Antoy Ibabaga na Biblia Nipaakar ed Pan-live in?

I-PLAY

Say ebat na Biblia

Ibabaga na Biblia so linawa na Dios parad totoo ya ‘paliisan day seksual ya imoralidad.’ (1 Tesalonica 4:3) Singa inusar ed Biblia, kaiba ed terminon “seksual ya imoralidad” so pikakalugoran, homoseksual iran kagagawa, tan pan-sex na laki tan bii ya agni nankasal.

Akin et importante ed Dios no kasin mankasal odino andi so saninaro?

Say panangasawa et nanlapud Dios. Inggapo to itan nen pinan-iba to so unonan laki tan bii. (Genesis 2:22-24) Agto labay ya manamong so laki tan bii no agni ra nankasal.
Amta na Dios no antoy sankaabigan parad totoo. Denisinyo toy panangasawa ya magmaliw a permanentin panulop na laki tan bii ya ontulong tan manprotekta ed kada membro na pamilya. Imanoen iyan simplin ilustrasyon. Ipapaamta na saray instruksion ya nanlapud manufacturer no panon ya buoen so sakey ya kagawaan, ontan met, ipapaamta ed sikatayo na saray instruksion ya nanlapud Dios no panon itayon nawalaan na maliket ya relasyon ed pamilya. Lanang ya nagugunggonaan iramay uunoren da ray estandarte na Dios.—Isaias 48:17, 18.

Ipapaamta na saray instruksion ya nanlapud manufacturer no panon ya buoen so sakey ya kagawaan. Ipapaamta ed sikatayo na saray instruksion ya nanlapud Dios no panon itayon nawalaan na maliket ya relasyon ed pamilya
Say pan-sex na aliwan sanasawa et panlapuan na saray seryoson problema. Singa bilang, nayarin manresulta itan ed agnilabay ya panlukon, saray sakit ya naalad pisekso, tan graben problema ed emosyon. a
Inikdan na Dios so laki tan bii na abilidad ya nawalaan na ananak panamegley na pan-sex. Say bilay et sagrado ed Dios, tan say abilidad ya nawalaan na ananak et mabmablin regalo. Labay na Dios ya pablien tayo itan ya regalo diad pamagalang tayo ed uksoyan to na panangasawa.—Hebreo 13:4.

Nayari kasin manamong so saninaro ya agni nankasal pian nasubok da no talagan compatible ira?

Pian magmaliw ya maliket tan mansiansia so relasyon na sanasawa, agda la kaukolan so “trial period” pian makaatras ni ra no ag-ira compatible. Imbes, maliket so relasyon na sanasawa no balang sakey et determinadon agmisian tan saniba dan resolbien iray problema. b Say pankasal et paeleten toy determinasyon na sanasawa ya mansiansian saniba legay bilay.—Mateo 19:6.