TEPET NA SARAY KABATAAN

Kumustay Itsurak?

I-PLAY

Kumustay Itsurak?

Akin et nepeg mon isipen no antoy isulong mo? On, ta napatnagan ed panangawes mo so inkatoom. Anton mensahe so ipapasabi na panangawes mo?

Taloran makapuy ya ideya tungkol ed panangawes tan no panon ya naiwasan iratan

Makapuy ya ideya #1: Aligen so panangawes ya nanenengneng mod media.

“No maminsan, labay koy miuso ta atan lan naynay so nanenengneng kod saray ads,” so kuan na sakey ya tinedyer ya say ngaran to et Theresa. “No say sankanonot mo et saray litrato na saray totoo ya uso so kawes da, mainomay mo ran naalig.”

Aliwan saray bibii labat so nai-ingganyo ed saray advertisements. “Anggan saray lalaki et miuuso met,” so kuan na libron The Everything Guide to Raising Adolescent Boys. “Anggan ugugaw ni ira, labay la ran ingganyoen na saray negosyante.”

No antoy mas maabig ya gawaen mo: Ibabaga na Biblia: “Say toon anggapoy amta to et manisia ed kada salita, balet samay makabat et dadalepdepen toy kada gawaen to.” (Proverbio 14:15) Niyaplikam itan ya prinsipyo no nonoten mo nin maong iray nanenengneng mo ed ads. Singa bilang, no walay nanengneng mon ads ya ipro-promote toy kawes ya “sassy,” “hot,” odino “sexy,” tepetan moy sarilim:

‘Siopan talaga so minanabang no miuso ak?’
‘Anton lifestyle so napatnagan ed siak no isulong ko itan?’
‘Talaga kasin ontan so lifestyle ko, tan say estandarte ya tutumboken ko?’

Fashion tip: Diad sakey simba, imanom iray ads tan media ya tungkol ed fashion. Anton lifestyle so ipapauso da? Kasin agmo nalilikas ya iingganyoen da ka lan misabay ed uso? “Lanang dan ibabaga ya dapat balibali itsuram, balibali kawes mo, tan nepeg mon ipasikat so ‘balibalin laman’ mo,” so kuan na sakey ya tinedyer ya si Karen. “Amta itan na saray negosyante, kanian saray kabataan so target da.”

Makapuy ya ideya #2: Miuso pian labat makapibagay ed arum.

“No say sakey ya panangawes et uso,” so kuan na sakey ya kabataan ya si Manuel, “amin et ontan lay panangawes da. Kanian no agka miuso, balawen da ka.” Mipara ed satan so imbaga na sakey ya tinedyer ya si Ana. Imbaga to: “Parad arum, anggan anto lad tay uso, say importante et miuso ka pian makapibagay ka.”

No antoy mas maabig ya gawaen mo: Ibabaga na Biblia: “Agkayo la manpapaimpluensya ed sayan sistema na mundo.” (Roma 12:2) Pian naunor mo itan ya bilin, nengneng mo ray kawes mo tan tepetan moy sarilim:

‘Anto ray makakaimpluensya ed siak no manpipili ak na kawes ko?’
‘Kasin importante ed siak ya branded iray kawes ko?’
‘Kasin labay ko labat ya pasikatan so arum diad paraan na panangawes ko?’

Fashion tip: Imbes ya duara labat so pampilian mo—samay uso (ya labalabay na dakel) odino karaanan (ya ag-pipilien)—maabig no ikonsideram iyan komatlon pampilian mo: amay nawalaan kay kompiyansa ed sarilim tan napanatag ka. No walay kompiyansam ed sarilim, agka na-pressure ya miuso pian labat makapibagay ed arum.

Makapuy ya ideya #3: ‘No mas sexy, mas balibali.’

“Diad tua, no maminsan et makapaingganyo so mansulong na makapaakit. Singa bilang, amay antiktikey, mapitpitat, odino amay bitin,” so kuan na sakey ya bii ya say ngaran to et Jennifer.

No antoy mas maabig ya gawaen mo: Ibabaga na Biblia: “Komon ta say pamarakep yo et aliwan samay nanengneng . . . noagta say peteg ya inkatoo ed dalem na puso.” (1 Pedro 3:3,4) Pian naunor mo itan ya bilin, isip mo no antoy mas marakep—marakep ya itsura o amay marakep ya inkatoo.

Fashion tip: Say sankaabigan ya ‘fashion accessory’ et say kasimpitan. Tua, aliwa la ’tan ya uso natan. Pero isip mo pa ya:

Wala ta lay akatongtong mo ya tungkol ed sarili to labat so ibabaga to? Makapaermen ta ag-amta na satan ya too ya nibabaliwala to ka la manaya!

Say panangawes et singa istoryaan, no ‘tungkol ed sarilim labat so ibabagam,’ ompan arawian ka laingen na arum

No aliwan masimpit so panangawes mo, singa ka satan ya too. Singa ibabaga na kawes mo ya, ‘ni, nengneng mo ak,’ kanian ompapaway ya kulang so kompiyansam ed sarilim odino makasarili ka—odino atan ya dua. Singa ka la desperado ed anggan anton klase na atension, kanian ompapaway laingen ya papansin ka.

Mas maong ni masimpit, nen say makapuy so pakanengneng na arum ya too ed sika. “Agto labay ya ibagan aligen mo lay panangawes nen baim pian nibagan masimpit so panangawes mo,” so kuan na sakey ya tinedyer ya si Monica. “Labay ton ibaga et rerespetoen mo labat so sarilim tan say arum ya makakanengneng ed sika.”