Talaga Kasin Walay Diablo?

I-PLAY

Say ebat na Biblia

On, walay Diablo. Sikato so “manuley na mundo,” sakey ya espiritun pinalsa ya nagmaliw ya mauges tan nanrebelde ed Dios. (Juan 14:30; Efeso 6:11, 12) Ipapaamta na Biblia so personalidad na Diablo panamegley na sarayan ngaran tan panangideskribe:

Satanas—say labay ton ibaga et “Sumusumpa.”—Job 1:6.
Diablo—say labay ton ibaga et “Managpauges.”—Apocalipsis 12:9.
Uleg—inusar ed Biblia pian mankabaliksan na “Managpalikdo.”—2 Corinto 11:3.
Managtukso.—Mateo 4:3.
Matila.—Juan 8:44.

Aliwan basta prinsipyo odino mauges ya ugali

Iisipen na arum ya si Satanas a Diablo et sakey labat ya prinsipyo odino mauges ya ugali ya walad loob tayo. Balet nabasad Biblia so impantongtong na Dios tan si Satanas. Perpekto so Dios, kanian imposible ya walay mauges ya kabiangan ya walad loob to ya kinatongtong to. (Deuteronomio 32:4; Job 2:1-6) Tinukso met nen Satanas si Jesus, ya anggapoy kasalanan to. (Mateo 4:8-10; 1 Juan 3:5) Ipapanengneng sirin na Biblia ya tudtuan walay Diablo tan aliwa itan ya basta labat mangisisimbolo na mauges ya ugali.

Pankelawan tayo kasi ya dakdakel so totoon agmanisia ya talagan walay Diablo? Andi, ta ibabaga na Biblia ya papalikdoen nen Satanas iray totoo pian nagawaan to ray labay to. (2 Tesalonica 2:9, 10) Sakey ed saray uusaren ton panamalingo et say pamubulag tod kanonotan na dakel ya totoo pian isipen dan anggapo tay Diablo.—2 Corinto 4:4.

Arum nin lingon pakatalos nipaakar ed Diablo

Lingon pakatalos: Lucifer so sakey nin ngaran na Diablo.

No antoy duga: Say labay ya ibaga na Hebreon salita ya impatalos bilang “Lucifer” diad arum ya Biblia et “maliwawan bitewen.” (Isaias 14:12) Ipapanengneng na saray akauna tan sinmublay iran bersikulo ya ontutukoy itan ed dinastiya odino linya na saray nantutumbokan ya ararin nanuley ed Babilonia ya pabaingan nen Jehova lapud inkamapaatagey da. (Isaias 14:4, 13-20) Inusar so balikas ya “maliwawan bitewen” pian balawen so dinastiya na Babilonia kayarin aderal itan.

Lingon pakatalos: Uusaren na Dios si Satanas pian suboken iray totoo tan makatulong itan ed pangukom To ed sikara.

No antoy duga: Kalaban na Dios so Diablo, aliwan lingkor to. Susumpaen tan aakusaan nen Satanas a Diablo iray totoon manlilingkor ed Dios.—1 Pedro 5:8; Apocalipsis 12:10.