro no say sankanonot mo et agka karapat-dapat ya pikaaroan.”​—Jeanette.

 Ibabaga na Biblia: “Arom so kaparam a too a singa ed sikan dili.” (Galacia 5:14) Pian balibali ulopan yon sankakaaro, dapat dugaruga so pakanengneng mo ed sarilim​—aliwan abebbeba tan aliwa met ya sobsobra.​—Galacia 6:3, 4.

Agka manpopokus ya maong ed sarilim.

 “Say ermen et singa kumunoy. No anggapoy gawaen mo, talagan nairapan kan makaalis ditan. No sarilim ya lanang so sankanonot mo, ompan arawian ka laingen na arum tan lalo kan naermenan.”​—Erin.

 Ibabaga na Biblia: “Say aro et . . . agto aanapey dilin pankaabigan to.” (1 Corinto 13:4, 5) No masyado tayon akapokus ed sarili tayo, ompan agtayo la nipanengneng so malasakit ed arum tan daiset so malabay ya mikaaro ed sikatayo. (2 Corinto 12:15) Tandaan: No say liket mo et akadepende ed panagtrato na arum ed sika, nadismaya ka labat! No ibabagam ya “Anggapo labat so mankukumusta ed siak” tan “Agda ak labat inimbitaan,” singa akadepende ed arum so liket mo. Kasin ontan so labay mo?

Agka mikakaaro ed anggan siopa labat.

 “No maermen so sakey, natural labat ya mananap na atension, tan agla importante ed sikato no siopay mangiter na atension. Labay ton nalikna ya sikatoy importante ed arum. Pero wala ray totoon ipalikna dan labay da kan nakaaro, balet diad tua et gamiten da ka labat pian naala day labay da. Lalo ka laingen ya naermenan.”​—Brianne.

 Ibabaga na Biblia: “Samay miuulop ed marunong et magmaliw a marunong, balet samay mililimog ed makulangkulang et aliwliway pansumpalan to.” (Proverbio 13:20) No say sakey et narnarasan, anggano anto la ditan et kanen to. Ontan met iray totoo ya desperadon makalmoy kakaaro, anggan siopa la ditan et pikaaroan da. Main-inomay iran biktimaen na saray managloko, ta say amta ra et normal itan ed saray sankaaro.

 Leksion: Amin tayo et makakaliknay ermen no maminsan; pero aliwan parepareho so inkagrabe na ermen tayo. Tan anggano aliwliwa itan ya liknaan, tandaan mo ya liknaan labat itan. Maslak ya nalilikna tayo et ididikta na isip tayo, pero sarag tayon kontrolen iray nononoten tayo.

 Ontan met, komon ta aliwan atagtagey so iilaloan mo ed arum. “Aliwan amin et magmaliw ya best friend mo ya anggad angga,” so imbaga nen Jeanette, ya abitla nen niman, “pero walan-wala ray totoon manmalasakit ed sika. Tan sapat la itan pian nalabanan moy ermen.”

 Kailangan mo ni tulong? Basaen so “ Labanan so Takot ya Mikaaro.” I-download met so PDF na “Pagharap sa Kalungkutan.”