“Kabangon ko, ondedengel ak lay musika. Kalugan kod kotse, ondedengel ak na musika. No wala ak ed abung ya manrerelaks, manlilinis, anggan no manbabasa ak​—ondedengel ak na musika. Lanang ak ya ondedengel na musika.”​—Carla.

 Kasin singa si Carla et mahilig ka met ed musika? No on, ontulong iyan artikulo pian nanengneng mo ray maong ya epekto na satan, naiwasan iray mauges ya epekto, tan duga iray napilim ya musika.

•  Saray maong ya epekto

•  Saray mauges ya epekto

•  No antoy ibabaga na arum ya kabataan

 Say idengel ed musika et nikompara ed pangan. Diad saratan, parehon kailangan so dugan klase tan dugan karakel. Nonoten iraya:

•   Parakepen na musika so mood mo.

   “No aliwliway agew ko, man-play ak labat na paboritok ya musika, OK ak la.”​—Mark.

•   Ipanonot ed sika na musika iray apalabas.

   “Lanang ya ipapanonot ed siak na sakey a kansion iray balibalin agawa, kanian maliket ak no narerengel ko itan.​—Sheila.

•   Sarag ya pankasakeyen na musika iray totoo.

   “Nen wala ak ed internasyonal a kombension na Saray Tasi nen Jehova, tan kakansionen na amin ya bisita so sampot ya kansion, akaakis ak. Nandurumay lenguahe mi, balet pinankasakey kami na musika.”​—Tammy.

•   Ontulong ed sika so musika pian nawalaan na balibali iran ugali.

   “Say panaral ya mantogtog na instrumento et ontulong ed sikan nawalaay disiplina tan anos. Agmo itan tampol ya naaralan. Nagawaan mo labat itan no manpraktis ka.”​—Anna.

 Kasin antam? Say sankadukeyan a libro na Biblia—Saray Salmo—et nankarga na 150 ya kansion.

 Arum a musika et singa abulok a kakanen ya makasamal. Nengnengen no akin.

•   Saray lyrics na dakel ya kansion et nipaakar ed sex.

   “Singa amin lawarin sikat ya kansion et nipaakar ed sex. Masyado la ran bulgar.”​—Hannah.

   Ibabaga na Biblia: “Komon ta say seksual ya imoralidad tan amin a klase na karutakan odino inkaagum et ag-anggan nabitla ed limog yo.” (Efeso 5:3) Tepetan moy sarilim, ‘Kasin agko natutumbok itan ya bilin lapud saray dedengelen kon musika?’

•   Wala ray musika ya makapaermen.

   “No maminsan, antis ak ya onugip et akarukol ak ya ondedengel ed musika tan wala ray nanononotan kon makapa-depress tan makapaermen. Aliwliwa ray nanononotan ko no onia ray musikan narerengel ko.”​—Tammy.

   Ibabaga na Biblia: “Manuna ed amin, alwaran moy pusom.” (Proverbio 4:23) Tepetan moy sarilim, ‘Kasin negatibo iray nononoten ko lapud saray dedengelen kon musika?’

•   Wala ray musika ya gawaen da kan mainomay ya manpasnok.

   “Saray musika nipaakar ed pasnok tan panagbusol et walay mauges ya epekto ed siak. Napapansin ko ya nauuman so mood ko no ondedengel ak ed ontan iran musika. Napapansin met itan na pamilyak.”​—John.

   Ibabaga na Biblia: “Amin iraya et nepeg yon ekalen ed inkasikayo: say sanok, pasnok, kaugsan, makapasakit iran salita, tan mabanday a panagsalita, a saya et agnepeg ya ompaway ed sangi yo.” (Colosas 3:8) Tepetan moy sarilim, ‘Kasin lapud dedengelen kon musika et lanang kon ipipilit so labay ko, ya agko la iisipen so liknaan na arum?’

 Say aral? Manpili. Ontan so gagawaen na tinedyer ya si Julie. Imbaga to: “Lanang kon iche-check iray musikan dedengelen ko tan ide-delete ko so antokaman ya aliwan OK. Aliwa yan mainomay pero amtak ya aya so duga.”

 Ontan met so gagawaen na kabataan ya si Tara. Imbaga to: “No maminsan, walay narengel kon kansion ed radyo ya balibali beat to, pero no aliwliway lyrics to, iyaalis koy istasyon. No gagawaen ko itan, singa pipigilan koy sarilik ya mangan na masarap ya cinnamon roll kayarik ya atawayan itan! Pero no asarag kon iwasan so sakey a kansion nipaakar ed sex, nayarin mas nasarag ko met ya iwasan so mi-sex antis na kasal. Agko labay ya ibaliwala so epekto na musika ed siak.”